- సేవలు నిలిపివేయాలని ఆ దేశ సుప్రీంకోర్టు ఆర్డర్
సావోపోలో : బ్రెజిల్లో ఎక్స్(ట్విట్టర్) సేవలను నిలిపివేయాలని ఆ దేశ సుప్రీంకోర్టు ఆదేశించింది. బ్రెజిల్లో ట్విట్టర్ తరపున న్యాయ ప్రతినిధిని నియమించాలని సుప్రీంకోర్టు ఇంతకుముందు ఆదేశాలు జారీ చేసింది. ఆ ఆదేశాలను ట్విట్టర్ బేఖాతరు చేయడంతో సదరు ప్లాట్ఫాంపై సస్పెన్షన్ విధిస్తూ సుప్రీంకోర్టు జడ్జి జస్టిస్ అలెగ్జాండర్ ది మోరిస్ శుక్రవారం ఆదేశాలు జారీ చేశారు. న్యాయ ప్రతినిధిని నియమించకపోతే ట్విట్టర్ను బ్లాక్ చేస్తామని మోరిస్ 3 రోజుల క్రితమే హెచ్చరించారు.
‘‘బ్రెజిల్ సార్వభౌమత్వాన్ని ట్విట్టర్ అధినేత ఎలాన్ మస్క్ అవమానించారు. సుప్రీంకోర్టు ఆదేశాలను పాటించకుండా న్యాయవ్యవస్థను ఆయన అగౌరవపరిచారు. ఇక్కడి(బ్రెజిల్) చట్టాలకు తాను అతీతం అనుకున్నట్లు మస్క్ తీరు ఉంది. కోర్టు ఆదేశాలు పాటించే వరకు ట్విట్టర్పై సస్పెన్షన్ కొనసాగుతుంది. అలాగే వర్చువల్ ప్రైవేట్ నెట్ వర్క్ (వీపీఎన్) వాడేవారికి రోజూ రూ.7.5 లక్షల జరిమానా విధిస్తున్నాం” అని మోరిస్ తెలిపారు.
ఈ ఆదేశాలతో శనివారం నుంచి బ్రెజిల్లో ట్విట్టర్ సేవలు నిలిచిపోయాయి. దేశంలో మొత్తం 4 కోట్ల మంది ట్విట్టర్ వాడుతున్నారు. కాగా, కోర్టు ఆదేశాలను పాటించకపోవడంతో బ్రెజిల్లో తమ సంస్థ సేవలను బ్లాక్ చేస్తారని తాము ముందే ఊహించామని ట్విట్టర్ తెలిపింది.
‘బ్రెజిల్లో భావప్రకటన స్వేచ్ఛను హరించాలని చూస్తున్నారు’ అంటూ జస్టిస్ మోరిస్పై సంచలన ఆరోపణలు చేసింది. మరోవైపు రష్యా, చైనా, ఇరాన్, మయన్మార్, ఉత్తర కొరియా, వెనెజులా, తుర్కెమినిస్తాన్, పాకిస్తాన్, టర్కీ, ఈజిప్ట్ దేశాలలో ట్విట్టర్పై నిషేధం కొనసాగుతోంది.
