బిల్డింగ్ను మెడికల్ కాలేజీకి అప్పగించిన ఆఫీసర్లు
భద్రాద్రికొత్తగూడెం, వెలుగు: భద్రాద్రికొత్తగూడెం జిల్లాకు మెడికల్, నర్సింగ్ కాలేజీలు మంజూరు చేస్తున్నామని సీఎం కేసీఆర్తో పాటు హెల్త్ మినిస్టర్ హరీశ్రావు ప్రకటించారు. దీంతో టీఆర్ఎస్ లీడర్లు గత ఏడాది జిల్లావ్యాప్తంగా కేసీఆర్ ఫొటోలకు క్షీరాభిషేకం చేశారు. పటాకులు కాల్చి సంబరాలు చేసుకున్నారు. కాలేజీ మంజూరై ఏడాది దాటుతున్నా ఈ సారి అడ్మిషన్లు ఉంటాయో లేదో స్పష్టత లేకుండా పోయింది. నర్సింగ్ కాలేజీ కోసం రూ. 48 కోట్లు మంజూరు చేసినట్లు ప్రభుత్వం ప్రకటించింది. ఆర్అండ్బీ అధికారులు నర్సింగ్ కాలేజీ పనులు చేపట్టారు. ఆ తరువాత మెడికల్ కాలేజీకి ఆ బిల్డింగ్ను కేటాయించడంతో నర్సింగ్ కాలేజీ పరిస్థితి ఏమిటనే ప్రశ్న తలెత్తుతోంది.
మెడికల్ కళాశాలకు నర్సింగ్కాలేజీ బిల్డింగ్
జిల్లాలోని పాల్వంచ మైనింగ్ కాలేజీ ఆవరణలో నర్సింగ్, మెడికల్ కాలేజీల నిర్మాణానికి అవసరమైన ల్యాండ్ను అధికారులు ఫైనల్ చేశారు. నర్సింగ్ కాలేజీ నిర్మాణానికి రూ.48 కోట్లు కేటాయించగా, గత ఏడాది పనులను ఆర్అండ్బీ అధికారులు ప్రారంభించారు. నర్సింగ్ కాలేజీ సమీపంలోనే మెడికల్ కాలేజీ నిర్మాణాన్ని చేపడుతున్నట్లు అధికారులు తెలిపారు. నర్సింగ్ కాలేజ్ నిర్మాణ పనులు స్పీడప్ చేశారు. కలెక్టర్ స్వయంగా పనులను పర్యవేక్షించారు. పనులు ముగిసే టైమ్లో మెడికల్ కాలేజీకి ఆ బిల్డింగ్ను అప్పగించారు. దీంతోపాటు కొత్తగూడెంలోని జిల్లా ప్రభుత్వఆసుపత్రిని మెడికల్ కాలేజ్ పరిధిలోకి ప్రభుత్వం తీసుకొచ్చింది. 330 బెడ్స్ హాస్పిటల్గా అప్గ్రేడ్ చేస్తూ అవసరమైన పనులు చేపట్టారు. రెండు సార్లు పరిశీలించిన అనంతరం మెడికల్ కాలేజీకి అనుమతి లభించింది. నీట్ ఫలితాలు కూడా రిలీజ్ కావడంతో మెడికల్ కాలేజీలో ఈ విద్యా సంవత్సరంలో 150 ఎంబీబీఎస్ సీట్ల అడ్మిషన్లకు అధికారులు అన్ని ఏర్పాట్లు చేశారు.
నర్సింగ్ కాలేజీకి పర్మిషన్ రాలె..
బిల్డింగ్ను మెడికల్ కాలేజీకి కేటాయించడంతో నర్సింగ్ కాలేజీ పర్మిషన్ కోసం దరఖాస్తు చేసుకొనే పరిస్థితి లేకుండా పోయింది. మెడికల్ కాలేజీతో పాటు నర్సింగ్ కాలేజీని నడిపించేలా ఉన్నతాధికారులు ప్లాన్ చేస్తున్నప్పటికీ ఈ ఏడాది పర్మిషన్ వచ్చే అవకాశాలు లేనట్లేనని అంటున్నారు. ఈ విద్యా సంవత్సరంలో నర్సింగ్ అడ్మిషన్ల ప్రక్రియను హెల్త్ యూనివర్శిటీ ఇప్పటికే చేపట్టింది. జిల్లాలో ఏర్పాటు చేయనున్న కాలేజీని పరిశీలించేందుకు నర్సింగ్కాలేజ్ ఆఫ్ కౌన్సిల్ నుంచి ఇప్పటి వరకు ఎవరూ రాలేదు. బిల్డింగ్ మెడికల్ కాలేజ్ పరిధిలో ఉండడంతో ఈ ఏడాది అడ్మిషన్లు కష్టమేనని చెబుతున్నారు. ఇదిలాఉంటే నర్సింగ్ కాలేజీకి సంబంధించి కొందరు స్టాఫ్ రావడం గమనార్హం. అధికారులు చొరవ తీసుకొని నర్సింగ్ కాలేజీ పర్మిషన్ కోసం చర్యలు తీసుకోవాలని జిల్లా ప్రజలు కోరుతున్నారు.
