మొదటి భార్యను చంపి ఇంట్లోనే పూడ్చిపెట్టిన భర్త

• ఒక హత్యను కప్పి పుచ్చి మరో హత్య
• మొదటి భార్యను ఇంట్లోనే పూడ్చిపెట్టిన సైకో భర్త
• రెండే భార్యను చంపాక బయటపడ్డ విషయం

వరంగల్ క్రైం, వెలుగు: ప్రేమించి పెళ్లి చేసుకుని ఇద్దరు భార్యలను ఓ భర్త దారుణంగా హత్య చేశాడు. మొదటి భార్యను ఇంట్లోనే పాతి పెట్టి ఎవరికీ అనుమానం రాకుండా విడాకుల డ్రామా ఆడాడు. ఇవేం చెప్పకుండా ఇంకో పెళ్లి చేసుకున్నాడు. కట్నం కోసం గొడవపడి రెండో భార్యనూ చంపేశాడు. ఇప్పటి మర్డర్​కేసు విచారణలో ఏడేండ్ల కింద జరిగిన హత్య విషయం బయటపడింది. వరంగల్​ఈస్ట్​ జోన్​ డీసీపీ వెంకటలక్ష్మి తెలిపిన వివరాల ప్రకారం.. వరంగల్ రూరల్ జిల్లా పర్వతగిరి మండలం ఏనుగల్లు గ్రామానికి చెందిన కర్లె కిరణ్​పదో తరగతి వరకు చదువుకున్నాడు. ఇంటి వద్దే ఉంటూ తల్లిదండ్రులతో తరచూ గొడవ పడుతుండటంతో తల్లిదండ్రులు అతన్ని వదిలి కొన్నేళ్ల కింద మహబూబాబాద్ వెళ్లిపోయారు. 2019లో హుజూరాబాద్ మండలం సాధిరెడ్డిపేటలో ఏఎన్ఎంగా పనిచేస్తున్న వరంగల్​అర్బన్ జిల్లా కమలాపూర్​ మండలం ఉప్పల్​కి చెందిన అంజలిని ప్రేమించి పెళ్లి చేసుకున్నాడు. కట్నకానుకలు ఏం తీసుకోకుండా అత్త గారింట్లోనే ఉంటున్నాడు. పెళ్లయిన 3 నెలల తరువాత కట్నం కావాలంటూ అంజలిని వేధించడం స్టార్ట్​చేశాడు. ఇతరులతో చనువుగా ఉంటోందని ఆమెపై అనుమానం పెంచుకున్నాడు. ఈ విషయంలో అంజలి, కిరణ్​ మధ్య తరచూ గొడవలు జరుగుతుండేవి. దీంతో అంజలి తల్లిదండ్రులు కొంత మొత్తాన్ని కట్నంగా ఇచ్చారు. ఆ తర్వాత ఇల్లు అమ్మి ఇంకా డబ్బు ఇవ్వాలని డిమాండ్​చేశాడు. ఈ క్రమంలోనే కాపురాన్ని ఏనుగల్లుకు మార్చాడు. అక్కడికి వెళ్లినప్పటి నుంచి అంజలిని వేధించడం మొదలుపెట్టాడు. ఈ నెల12న రాత్రి భోజనం చేసిన తరువాత భార్యాభర్తలు మరోసారి గొడవపడ్డారు. కోపంలో అంజలి తలపై కర్రతో కొట్టడంతో తీవ్రంగా గాయపడి స్పృహ కోల్పోయింది. స్థానికులు ఆమెను వరంగల్ ఎంజీఎంకు తరలించారు. చికిత్స పొందుతూ ఈ నెల 14న చనిపోయింది.

ఏడేండ్ల క్రితం..
అంజలి చనిపోయాక కేసు నమోదు చేసిన పర్వతగిరి పోలీసులు కిరణ్ ను అదుపులోకి తీసుకుని విచారించగా ఊహించని నిజాలు బయటపడ్డాయి. ఏడేండ్ల కింద జరిగిన మర్డర్ విషయం వెలుగులోకి వచ్చింది. కిరణ్​2013లోనే  సంగెం మండలం గవిచర్ల గ్రామానికి చెందిన చిలువేరు పద్మను ప్రేమించి పెళ్లి చేసుకున్నాడు. పెళ్లి తరువాత ఏనుగల్లులో ఏడాదిపాటు కాపురం చేశాడు. ఈ క్రమంలో పద్మ వేరే వ్యక్తితో అక్రమ సంబంధం పెట్టుకుందనే అనుమానంతో ఆమెను వేధించడం మొదలుపెట్టాడు. 2014లో ఇద్దరి మధ్య గొడవ జరగడంతో ఆమెను తీవ్రంగా కొట్టి చంపేశాడు. డెడ్​బాడీని కాపురం ఉంటున్న ఇంటిలోనే పూడ్చి పెట్టాడు. ఆ తరువాత కొద్దిరోజులు ఇల్లు విడిచి వెళ్లిపోయాడు. కొన్నిరోజులకు తిరిగొచ్చాడు. స్థానికులు పద్మ గురించి అడుగుతుండడంతో ఆమెకు విడాకులు ఇచ్చినట్లు అందరికీ చెప్పుకొచ్చాడు. ఆ తరువాత 2019లో అంజలిని పెళ్లి చేసుకుని ఆమెనూ మర్డర్ చేశాడు. ఇద్దరు భార్యలను హింసిస్తూ సెల్​ ఫోన్​లో రికార్డ్ చేసి పైశాచిక ఆనందం పొందేవాడని పోలీసుల విచారణలో తేలింది. కేసును ఛేదించిన మామూనూర్ ఏసీపీ నరేష్ కుమార్, పర్వతగిరి --సీఐ  కిషన్,  ప్రొబేషనరీ ఎస్సై రాజేందర్, ఏఎస్సై సత్యనారాయణ, హెడ్ కానిస్టేబుళ్లు రమేష్, వెంకట్రాం, కానిస్టేబుళ్లు రాజ్​కుమార్, నాగరాజు, రమణ, లింగమూర్తి రాజశేఖర్​, శ్రీనివాస్, సైబర్ క్రైం- కానిస్టేబుల్ కిశోర్​ను వరంగల్ సీపీ డా.తరుణ్ జోషి అభినందించారు.