సికింద్రాబాద్, వెలుగు: హబ్సిగూడలోని ఓ ఐ హాస్పిటల్ డాక్టర్లు కంటి ఆపరేషన్ పేరుతో ఐదేండ్ల పాప మృతికి కారణమయ్యారు. ఆపరేషన్కు ముందు మోతాదుకు మించి అనస్థీషియా ఇవ్వడంతో, కంటి నుంచి బ్రెయిన్కు పాకి బాలిక చనిపోయింది. కుటుంబ సభ్యులు, పోలీసులు తెలిపిన వివరాల ప్రకారం.. మహబూబాబాద్ జిల్లా ఉగ్గంపల్లికి చెందిన రవి, మౌనిక దంపతులకు కూతురు అన్విక(5), కొడుకు(2) ఉన్నారు.
బోర్ వెల్ కంపెనీలో సూపర్వైజర్గా పనిచేసే రవి ఫ్యామిలీతో కలిసి కొంతకాలంగా చందానగర్ ఆర్సీపురంలో ఉంటున్నాడు. అన్విక ప్రస్తుతం యూకేజీ చదువుతోంది. రెండు రోజుల కింద ఇంటి ముందు ఆడుకుంటున్న టైంలో కట్టె పుల్లను విరుస్తుండగా, చిన్న ముక్క ఎగిరి అన్విక కంట్లో గుచ్చుకుపోయింది. తల్లిదండ్రులు వెంటనే చందానగర్ లోని ఆనంద్ఐ హాస్పిటల్కు తీసుకెళ్లారు. అక్కడి డాక్టర్లు టెస్టులు చేసి ప్రాబ్లమ్ఏమీ లేదని, డ్రాప్స్ వేస్తే తగ్గిపోతుందని చెప్పారు. ఒకరోజంతా అలాగే ఉంచారు. పరిస్థితిలో ఎలాంటి మార్పు రాకపోగా, పాప కన్ను నీరు కారుతూ.. ఎర్రగా మారింది. నొప్పి ఎక్కువవ్వడంతో డాక్టర్లు ఆపరేషన్చేయాలని చెప్పారు.
అందుకోసం హబ్సిగూడలోని ఆనంద్ఐ హాస్పిటల్ మెయిన్ బ్రాంచ్కు పంపించారు. అక్కడి డాక్టర్లు శుక్రవారం మధ్యాహ్నం ఒంటి గంటకు ఆపరేషన్ మొదలుపెట్టే ముందు అనస్థీషియా ఇచ్చారు. డోస్ఎక్కువై అపస్మారక స్థితిలోకి వెళ్లింది. గుర్తించిన డాక్టర్లు పాప హార్ట్బీట్సరిగా లేదని ఒకసారి, లేదు బాగానే ఉంది.. కోలుకుంటోందని మరోసారి కుటుంబ సభ్యులకు చెప్పి హడావిడి చేశారు. మరో వైపు తార్నాక సురక్ష, ఎల్బీనగర్చింతలకుంటలోని రెయిన్బో హాస్పిటళ్ల నుంచి ఐ స్పెషలిస్టులను పిలిపించారు. కుటుంబ సభ్యులకు సమాచారం ఇవ్వకుండానే అన్వికను చింతకుంటలోని రెయిన్బో ఆసుపత్రికి అంబులెన్స్లో తరలించారు. అక్కడ చికిత్స పొందుతూ శనివారం పాప చనిపోయింది.
ఆందోళనతో పరిస్థితి ఉద్రిక్తం
పాప చనిపోయినప్పటికీ శనివారం ఉదయం నుంచి సాయంత్రం వరకు రెయిన్ఆసుపత్రిలో చికిత్స అందిస్తున్నామంటూ ఆనంద్హాస్పిటల్డాక్టర్లు నమ్మబలికారు. అనుమానంతో పాప కుటుంబ సభ్యులు రెయిన్ బో ఆసుపత్రిలో సంప్రదించగా అన్వికను వెంటిలేటర్పై ఉంచామని, బ్రెయిన్డెడ్ అయినట్లు తెలిపారు. కొద్దిసేపటికే ఆమె చనిపోయింది. విషయం తెలుసుకున్న విద్యార్థి సంఘాలు, ఎమ్మార్పీఎస్ నాయకులు హబ్సిగూడలోని ఆనంద్ ఆసుపత్రి వద్దకు చేరుకుని ఆందోళనకు దిగారు. పరిస్థితి ఉద్రిక్తంగా మారడంతో భారీగా పోలీసులు మోహరించారు.
డాక్టర్ల నిర్లక్ష్యంతోనే తమ బిడ్డ చనిపోయిందని తల్లిదండ్రులు, బంధువులు బోరున విలపించారు. ఆనంద్ హాస్పిటల్ డాక్టర్లపై చర్యలు తీసుకోవాలని డిమాండ్ చేశారు. అయితే పోలీసులు ఆనంద్ హాస్పిటల్ యాజమాన్యంతో మాట్లాడి న్యాయం చేస్తామని చెప్పారు. నష్టపరిహారం ఇచ్చేందుకు యాజమాన్యం ఒప్పుకోవడంతో బాధితులు పాప డెడ్బాడీని తీసుకుని సొంతూరుకు వెళ్లిపోయారు.
