భద్రాద్రికొత్తగూడెం, వెలుగు : ఇల్లెందు ఎమ్మెల్యే హరిప్రియకు వ్యతిరేకంగా నియోజకవర్గంలో మండలాల వారీగా అసమ్మతి నేతలు మీటింగ్లు పెడుతూనే ఉన్నారు. ఈసారి హరిప్రియకు బీఫాం ఇస్తే తాము పనిచేయబోమని బీఆర్ఎస్ హైకమాండ్కు ఇల్లెందు అసమ్మతి నేతలు అల్టిమేటం ఇచ్చే వరకు వెళ్లారు.
ఆదివారం బయ్యారం మండలంలో అధికారపార్టీ అసమ్మతి నేతలు సమావేశమై ఇదే విషయాన్ని స్పష్టం చేశారు. కాగా అసమ్మతి నేతలు ఇప్పటికే నియోజకవర్గ ఇంచార్జి, ఎంపీ వద్దిరాజు రవిచంద్ర, మంత్రి హరీశ్రావుకు ఎమ్మెల్యే తీరుపై కంప్లైంట్ఇచ్చారు. నియోజకవర్గంలో హరిప్రియ, ఆమె భర్త ఏకపక్ష నిర్ణయాలతో పార్టీ ఏ విధంగా నష్టపోతున్నదో వివరించారు.
హరిప్రియకు కాకుండా ఇతరులెవరికైనా టికెట్ఇస్తేనే తాము పనిచేస్తామని త్వరలో బీఆర్ఎస్ వర్కింగ్ ప్రెసిడెంట్ కేటీఆర్ను కలిసి వింవరించేందుకు అసమ్మతి నేతలు సన్నద్దమవుతున్నారు. బయ్యారంలో జరిగిన అసమ్మతి నేతల మీటింగ్లో ఇల్లెందు మున్సిపల్ చైర్మన్ డి. వెంకటేశ్వరరావు, బీఆర్ఎస్ జిల్లా అధికార ప్రతినిధి పులిగండ్ల మాధవరావు, బీఆర్ఎస్ ముఖ్య నేతలు మూల మధుకర్ రెడ్డి, దేవీలాల్ నాయక్, జానీ, గణేశ్పాల్గొన్నారు.
