- ఫ్రెండ్స్ను సాగనంపేందుకు వచ్చి ప్రమాదం బారిన..
- ఆగ్రహంతో మూడు బస్సుల అద్దాలు పగలుగొట్టిన బంధువులు
వరంగల్ సిటీ, వెలుగు : తన బర్త్డే వేడుకలకు వచ్చిన ఫ్రెండ్స్ను సాగనంపేందుకు వెళ్లి ఓ యువకుడు బస్సు ఢీకొట్టి చనిపోయాడు. వరంగల్ కాశిబుగ్గకు చెందిన చింత సారంగపాణి, మల్లిక దంపతులకు ఇద్దరు బిడ్డలు, ఒక కొడుకు ఉన్నారు. కొడుకు చింత చరణ్ (17) మొన్నటి టెన్త్ ఎగ్జామ్స్ రాశాడు. 19వ తారీఖున చరణ్ బర్త్ డేకు ఫ్రెండ్స్ చాలా మంది వచ్చారు. గురువారం ఉదయం చరణ్ తన ఫ్రెండ్స్ను వారి ఊళ్లకు పంపించడానికి వరంగల్ బస్టాండ్ కు వచ్చాడు.
ఇంతలోనే ఖమ్మం వెళ్లాల్సిన ఆర్టీసీ బస్సు ప్లాట్ ఫామ్ నుంచి రివర్స్ లో వచ్చి చరణ్ కు బలంగా తాకింది. దీంతో చరణ్ తల పగిలి రక్తస్రావం కాగా స్పాట్లోనే చనిపోయాడు. ఆగ్రహానికి గురైన అతడి ఫ్రెండ్స్, స్థానికులు అక్కడ ఉన్న మూడు బస్సుల అద్దాలను పగలగొట్టి ఆందోళన కు దిగారు. సమాచారం అందుకున్న ఇంతేజార్ గంజ్ పోలీసులు బస్టాండ్ చేరుకొని ఆందోళనకారులకు నచ్చ చెప్పారు. అనంతరం డెడ్బాడీని పోస్టుమార్టం కోసం ఎంజీఎం మార్చురీకి తరలించారు. పోలీసులు కేసు నమోదు చేసుకుని దర్యాప్తు చేస్తున్నారు.
