‘ధర్మపురి’ ఈవీఎం స్ట్రాంగ్ రూం వ్యవహారంపై ఈసీకి కాంగ్రెస్ ఫిర్యాదు
హైదరాబాద్, వెలుగు : ధర్మపురి అసెంబ్లీ ఎన్నికలకు సంబంధించి స్ట్రాంగ్ రూం తాళాలు పోయిన ఘటనపై కేంద్ర ఎన్నికల సంఘానికి కాంగ్రెస్ పార్టీ మంగళవారం లేఖ రాసింది. ఓట్ల రీకౌంటింగ్కు సంబంధించి 17ఏ, 17సీ పేపర్లను సమర్పించాల్సిందిగా హైకోర్టు ఆదేశించడంతో సోమవారం జగిత్యాల జిల్లా మల్యాలలోని వీఆర్కే కాలేజీలో ఉన్న 3 స్ట్రాంగ్ రూంలను తెరిచేందుకు ప్రయత్నించారని కాంగ్రెస్ సీనియర్ వైస్ ప్రెసిడెంట్ జి.నిరంజన్ పేర్కొన్నారు.
ఒక రూమ్ను తెరిచినా.. మిగతా రెండు స్ట్రాంగ్ రూంలను తెరవలేదని, తాళాలు పోయాయని అధికారులు చెప్పారన్నారు. కలెక్టర్ సమక్షంలో తాళాలను పగలగొట్టేందుకు ప్రయత్నించగా.. కాంగ్రెస్ అభ్యర్థి లక్ష్మణ్ అడ్డుకున్నారన్నారు. కాంగ్రెస్ అభ్యర్థిపై స్వల్ప ఓట్ల తేడాతో నెగ్గిన బీఆర్ఎస్ అభ్యర్థి కొప్పుల ఈశ్వర్ ప్రస్తుతం రాష్ట్ర మంత్రిగా ఉన్నారని, ఈ విషయంలో ఏదో గోల్మాల్ జరిగి ఉండొచ్చని ఆక్షేపించారు.
