- 18 ఏండ్లు నిండిన ప్రతి ఒక్కరూ అర్హులే..
- ఓటరు నమోదుకు స్పెషల్క్యాంపెయిన్
- ఆఫ్లైన్లో కుదరకపోతే ఆన్లైన్లో నమోదుకు అవకాశం
- పోలింగ్ శాతం పెంపుపై ఎలక్షన్ కమిషన్ దృష్టి
మంచిర్యాల, వెలుగు : లోక్సభ ఎన్నికల నేపథ్యంలో ఓటరు నమోదుకు ఎలక్షన్ కమిషన్ ఏప్రిల్ 15 వరకు చాన్స్ ఇచ్చింది. పోలింగ్ శాతాన్ని పెంచడమే లక్ష్యంగా యువ ఓటర్ల నమోదుకు స్పెషల్క్యాంపెయిన్ చేపట్టింది. ఇంతకుముందు కూడా పలుమార్లు ఓటరు నమోదు చేపట్టినప్పటికీ ఆశించిన స్పందన రాలేదు. విద్య, ఉద్యోగాల నిమిత్తం వివిధ ప్రాంతాల్లో ఉంటున్నవారికి ఆఫ్లైన్లో నమోదు చేసుకోవడానికి వీలుకావడం లేదు. దీంతో వారు ఎక్కడ ఉన్నా ఆన్లైన్లో రిజిస్టర్ చేసుకోవడానికి ఎలక్షన్కమిషన్ అవకాశం ఇచ్చింది.
ఈసీ ఆదేశాల మేరకు అధికార యంత్రాంగం విద్యాసంస్థల్లో అవగాహన సదస్సులు నిర్వహించినప్పటికీ ఇంకా చాలామంది నిర్లక్ష్యంగా వ్యవహరిస్తున్నారు. 18 సంవత్సరాలు నిండిన యువజనులందరికీ భారత రాజ్యాంగం ఓటుహక్కు కల్పించింది. తద్వారా అసెంబ్లీ, లోక్సభ, స్థానిక సంస్థల ఎన్నికల్లో తమకు నచ్చిన నాయకులకు ఓటువేసి ప్రజాప్రతినిధులుగా ఎన్నుకునే అవకాశం ఉంటుంది. యువత చైతన్యంతో ఓటుహక్కును పొంది స్వేచ్ఛగా వినియోగించుకోవాలని ఎన్నికల సంఘం పిలుపునిస్తోంది.
ఓటరు నమోదు ఇలా..
యువజనులు ఆఫ్లైన్లో ఓటరుగా నమోదు చేసుకునేందుకు తహసీల్దార్ఆఫీసుల్లో దరఖాస్తు చేసుకోవాలి. ఫామ్ 6లో పూర్తి వివరాలు నమోదు చేసి సమర్పించాలి. ఆధార్ కార్డుతో పాటు అడ్రస్ ప్రూఫ్నకు సంబంధించి కరెంట్ బిల్లు, గ్యాస్ బిల్లు, డ్రైవింగ్లైసెన్స్ వంటి వాటిలో ఏదో ఒకటి దరఖాస్తుకు జత చేయాలి. బూత్ లెవల్ ఆఫీసర్లు (బీఎల్ఓలు) క్షేత్రస్థాయిలో ఎంక్వయిరీ చేసి ఓటరుగా రిజిస్టర్ చేస్తారు.
ఆఫ్లైన్లో ఓటరుగా నమోదు చేసుకోవడానికి వీలు లేకపోతే ఆన్లైన్లో http:///voters.eci.gov.in వెబ్సైట్లోకి వెళ్లి రిజిస్టర్ చేసుకోవచ్చు. ముందుగా ఫోన్ నంబర్తో రిజిస్ట్రేషన్ చేసుకొని వెబ్సైట్లో లాగిన్ కావాలి. కొత్తగా ఓటరు నమోదుకు ఫామ్ 6 ఫిల్చేసి, ఆధార్కార్డు, అడ్రస్ ప్రూఫ్ కాపీలు సబ్మిట్ చేస్తే సరిపోతుంది. ఏఈఆర్వోలు పరిశీలించి ఓటరుగా నమోదు చేస్తారు. వెబ్సైట్ద్వారా కూడా నమోదు చేసుకునే చాన్స్ లేకపోతే స్మార్ట్ఫోన్ ద్వారా కూడా చేసుకోవచ్చు.
గూగుల్ ప్లేస్టోర్ నుంచి Voter helpline mobile app డౌన్లోడ్ చేసుకొని దాని ద్వారా కూడా ఓటరుగా నమోదు చేసుకోవచ్చు. అనంతరం http:///voters.eci.gov.in వెబ్సైట్ నుంచి ఓటరు గుర్తింపు కార్డు (ఈ–ఎపిక్) కార్డును డౌన్లోడ్ చేసుకోవచ్చు.
ప్రతి ఒక్కరూ నమోదు చేసుకోవాలి..
ఓటరు నమోదు అనేది నిరంతర ప్రక్రియ. లోక్సభ ఎన్నికల నేపథ్యంలో ఏప్రిల్15 వరకు ఓటరు నమోదుకు ఎలక్షన్ కమిషన్ గడువు ఇచ్చింది. 18 సంవత్సరాలు నిండిన యువతీయువకులంతా ఓటరుగా నమోదు చేసుకోవాలి. జిల్లాలో ఓటరు నమోదు, పోలింగ్ శాతం పెంచడానికి ఎన్నికల సంఘం ఆదేశాల మేరకు పలు కార్యక్రమాలు చేపడుతున్నాం. యువత చేతిలోనే దేశ భవిష్యత్ ఉంది. అది ఓటుహక్కుతోనే సాధ్యమవుతుంది. అర్హత కలిగిన ప్రతి ఒక్కరూ ముందుకు వచ్చి ఓటుహక్కు పొందాలి. – బి.సంతోష్, కలెక్టర్, జిల్లా ఎన్నికల అధికారి
