- చనీళ్లతో ఆరుబయటే స్నానాలు
- ఎస్సీ హాస్టల్స్కు ఈ యాడాది దుప్పట్లు కూడా ఇయ్యలే
- చలికి పిల్లలు వణుకుతున్నా పట్టించుకోని వైనం
నిజామాబాద్, వెలుగు : జిల్లాలో గవర్నమెంట్ హాస్టల్ స్టూడెంట్స్ చలి తీవ్రతకు వణికిపోతున్నారు. పదిరోజులుగా ఉష్ణోగ్రతలు పడిపోయి జనం ఇంటి బయటకు రావడానికి జంకుతున్న వేళ, హాస్టల్స్లో సరైన వసతులు లేక విద్యార్థుల పరిస్థితి దైన్యంగా మారింది. ఆఫీసర్లెవరూ అటువైపు కనీసం కన్నెత్తి కూడా చూడడం లేదు. బాత్రూమ్ల కొరతతో స్టూడెంట్స్వరండాల్లోనే చన్నీటి స్నానాలు చేస్తున్నారు. ఇరుకు గదులు, దుప్పట్లు లేక, పగిలిన కిటికీల నుంచి వచ్చే చలితో అవస్థలు పడుతున్నారు.
గీజర్లు వాడుతలేరు
జిల్లాలో 32 ఎస్సీ హాస్టళ్లుండగా వాటిల్లో 2,800 మంది స్టూడెంట్స్ఉన్నారు. 27 బీసీ హాస్టళ్లలో 2,808, 3 ఎస్టీ హాస్టళ్లలో 280 ఉంటూ బడులకు వెళ్తున్నారు. వారంతా పేద కుటుంబాల పిల్లలే. చలికాలంలో వేడినీటి స్నానాల కోసం దాదాపు అన్ని హాస్టల్స్లో గీజర్లు ఉన్నా వాటి నిర్వహణను వార్డెన్లు పట్టించుకోవడం లేదు. రిపేర్లతో బాగయ్యే వాటిని కూడా నిర్లక్ష్యం చేస్తున్నారు. అవసరమైన మేర బాత్రూమ్లు లేక పిల్లలు ఆరుబయట చన్నీటి స్నానాలు చేస్తున్నారు. బోధన్ఎస్సీ బాయ్స్ హాస్టల్లో బకెట్లు కూడా లేక నేరుగా నల్లా కింద గుంపుగుంపులుగా వెళ్లి స్నానం చేస్తున్నారు.
వర్ని, వడ్డేపల్లి ఎస్సీ బాయ్స్హాస్టళ్లలో వరండాలో ఏర్పాటు చేసిన సిమెంట్ తొట్టి చుట్టూ కూర్చొని చన్నీటి స్నానాలు చేయాల్సిన దుస్థితి ఉంది. నవీపేట ఎస్సీ, బీసీ బాయ్స్, సిరికొండ, నిజామాబాద్, డిచ్పల్లి ఎస్సీ బాయ్స్, శక్కర్నగర్హాస్టళ్లలోనూ ఇలానే ఉంది. వారం రోజులుగా 14 – 15 డిగ్రీల కనిష్ట ఉష్ణోగ్రతలు నమోదవుతున్నాయి. ఇలాంటి పరిస్థితుల్లో పిల్లల పరిస్థితి ఎలా ఉందో అర్థం చేసుకోవచ్చు.
చలి కాలానికి ముందే డోర్లు, కిటికీలకు రిపేర్లు చేయించాల్సి ఉన్నా, వార్డెన్లు పట్టించుకోలేదు. సిరికొండ, భీంగల్లో చలి ధాటిని ఆపడానికి స్టూడెంట్స్ కిటికీలకు తమ తువ్వాళ్లు అడ్డు కడుతున్నారు. ఇన్చార్జ్ వార్డెన్లున్న12 హాస్టల్స్లో పరిస్థితి మరీ ఘోరంగా ఉంది. గత గవర్నమెంట్మెయింటెనెన్స్ ఫండ్స్ఇవ్వకపోవడంతో పరిస్థితి దారుణంగా తయారైంది.
ఇచ్చేవి కాటన్ దుప్పట్లే
హాస్టల్స్ స్టూడెంట్లకు రెండేళ్లకోసారి గవర్నమెంట్ దుప్పట్లు ఇస్తుంది. అదీ కాటన్వే. గతేడాది అవి కూడా ఇవ్వకపోగా అంతకు ముందు 75 శాతం మేరకు పంపిణీ చేశారు. విద్యార్థులు ఇప్పటికీ వాటితోనే అడ్జెస్ట్ అవుతున్నారు. ఇద్దరు స్టూడెంట్స్కలిపి ఒక దుప్పటి వాడుకుంటున్న ఉదాహరణలు చాలా చోట్ల ఉన్నాయి. వడ్డేపల్లిలో కొత్త హాస్టల్ బిల్డింగ్ రెడీగా ఉన్నా దాంట్లోకి మారకుండా ఇరుకు గదుల్లోనే హాస్టల్ను కొనసాగిస్తున్నారు.
