నిజామాబాద్, వెలుగు : భూమి కొలతల సర్టిఫికెట్ కోసం రూ.10 వేల లంచం తీసుకుంటూ నిజామాబాద్ జిల్లా సర్వే ల్యాండ్ రికార్డ్స్ ఏడీ (అసిస్టెంట్ డైరెక్టర్) శ్యాంసుందర్ రెడ్డి బుధవారం ఏసీబీకి పట్టుబడ్డారు. ఇదే ఇష్యూకు సంబంధించి ఇదివరకే ముడుపులు తీసుకున్న మరో ఇద్దరు ఉద్యోగులు కూడా అరెస్టయ్యారు. ఏసీబీ డీఎస్పీ ఆనంద్కుమార్ కథనం ప్రకారం..మోర్తాడ్ మండలం ధర్మోరా గ్రామానికి చెందిన రాజేందర్తన ఐదు గుంటల ల్యాండ్లో షెడ్డు వేసుకోవాలనుకున్నాడు. అక్కడి తహసీల్దార్ ఇచ్చిన నాలా కన్వర్షన్ ఆర్డర్ జత చేసి డిమార్కేషన్ సర్టిఫికెట్, లొకేషన్ స్కెచ్ మ్యాప్ కోసం జిల్లా కేంద్రంలోని ఏడీ ఆఫీసులో దరఖాస్తు చేసుకున్నారు.
వాటిని ఇవ్వడానికి ఏడీ శ్యాంసుందర్రెడ్డి రూ.10 వేల లంచం డిమాండ్ చేసి తిప్పించుకుంటున్నాడు. ఈనెల19న రాజేందర్ నుంచి ఫైల్ మూవ్మెంట్ కోసమంటూ ఆఫీస్ సూపరింటెండెంట్వెంకటేశ్ రూ.3 వేలు, జూనియర్ అసిస్టెంట్ రహీమా రూ.2 వేలు లంచం తీసుకున్నారు. ఏడీ కూడా లంచం అడుగుతుండడంతో రాజేందర్ఏసీబీ అధికారులను కలిశాడు. వారి సూచన మేరకు ఏడీకి లంచం ఇవ్వగా ఏసీబీ అధికారులు రైడ్ చేసి డబ్బులను ఆఫీసులోని టేబుల్ డెస్క్నుంచి స్వాధీనం చేసుకున్నారు. ముగ్గురిని కరీంనగర్ కోర్టుకు తరలిస్తామని డీఎస్పీ తెలిపారు. ఏసీబీ సీఐలు శ్రీనివాస్,నగేశ్, సిబ్బంది ఉన్నారు.
