పాలమూరు జిల్లాను ఎంపిక చేసిన కేంద్ర సర్కారు
- త్వరలో ఉమ్మడి జిల్లా వ్యాప్తంగా మామిడి నర్సరీల ఏర్పాటు
- జడ్చర్ల లేదా భూత్పూర్ వద్ద కోల్డ్ స్టోరేజీలు, ప్యాక్ హౌస్ల ఏర్పాటు
- ఎన్హెచ్-44కు దగ్గరలో 15 ఎకరాల స్థల పరిశీలన
మహబూబ్నగర్, వెలుగు:పాలమూరు జిల్లాలో మూడు దశల్లో మ్యాంగో క్లస్టర్ ఏర్పాటుకు కేంద్ర సర్కారు చర్యలు తీసుకుంటోంది. దేశంలో ప్రధాన పంటలు సాగయ్యే ప్రాంతాలను గుర్తించేందుకు కేంద్ర ప్రభుత్వం క్లస్టర్లను ఏర్పాటు చేస్తోంది. ఏపీలో అరటి క్లస్టర్, తెలంగాణలో మామిడి క్లస్టర్ ఏర్పాటు చేసేందుకు చర్యలు తీసుకుంటోంది. రాష్ట్రంలో మామిడి ఎక్కువగా సాగువుతున్న పాలమూరు జిల్లాలో ఈ క్లష్టర్ ఏర్పాటు చేయనుంది. జులై నుంచి ఈ క్లస్టర్ ప్రారంభం కానుంది.
రూ.వంద కోట్ల ప్రాజెక్ట్..
క్లస్టర్ డెవలప్మెంట్ ప్రోగ్రాం (సీడీపీ) కింద రూ.వంద కోట్లతో కేంద్ర ప్రభుత్వం పాలమూరులో ఈ ప్రాజెక్టును చేపట్టనుంది. కేంద్ర ప్రభుత్వ ఆధీనంలోని గ్రాండ్ చార్టన్ ఏజెన్సీ త్వరలో ఉమ్మడి పాలమూరు జిల్లాలో పర్యటించి ఇక్కడ మామిడి తోటల రకాలు? ఎంత మంది రైతులు? ఎన్ని ఎకరాల్లో తోటలు సాగు చేస్తున్నారనే వివరాలు సేకరించనుంది. తోటలు మరింత పెంచడానికి ఎన్ని నర్సరీలు అవసరం అవుతాయి? అందులో హైటెక్ నర్సరీలు ఎన్ని అవసరం అవుతాయనే రిపోర్టును ఏజెన్సీ తయారు చేయనుంది.
మూడు భాగాలుగా క్లస్టర్..
క్లస్టర్ను నర్సరీ స్టేజ్, ప్రొడక్షన్, పోస్ట్ ప్రొడక్షన్ స్టేజ్లనే మూడు విభాలుగా చేయనున్నారు. నర్సరీ స్టేజ్లో మొక్కల పెంపకం చేపట్టనున్నారు. ప్రొడక్షన్ స్టేజ్లో మామిడి చెట్లకు పిందె నుంచి కాయలు పట్టే సమయంలో పురుగు పట్టకుండా ఉండేందుకు ఫ్రూట్ బ్యాగ్ సిస్టమ్ను అందుబాటులోకి తీసుకురానున్నారు. కాయ చిన్న సైజుగా ఉన్న సమయంలో వర్షాలు పడితే, కాయకు పురుగు పట్టకుండా ఈ ఫ్రూట్ బ్యాగ్తో ప్యాక్ చేస్తారు. పోస్ట్ ప్రొడక్షన్ స్టేజ్లో ప్యాకింగ్ ఎలా చేయాలి? ఇతర దేశాలకు ట్రాన్స్పోర్ట్ చేసేటప్పుడు డబ్బాలు ఏ క్వాలిటీలోఉండాలి? ల్యాగిస్టిక్ ఎలా ఉండాలి? అనే దానిపై శిక్షణ ఇస్తారు.
15 ఎకరాల్లో ఇన్ఫ్రాస్ట్రక్చర్..
క్లస్టర్లో భాగంగా ఎన్హెచ్-44కు దగ్గరలో ఇన్ఫ్రాస్ట్రక్చర్ డెవలప్మెంట్ చేయనున్నారు. ఇందులో కోల్డ్ స్టోరేజీలు, ప్యాక్ హౌస్లు ఏర్పాటు చేయనున్నారు. ఇందు కోసం 15 ఎకరాల స్థలం అవసరం ఉంది. ఇప్పటికే ఏసీపీ నుంచి మహబూబ్నగర్ కలెక్టర్కు గత నెల లెటర్ కూడా వచ్చింది. ప్రస్తుతం జడ్చర్ల, భూత్పూర్ ప్రాంతాల్లో ఎన్హెచ్-44కు 10 కిలోమీటర్ల దగ్గరలో ఉండే స్థలం కోసం పరిశీలిస్తున్నారు. ఇక్కడ ఇన్ఫ్రాస్ట్రక్చర్ ఏర్పాటుతో ప్రత్యక్షంగా, పరోక్షంగా 5 వేల మందికి ఉపాధి దొరకనుంది.
తీరనున్న మార్కెటింగ్ సమస్య..
పాలమూరు మామిడి రైతులను దశాబ్దాలుగా మార్కెటింగ్ సమస్య వేధిస్తోంది. క్వాలిటీ పండ్లు అందుబాటులో ఉన్నా, మార్కెటింగ్ చేయలేకపోతున్నారు. మద్దతు ధరకు కాకుండా తక్కువ రేట్కే హైదరాబాద్, బెంగళూరు వ్యాపారులకు పండ్లు అమ్మి నష్టపోతున్నారు. క్లస్టర్ ఏర్పాటు వల్ల మార్కెటింగ్ సౌకర్యం ఈజీ కానుంది. అలాగే మామిడిలో కొత్త వెరైటీల సాగుకు ప్రోత్సహించనున్నారు. పండ్లను ఎక్స్పోర్ట్ చేసి రైతులకు లాభాలు వచ్చేలా క్లస్టర్ను డెవలప్ చేయనున్నారు.
గుత్తకు ఇచ్చిన..
నాకు మూడెకరాల మామిడి తోట ఉంది. మార్కెట్ సౌకర్యం లేక ప్రతీ సీజన్లో ఇబ్బంది పడుతుంటి. కరోనా తర్వాత బండ్ల కిరాయి బాగా పెరగడంతో కాయలు వేరే చోటికి తీసుకుపోతలేను. ఈ సీజన్లో తోట పూత దశలో ఉన్నప్పుడు గుత్తకు ఇచ్చిన. క్లస్టర్ వస్తే మార్కెటింగ్ సౌలత్తోటి లాభాలు వస్తాయి.
– అనంతారెడ్డి, మామిడి రైతు, నంచర్ల
దళారులు చెప్పిన రేట్కే ఇస్తుంటిమి..
నేను రెండు ఎకరాల్లో మామిడి తోట సాగు చేస్తున్నా. సీజన్లో కాయలు కోసి హైదరాబాద్ మార్కెట్కు తరలిస్తాం. కాయ మంచిగున్నా దళారులు చెప్పిన రేట్కు అమ్మాలే. వాళ్లను కాదని ఎవరూ కొనేందుకు ముందు రారు. మామిడి క్లస్టర్ వస్తే మంచి జరుగుతది.
– కుర్వ మల్లప్ప, మామిడి రైతు, గాధిర్యాల్
