మూడు అంచెల్లో నిర్వహించే ఎస్ఐ, కానిస్టేబుల్‌ పరీక్షల్లో మొదటి దశ పూర్తయింది. సివిల్ ఎస్సై ప్రిలిమినరీ పరీక్షలో 46.80 శాతం, సివిల్ కానిస్టేబుల్‌ ప్రాథమిక పరీక్షలో 31.40 శాతం, రవాణా కానిస్టేబుల్‌ పరీక్షలో 44.84శాతం, ఎక్సైజ్‌ కానిస్టేబుల్‌ పరీక్షలో 43.65శాతం మంది ప్రిలిమ్స్లో ఉత్తీర్ణత సాధించారు. రెండో దశలో నిర్వహించే ఈవెంట్స్‌‌లో విజయం సాధిస్తేనే చివరి రేసులో ఉంటారు. కానిస్టేబుల్‌, ఎస్ఐ పరీక్షల ఈవెంట్స్ ఒకే విధంగా ఉంటాయి. ఫైనల్‌ సెలెక్షన్‍లో ముఖ్యమైన ఈవెంట్స్ ప్రాక్టీస్ చేస్తూనే మెయిన్స్కు సిద్ధమయితే ఖాకీ కొలువు సులువుగా కొట్టవచ్చు.
ప్రిలిమినరీ రాత పరీక్షలో అర్హత పొందిన అభ్యర్థులకు పీఎంటీ (ఫిజికల్ మెజర్మెంట్ టెస్ట్), పీఈటీ (ఫిజికల్ ఎఫిషియన్సీ టెస్ట్) లను నిర్వహిస్తారు. గత నోటిఫికేషన్ ప్రిలిమినరీ పరీక్షలో అర్హత సాధించిన వారిలో కేవలం 40 శాతం మంది మాత్రమే ఈవెంట్స్‌‌లో క్వాలిఫై అయ్యారు. రాత పరీక్షలో తక్కువ మార్కులు వచ్చినా ఈవెంట్స్‌‌లో ఎక్కువ మార్కులు పొంది జాబ్‌ సొంతం చేసుకున్న అభ్యర్థులు చాలా మంది ఉన్నారు.
శారీరక ప్రమాణాలు
ఫిజికల్ ఎఫిషియెన్సీ టెస్ట్ (పీఈటీ) అనంతరం ఫిజికల్ మెజర్మెంట్ టెస్ట్ నిర్వహిస్తారు. పురుష అభ్యర్థులు ఎత్తు 167.6 సెం.మీ. కంటే తక్కువ ఉండకూడదు. మహిళా అభ్యర్థులు ఎత్తు 152.5 సెం.మీ. కంటే తక్కువ ఉండకూడదు.
పురుషుల ఈవెంట్స్
1600 మీ. పరుగు: 7 నిమిషాల 15 సెకన్లు.
లాంగ్‌‌జంప్‌: 4 మీటర్లు.
షాట్పుట్: 6 మీటర్లు. (7.26 కి.గ్రా.)
అభ్యర్థులు ఈ ఈవెంట్లలో కచ్చితంగా అర్హత సాధించాలి.
మహిళల ఈవెంట్స్
800 మీ. పరుగు: 5 ని. 20 సెకన్లు.
లాంగ్‌‌జంప్‌: 2.50 మీటర్లు.
షాట్పుట్: 4 మీటర్లు (4 కేజీలు)
అభ్యర్థులు ఈ ఈవెంట్లలో కచ్చితంగా అర్హత సాధించాలి.
లాంగ్ జంప్ : పరుగుతో పాటు ఎగిరే సామర్థ్యంపై ఇది ఆధారపడి ఉంటుంది కాబట్టి లెగ్‌ పవర్‌ పెంచుకోవాలి. స్టార్టింగ్‌ పాయింట్‌ కనీసం 20 నుంచి 30 అడుగుల దూరంలో ఉండాలి. రన్నింగ్లో తల పైకి ఉండేలా చూసుకోవాలి. ఏ కాలు మీద టేకాఫ్ కావాలనుకుంటున్నారో దాని మీదే రన్నింగ్ మొదలుపెట్టాలి. సాధ్యమైనంత వేగంగా పరిగెత్తి స్ర్టాంగ్‍ ఫుట్‍తో బలంగా పుష్‍ చేస్తూ టేకాఫ్ తీసుకోవాలి. గాలిలో మరీ పైకి కాకుండా మీడియం ఎత్తులో సైక్లింగ్‍ చేయడం వల్ల ఎక్కువ దూరం జంప్ చేయవచ్చు. చేతులు ముందుకు పెట్టి మోకాళ్లు, బాడీని ముందుకు వంచి ల్యాండ్‍ అవ్వాలి. రోజుకు 5 నుంచి 10 సార్లు ఇలా చేయడం వల్ల ఉత్తమ జంప్‌‌ను నమోదు చేయవచ్చు.
షాట్పుట్ : 7.62 కిలోల బరువున్న షాట్పుట్ను ఎంత దూరం విసురుతామనేది సర్కిల్‍లో నిలబడటం, గుండును పట్టుకునే విధానంపై ఆధారపడి ఉంటుంది. గుండును చేతి వేళ్ల మొదళ్లలో ఆనించి ఫింగర్స్ తో మాత్రమే గ్రిప్‍ చేసి పట్టుకోవాలి. సర్కిల్‍లో టార్గెట్‌‌కు 90 డిగ్రీల కోణంలో నిలబడితే హిప్‌‌తో మూమెంటం తీసుకోవడానికి వీలవుతుంది. వేళ్లతో పట్టుకున్న గుండును చెవి వెనుక ఆనించి నెమ్మదిగా ఒక అడుగు వెనుకకు వేసి మూమెంట్‌ స్టార్ట్‌ చేయాలి. హిప్‌, బాడీని కిందకు వంచుతూ గుండును బలంగా పుష్‍ చేయాలి. ఇలా రోజుకు 8 నుంచి 10 సార్లు ప్రాక్టీస్ చేయాలి.
ప్రాక్టీస్‌‌లో జాగ్రత్తలు: రోజూ ఒకే సమయంలో ఉదయం లేదా సాయంత్రం ప్రాక్టీస్ చేయాలి. కనీసం 7 నుంచి 8 గంటల నిద్ర ఉండేలా చూసుకోవాలి. ప్రతి రోజు ప్రాక్టీస్ కు ముందు 10 నుంచి 20 నిమిషాలు వార్మప్ చేయాలి. రోజూ కనీసం 30 నుంచి 40 నిమిషాలు పరుగును సాధన చేస్తూ శ్వాసపై నియంత్రణ తెచ్చుకోవాలి. ఒకేరోజు అన్ని ఈవెంట్స్ ఉంటాయి కాబట్టి రెండు రోజులకొకసారి అన్నింటిని ప్రాక్టీస్ చేయాలి. ప్రతి పది రోజులకు కనీసం రెండు సార్లు 5 కిలోమీటర్లు పరిగెత్తడం వల్ల స్టామినా, స్పీడ్‌ రెండూ మెరుగవుతాయి. లాంగ్ జంప్‍లో సాధ్యమైనంత వేగంగా పరిగెత్తి టేకాఫ్ తీసుకోవాలి. మునివేళ్ల మీద పరిగెత్తడం, గాలిలో కాళ్లని సైక్లింగ్‍ చేయడం వల్ల ఎక్కువ దూరం దూకవచ్చు. షాట్పుట్ను అరచేతికి ఆనించకుండా మన ఫింగర్స్ తో మాత్రమే గ్రిప్‍ చేసి పట్టుకోవాలి. గుండును నేరుగా కాకుండా 45 డిగ్రీల కోణంలో త్రో చేస్తే ఎక్కువ దూరం విసరవచ్చు. గాయాలైనా మొండిగా ప్రాక్టీస్ కు వెళ్లకూడదు. అధిక బరువు ఉన్నవారు బీపీ తో పాటు ఇతర మెడికల్‌ చెకప్‌ చేయించుకోవడం మంచిది. శరీరానికి సౌలభ్యంగా ఉండే షూస్‌, ట్రాక్స్, టీషర్ట్స్‌, సపోర్టర్‌ వంటి వాటిని కచ్చితంగా ధరించి ప్రాక్టీస్ చేయాలి.
హెల్తీ ఫుడ్: బంగాళాదుంపలు, పిండి పదార్థాలు ఎక్కువగా ఉండే రైస్‌, చిలగడదుంపలు వంటివి ఎక్కువ తీసుకోకూడదు. గుడ్లు, పాలతో పాటు మొలకెత్తిన విత్తనాలు, డ్రైఫ్రూట్స్‌ వంటివి తీసుకోవాలి. కొవ్వులు ఎక్కువగా ఉండే నూనెలు, వేపుళ్లు, మాంసాహారం తగ్గించి తేలికగా జీర్ణమయ్యే ఆహారం తీసుకోవాలి. ప్రాక్టీస్‌‌లో అతిగా నీరు తాగకూడదు. కొద్ది కొద్దిగా విరామం ఇస్తూ తీసుకోవాలి. అన్నం తినకుండా ఎట్టి పరిస్థితుల్లో సాధన చేయకూడదు. ఆల్కహాల్‌, ఇతర స్టెరాయిడ్స్‌ వంటి అలవాట్లకు దూరంగా ఉండాలి. ఇవి ఆరోగ్యంపై ప్రతికూల ప్రభావం చూపడంతో పాటు ప్రాక్టీస్ సమయంలో ఇబ్బందిగా ఉంటుంది. మార్కెట్‌‌లో దొరికే ఎనర్జీ డ్రింక్స్‌ వంటి వాటి జోలికి వెళ్లకూడదు.–వెలుగు, ఎడ్యుకేషన్ డెస్క్
1600 మీటర్ల పరుగు: ఇది ప్రాక్టీస్ చేసే సమయంలో1600 మీటర్లు మాత్రమే పరుగెత్తకుండా ముందుగా ప్రతిరోజూ 2 నుంచి -5 కి.మీటర్లు పరుగెత్తాలి. ఇలా 15- నుంచి 20 రోజులు చేసిన తర్వాత 200 మీ., 400 మీ., 600 మీ., 800 మీ., 1000 మీ., 1200 మీ. క్రమంగా పెంచుకుంటూ సాధన చేయాలి. 1600 మీ. రన్నింగ్లో చివరి 400 మీ. చాలా కీలకం. మొదట రేస్‌ ప్రారంభమైన తర్వాత వేగాన్ని ఒకేసారి పెంచకుండా మధ్యస్థంగా ఉండే వేగంతో.. అంటే మొదటి 800 మీ.ను 3 నుంచి 3 1/2 నిమిషాల్లో పూర్తిచేయాలి. అదే టైమింగ్‌‌తో పరుగును 1200 మీటర్ల వరకు పెంచితే చివరి 400 మీటర్లను మొత్తం తన వద్ద ఉన్నంత శక్తినంతటినీ ఉపయోగిస్తూ చేతి కదలికలను పెంచుతూ పరుగెత్తాలి. ఇలా చేయడం వల్ల అభ్యర్థి నిర్ణీత సమయం కంటే ముందుగానే గమ్యస్థానాన్ని చేరుకోవచ్చు. అభ్యర్థి రేస్‌ మొదలుకు ముందు లక్ష్యాన్ని పూర్తిచేసే దిశవైపు మాత్రమే చూస్తూ, విజిల్‌ లేదా గో పై ఏకాగ్రత ఉంచాలి. ప్రారంభించిన వేగాన్ని పెంచుతూ చివరగా 600 మీటర్ల లైన్‌ దాటేంత వరకు తన లైన్‌‌లోనే అదే వేగాన్ని కొనసాగించాలి.
గ్రౌండ్తో పాటు మెయిన్స్ ప్లాన్
ప్రిలిమ్స్లో క్వాలిఫై అయిన అభ్యర్థులు గ్రౌండ్లో ఈవెంట్స్ ప్రాక్టీస్ చేస్తూనే మెయిన్స్కు ప్రిపేర్ అవ్వాలి. గత నోటిఫికేషన్‌‌లో 80 వేల మంది అభ్యర్థులు ప్రిలిమ్స్ దాటితే.. వారిలో సుమారు 50 వేల మంది ఈవెంట్స్‌‌లో వెనుదిరిగారు. అభ్యర్థులు రన్నింగ్ ప్రాక్టీస్ పై ఫోకస్ చేయాలి. ప్రిలిమ్స్ ఎగ్జామ్ కఠినంగా ఉండడంతో అందుకు అనుగుణంగా మెయిన్స్కు సిద్ధం కావాలి. తుది పరీక్షలో లాంగ్వేజ్ పేపర్లు తెలుగు, ఇంగ్లిష్ ఉంటాయి. కాబట్టి గ్రౌండ్ ప్రాక్టీస్ చేస్తూనే చదవడానికి టైమ్ కేటాయించాలి.
ఎమ్. సతీష్, సివిల్ ఎస్ఐ (2020 బ్యాచ్)
ఫిట్‍నెస్‍తో ఈవెంట్స్ ఈజీ
ఏ ఈవెంట్స్ అయినా ఫిట్‍నెస్‍ చాలా ముఖ్యం. కండరాలు దృఢంగా మారితేనే స్టామినా పెరుగుతుంది. ఈవెంట్స్ ప్రారంభించడానికి ముందు 10 రోజులు కేవలం రన్నింగ్ ద్వారా ఫిట్‍నెస్‍, స్టామినా పెంచుకోవాలి. రన్నింగ్ కు ముందు వార్మప్ ఎక్సర్‍సైజ్‍ రన్నింగ్ తర్వాత కూలింగ్‍ డౌన్‍ ఎక్సర్‍సైజ్‍ ఖచ్చితంగా చేయాలి. ఇలా చేయడం వల్ల కీళ్లు, కండరాలకు గాయాలు కాకుండా కాపాడుకోవచ్చు. ఈవెంట్స్ లో 1600 మీటర్ల పరుగు కీలకం కాబట్టి డైలీ 5కి.మీ. ప్రాక్టీస్ చేస్తే మంచి రిజల్ట్ ఉంటుంది.
సీహెచ్.సుమంత్, ఆర్ఎస్ఐ (కొత్తగూడెం)
