హైదరాబాద్: తెలంగాణలో సంచలనం సృష్టించిన లగచర్ల దాడి ఘటనలో బొమ్రాస్‌పేట పోలీసులు మూడు ఎఫ్ఐఆర్లు నమోదు చేసిన విషయం తెలిసిందే. ఒకే ఘటనపై వేర్వేరు కేసులు నమోదు చేయడాన్ని సవాల్ చేస్తూ బీఆర్ఎస్ నేత, కొడంగల్ మాజీ ఎమ్మెల్యే పట్నం నరేందర్ రెడ్డి తెలంగాణలో హైకోర్టులో పిటిషన్ దాఖలు చేశారు. ఈ పిటిషన్‌పై సోమవారం (నవంబర్ 25) హైకోర్టులో విచారణ జరిగింది.
బొమ్రాస్‌పేట పోలీసులు లగచర్ల దాడి ఘటనలో 3 ఎఫ్ఐఆర్లు నమోదు చేసిన విషయాన్ని కోర్టు దృష్టికి తీసుకొచ్చిన పిటిషనర్‌ తరుఫు న్యాయవాది.. ఒకే ఘటనపై వేర్వేరు కేసులు పెట్టవద్దన్న సుప్రీం తీర్పును ఈ సందర్భంగా ప్రస్తావించారు. పోలీసుల తరుఫున కేసుల వివరాలను అదనపు అడ్వకేట్ జనరల్ రజనీకాంత్‌ అందించారు. లగచర్లలో జరిగిన దాడి ఆధారంగా పోలీసులు వేర్వేరు కేసులు నమోదు చేశారని తెలిపారు. సోమవారం ఇరువైపులా వాదనలు ముగియడంతో.. పట్నం నరేందర్ రెడ్డి పిటిషన్‌పై హైకోర్టు తీర్పు రిజర్వ్ చేసింది.
కాగా, వికారాబాద్ జిల్లా కొడంగల్ నియోజకవర్గ పరిధిలోని లగచర్లలో ఇండస్ట్రియల్ కారిడార్ ఏర్పాటుపై ప్రజాభిప్రాయం స్వీకరించేందుకు వెళ్లిన జిల్లా కలెక్టర్ ప్రతీక్ జైన్, ఇతర అధికారులపై గ్రామస్తులు దాడి చేశారు. రాష్ట్రంలో తీవ్ర దుమారం రేపిన ఈ ఘటనలో పోలీసులు కేసు నమోదు చేశారు. మాజీ ఎమ్మెల్యే పట్నం నరేంద్ రెడ్డిని ఏ1గా, బీఆర్ఎస్ కార్యకర్త భోగమోని సురేష్ను ఏ2 నిందితులుగా చేర్చారు. ఈ కేసులో అరెస్ట్ అయిన పట్నం నరేందర్ రెడ్డి జ్యుడిషియల్ రిమాండ్ లో భాగంగా ప్రస్తుతం చర్లపల్లి జైల్లో ఉన్నారు.
