- డంపింగ్ యార్డులో పడేసి మిస్సయిందని కంప్లయింట్
- కూతురు ఫిర్యాదుతో వెలుగులోకి...
జడ్చర్ల, వెలుగు : మహబూబ్నగర్ జిల్లా జడ్చర్ల మండలం కిష్టారం గ్రామానికి చెందిన ఓ భర్త తన అత్తమామలకు సంబంధించిన ఆస్తిలో వాటా ఇవ్వడానికి భార్య ఒప్పుకోవడం లేదని చంపేశాడు. కిష్టారం గ్రామానికి చెందిన బియని అనిత (45)కు చెల్లె, ఇద్దరు తమ్ముళ్లున్నారు. ఓ తమ్ముడికి తన పెద్ద బిడ్డ శ్వేతను ఇచ్చి పెండ్లి చేసింది. తల్లిదండ్రుల ఆస్తిని అనిత చెల్లెతో పాటు మరో ఇద్దరు తమ్ముళ్లు పంచుకుని ఆమెకు వాటా ఇవ్వలేదు.
ఈ విషయంలో తనకు అభ్యంతరం లేదని అనిత చెప్పింది. అనిత భర్త జంగిరెడ్డి పంచాయితీ పెట్టించి అనిత ఫ్యామిలీ ప్రాపర్టీలో తనకు వాటా ఇవ్వాల్సిందేనని పట్టుబట్టాడు. దీనికి అనిత సపోర్ట్ చేయకపోవడంతో.. కోపం పెంచుకున్న జంగిరెడ్డి భార్య అనితను చంపేందుకు ప్లాన్ చేశాడు. ఈ నెల16న గంగాపూర్ చెన్నకేశవస్వామి టెంపుల్కు భార్యను వెంటబెట్టుకు వెళ్లాడు. తిరిగి వచ్చేటప్పుడు పోలేపల్లి శివారులోని లెదర్పార్క్సమీపంలోని ఓ గుంత వద్దకు తీసుకెళ్లాడు. అక్కడే ఉన్న వైరుతో గొంతుకు బిగించి హత్య చేయబోగా, కుక్కలు అరుస్తూ వెంటపడగా ప్రయత్నాన్ని విరమించుకున్నాడు.
విషయాన్ని అనిత తన పెద్ద కూతురు శ్వేతకు ఫోన్చేసి చెప్పింది. జంగిరెడ్డిని ఆమె ప్రశ్నించింది. దీంతో ‘ జోక్ చేసిన బిడ్డా...నేను మీ అమ్మను చంపుతాన్రా’ అని బుకాయించాడు. మళ్లీ ఈ నెల 17న అనితను పోలేపల్లి లెదర్పార్క్సమీపంలోకి తీసుకువెళ్లి అక్కడే వైరుతో గొంతు పిసికి చంపాడు. డెడ్బాడీని డంపింగ్యార్డులో పడేశాడు. అదే రోజు అనితను కూతురు వద్దకు వెళ్లమని చెప్పానని, కానీ, వెళ్లలేదని నమ్మించే ప్రయత్నం చేశాడు. భార్య కనిపించడం లేదని 20న పోలీసులకు ఫిర్యాదు చేశాడు. బిడ్డ శ్వేతకు అనుమానం రావడంతో కంప్లయింట్ఇవ్వగా పోలీసులు విచారించారు. దీంతో నేరం ఒప్పుకున్నాడు. డెడ్బాడీని పోస్ట్మార్టం కోసం జడ్చర్ల దవాఖానకు తరలించామని టౌన్ సీఐ ఆదిరెడ్డి చెప్పారు.
