హైదరాబాద్ సిటీ, వెలుగు: అక్రమ లిక్కర్ దందా చేస్తున్న కానిస్టేబుల్, హోంగార్డుతో పాటు మరో ఇద్దరిని డీటీఎఫ్, ఎక్సైజ్ పోలీసులు కలిసి అరెస్ట్ చేశారు. ఈ కేసులో మరొకరు పరారీలో ఉన్నట్లు తెలిపారు. హైదరాబాద్ శంషాబాద్ ఎయిర్పోర్టులోని ఔట్ పోస్టులో జేమ్యా నాయక్ కానిస్టేబుల్గా, బండారి లింగయ్య హోంగార్డుగా పని చేస్తున్నారు. వీరు ప్యాసింజర్ల నుంచి టికెట్లను తీసుకుని ఎయిర్పోర్టులో డ్యూటీ ఫ్రీ లిక్కర్ కొనేవారు.
ఆ తర్వాత వీటిని బయటకు తీసుకెళ్లి ఎక్కువ ధరకు అమ్ముకునేవారు. పక్కా సమాచారంతో వీరిద్దరితో పాటు వీరికి సహకరిస్తున్న మరో ఇద్దరు హరీశ్ కుమార్, రాఘవేందర్ను శుక్రవారం అరెస్ట్ చేసినట్లు శంషాబాద్ ఎక్సైజ్ సూపరింటెండెంట్కృష్ణప్రియ తెలిపారు. నిందితుల నుంచి రూ.15 లక్షల విలువైన 46 డ్యూటీ ఫ్రీ మద్యం బాటిళ్లతోపాటు మూడు కార్లు స్వాధీనం చేసుకున్నారు. మరో నిందితుడు మహేందర్ పరారీలో ఉన్నట్లు తెలిపారు.
