తెలంగాణ రాష్ట్ర చరిత్రను పరిశీలిస్తే, ప్రజాస్వామిక ఉద్యమాలు, సామాజిక న్యాయం కోసం పోరాటాలు ఈ ప్రాంతానికి కొత్తవి కావు. తెలంగాణ ప్రత్యేక రాష్ట్ర ఉద్యమం, కమ్యూనిస్టు ఉద్యమాలు, నిజాం వ్యతిరేక పోరాటం.. ఇలా ఎన్నో ఉద్యమాల్లో బీసీ వర్గం కీలక పాత్ర పోషించింది. కానీ, రాజకీయ అధికారంలో మాత్రం బీసీలకు సముచిత స్థానం దక్కలేదు. ఇప్పుడు తెలంగాణలో బీసీ రాజ్యాధికార ఉద్యమం నూతన శక్తిని సంతరించుకుంటోంది. ముఖ్యంగా ఈడబ్ల్యూఎస్ కోటాపై వ్యతిరేకత, స్థానిక సంస్థల్లో 42% రిజర్వేషన్ డిమాండ్, కులగణన తప్పిదాలపై ఆగ్రహం, ఇవన్నీ బీసీ వర్గాన్ని ఐక్యంగా ముందుకు నడిపిస్తున్న అంశాలుగా మారాయి.
ఇటీవల ఉవ్వెత్తున సాగుతున్న బీసీ
నినాదానికి ఎమ్మెల్సీ ఎన్నికలు ఒక అగ్ని పరీక్షగా మారాయి. ఈ ఎన్నికల ఫలితాలు బీసీ ఉద్యమానికి కొత్త దిశను నిర్దేశించనున్నాయి. ఈడబ్ల్యూఎస్ (Economically Weaker Sections) కోటా అమలు ప్రస్తుతం బీసీ వర్గంలో తీవ్రమైన అసంతృప్తికి దారితీస్తోంది. ఆర్థికంగా బలమైన వర్గాలకు అదనపు రిజర్వేషన్ లభించడంతో, ఇప్పటికే ఉన్న బీసీ కోటా ప్రభావితమవుతోంది.
ఇది సామాజిక న్యాయానికి వ్యతిరేకమని, వాస్తవికంగా ఈ కోటా వలన బీసీలకు నష్టం జరుగుతోందని ఉద్యమకారులు భావిస్తున్నారు. ఈ కోటాను రద్దు చేయాలని బీసీ వర్గం గట్టిగా డిమాండ్ చేస్తోంది.
తెలంగాణలో స్థానిక సంస్థల్లో బీసీలకు 42% రిజర్వేషన్ ఇవ్వాలని బీసీ వర్గం తీవ్రంగా కోరుతోంది. బీసీలు ఓటు బ్యాంక్ మాత్రమే కాకుండా, పాలనా అధికారంలో భాగస్వామ్యం కలిగి ఉండాలనే నినాదం బలపడుతోంది. స్థానిక సంస్థల్లో బీసీ నేతలకు అధికారాన్ని అప్పగిస్తేనే, రాష్ట్ర స్థాయిలో బీసీ ముఖ్యమంత్రి రావడానికి మార్గం సుగమమవుతుంది. ప్రస్తుత ప్రభుత్వాలు బీసీల డిమాండ్లను విస్మరిస్తూ, తాత్కాలిక రాజకీయం నడిపిస్తున్నాయని విమర్శలు వెల్లువెత్తుతున్నాయి.
కులగణన.. బీసీలకు వ్యతిరేకంగా జరుగుతోందా?
ఇటీవల తెలంగాణ ప్రభుత్వం చేపట్టిన కులగణన ప్రక్రియలో తప్పుడు గణనలు వచ్చాయని, బీసీ వర్గం తీవ్రంగా ఆందోళన వ్యక్తం చేస్తోంది. తెలంగాణలో బీసీల జనాభా గణనపరంగా తక్కువగా చూపే ప్రయత్నం జరిగినట్లు ఆరోపణలు ఉన్నాయి. ఇది బీసీల రాజకీయ ప్రాబల్యాన్ని తగ్గించడానికి చేసిన వ్యూహమనే అనుమానాలు వ్యక్తమవుతున్నాయి. కులగణనను సరైన పద్ధతిలో నిర్వహించాలని బీసీలు డిమాండ్ చేస్తున్నారు.
ఎమ్మెల్సీ ఎన్నికలు - బీసీలకు అగ్ని పరీక్ష
ప్రస్తుతం జరుగుతున్న ఎమ్మెల్సీ ఎన్నికలు బీసీ రాజకీయ భవిష్యత్తును నిర్దేశించే కీలకమైన ఘట్టంగా మారాయి. ఈ ఎన్నికల ఫలితాలు బీసీ ముఖ్యమంత్రి పదవికి మార్గదర్శిగా నిలవబోతున్నాయి. ఈసారి తెలంగాణ ఎమ్మెల్సీ ఎన్నికలు బీసీ రాజకీయ చైతన్యాన్ని పరీక్షించబోతున్నాయి. ఒకటి పట్టభద్రుల నియోజకవర్గం, మరో రెండు టీచర్ నియోజకవర్గాలు. విద్యావంతులు, పట్టభద్రులు, ఉపాధ్యాయులు ఆలోచించి బీసీ అభ్యర్థులను గెలిపిస్తే, ఇది తెలంగాణ రాజకీయాలకు కొత్త దిశను అందించగలదు.
ఈ ఎన్నికలు బీసీ రాజ్యాధికార ఉద్యమానికి ఒక మైలురాయి కావొచ్చు. తెలంగాణ ప్రత్యేక రాష్ట్ర ఉద్యమాన్ని విజయవంతం చేసేందుకు బీసీలు అహర్నిశలు శ్రమించారు. పార్టీలను పక్కన పెట్టి, తెలంగాణవాదాన్ని ముందుకు తీసుకెళ్లారు. రాజీనామాలు చేసిన ప్రతిసారి, తెలంగాణ వాదాన్ని ప్రజలు విశ్వాసంతో గెలిపించారు. అది సాధ్యపడినట్లే, బీసీ నినాదం కూడా ఇప్పుడు విజయం సాధించాలి.
ఎమ్మెల్సీ ఎన్నికలు.. బీసీ ముఖ్యమంత్రికి బాట
ఎమ్మెల్సీ ఎన్నికల్లో బీసీ అభ్యర్థులు గెలిస్తే, ఇది తెలంగాణ రాజకీయాల్లో నూతన శకానికి నాంది పలుకుతుంది. కొన్ని దశాబ్దాలుగా బీసీలు కోరుకుంటున్న బీసీ ముఖ్యమంత్రి స్థానం మరింత చేరువవుతుంది. బీసీలు విభజించకుండా, ఐక్యంగా ముందుకు సాగితేనే అధికారంలో చేరగలుగుతారు.
తెలంగాణలో బీసీ రాజ్యాధికార ఉద్యమం ఇప్పుడు ఓ ముఖ్య ఘట్టానికి చేరుకుంది. ఈడబ్యూఎస్ కోటా వ్యతిరేక పోరాటం, 42% రిజర్వేషన్ డిమాండ్, కులగణనలో తప్పిదాలపై నిరసనలు.. ఇవి అన్నీ బీసీ వర్గాన్ని మళ్లీ ఉద్యమం వైపు నడిపిస్తున్నాయి. ఈ ఉద్యమానికి ఎమ్మెల్సీ ఎన్నికలు ఒక టెస్టు. విద్యావంతులు, ఉపాధ్యాయులు, పట్టభద్రులు ఈసారి బీసీ ఐక్యతను చూపిస్తే, తెలంగాణలో బీసీ సీఎం కల నిజమయ్యే అవకాశముంది. తెలంగాణ ఉద్యమంలో తెలంగాణవాదం బలహీనపడనీయలేదు, అలాగే బీసీ వాదాన్ని కూడా బలహీనపడనివ్వకూడదు. బీసీ ఐక్యతే బీసీ అధికారానికి మార్గం.
- యర్రమాద వెంకన్న నేత
