పాలమూరుకు ఐటీ కంపెనీలు రాలే!
టవర్ ప్రారంభించి 50 రోజులైనా ఒక్కటీ తీసుకురాలే...
మహబూబ్నగర్, వెలుగు : వేలాది మందికి ఉపాధి అవకాశాలు కల్పించేందుకు ఏర్పాటు చేశామని సర్కారు చెబుతున్న పాలమూరు ఐటీ టవర్ వెలవెలబోతోంది. ప్రారంభించి నెలన్నరయినా ఇంతవరకు ఒక్క కంపెనీ కూడా రాలేదు. దీంతో కరెంటు సప్లై కూడా నిలిపివేయడంతో ఐటీ టవర్ చీకట్లో మగ్గుతోంది. మహబూబ్నగర్ జిల్లాలో ఐటీ పార్క్ఏర్పాటు కోసం దివిటిపల్లి వద్ద 2018లో 370 ఎకరాలను సేకరించారు. అదే ఏడాది జులైలో ఐటీ శాఖ మంత్రి కేటీఆర్ శంకుస్థాపన చేశారు. ఐదెకరాల్లో రూ.40 కోట్లతో బిల్డింగ్ నిర్మించగా , మే 6వ తేదీన మంత్రులు కేటీఆర్, శ్రీనివాస్ గౌడ్ ప్రారంభించారు. ఓపెన్ చేసి 50 రోజులు దాటినా ఇంతవరకు ఒక్క కంపెనీని కూడా తీసుకురాలేదు. ఇక్కడే స్కిల్ డెవలప్మెంట్ సెంటర్ఏర్పాటు చేస్తామని, స్థానిక నిరుద్యోగులకు కమ్యూనికేషన్, లాంగ్వేజ్, టెక్నికల్ స్కిల్స్పై ట్రైనింగ్ ఇస్తామని చెప్పినా.. అదీ ఏర్పాటు చేయలేదు.
వంద కంపెనీలన్నరు.. ఒక్కటీ రాలే..
ఐటీ టవర్ ఏర్పాటు చేస్తున్నప్పుడు వంద కంపెనీలు వస్తాయని లీడర్లు ప్రకటించారు. టవర్ ప్రారంభం నాటికి కనీసం 13 నుంచి 16 కంపెనీలు వస్తాయని భావించారు. ఇక్కడ బ్రాంచ్లను ఏర్పాటు చేయాలని విదేశీ కంపెనీల ప్రతినిధులతో చర్చిస్తున్నామని, ఒకటిరెండు కంపెనీలు అంగీకరించాయని కూడా మంత్రులు ప్రకటించారు. కానీ, స్థానిక కంపెనీలు కూడా ఇంత వరకు కార్యకలాపాలను ప్రారంభించలేదు.
ALSO READ:కిలో టమాటా రూ.100,,,పచ్చిమిర్చి 120..కొనలేక జనం విలవిల
రాత్రయితే చిమ్మచీకట్లు
ఐటీ టవర్కు కరెంట్సప్లై చేసేందుకు పక్కనే మినీ సబ్స్టేషన్ఏర్పాటు చేశారు. ఐటీ టవర్కు టీఎస్ఐఐసీ 1000 కేవీ కరెంట్కనెక్షన్ తీసుకుంది. టవర్లో ఎలాంటి కార్యకలాపాలు లేకపోవడంతో కరెంటు బంద్ చేశారు. దీంతో రాత్రయితే ఈ ఏరియా అంతా చిమ్మచీకటి కమ్ముకుంటోంది. బోరు ఉన్నా కరెంటు లేకపోవడంతో మొక్కలకు నీళ్లు పట్టడంలేదు. ఫలితంగా అవన్నీ ఎండిపోతున్నాయి. టీఎస్ఐఐసీ ఐటీ టవర్కు 1000 కేవీ విద్యుత్ లైన్ తీసుకున్నారని, కరెంటు ఎందుకు బంద్చేశారన్నది తమకు తెలియదని ట్రాన్స్కో అధికారులు చెప్తున్నారు. ఐటీ టవర్లో ప్రస్తుతం ఏ కంపెనీ లేకపోవడం వల్ల లైట్లు ఆన్ చేయడం లేదని, కరెంట్వృథా అవుతుందనే బంద్ చేశామని టీఎస్ఐఐసీ అధికారులంటున్నారు.
