- పగటిపూట రెక్కీ నిర్వహించి ఇండ్ల గుర్తింపు
- దొంగలను పట్టుకోలేకపోతున్న పోలీసులు
- వంతులవారీగా గస్తీ తిరుగుతున్న యువకులు
నిజామాబాద్, వెలుగు: తాళం వేసి వెళ్లారంటే చాలు దొంగలు ఇళ్లను గుల్ల చేస్తున్నారు. పగటిపూట గల్లీల్లో తిరుగుతున్న దొంగలు తాళాలు వేసిన ఇళ్లను టార్గెట్ చేస్తున్నారు. రాత్రి తాళాలు పగలగొట్టి దొపిడీ చేస్తున్నారు. రకరకాల సామాన్లు అమ్ముతూ.. రిపేర్లు చేస్తామంటూ తిరుగుతున్నవాళ్లే ఈ చోరీలకు పాల్పడుతున్నట్టు గుర్తించినా చోరీలను అరికట్టడంలో పోలీసులు విఫలమవుతున్నారు.
జిల్లావ్యాప్తంగా రోజూ ఏదో మూల దొంగతనాలు జరగడం జనాన్ని కలవరపెడుతోంది. కొన్ని చోరీలు సీసీ కెమెరాలలో రికార్డవుతున్నా ఆ కేసుల్లో కూడా పోలీసులు దొంగలను పట్టుకోలేకపోతున్నారు. ఈ జనవరి నుంచి జులై వరకు జిల్లాలో 200 దొంగతనాలు జరిగాయి. ఈ ఒక్క నెలలోనే జిల్లాలో పెద్ద ఎత్తున చోరీలు జరిగాయి. దొంగతనాలు అరికట్టడానికి పోలీసులు చర్యలు తీసుకోవాలని ప్రజలు కోరుతున్నారు.
ఈనెలలో జరిగిన దొంగతనాలు..
ఈనెల 25న నిజామాబాద్లోని హమాల్వాడీ కాలనీకి చెందిన పెంటయ్య ఫ్యామిలీతో కలిసి ఓ ఫంక్షన్కు వెళ్లాడు. అతని ఇంటి తాళం పగులగొట్టిన దొంగలు 13 తులాల బంగారు ఆభరణాలు ఎత్తుకెళ్లారు. త్రీటౌన్లో పోలీస్ కేసు నమోదైంది. ఈనెల 23న పగటిపూటే ముప్కాల్ మండలంలోని ఇందిరమ్మ కాలనీలో అవుసుల లింబాద్రి ఇంటి తాళాన్ని పగులగొట్టి 25 తులాల బంగారు ఆభరణాలు ఎత్తుకెళ్లారు.
అదే ఊళ్లోఉన్న తన పాత ఇంటికి భార్యతో కలిసి వెళ్లి వచ్చేలోగా దొంగతనం జరిగింది. లింబాద్రి కొడుకులలో ఒకరు పోలీస్ కానిస్టేబుల్కాగా మరొకరు ఆర్మీలో పనిచేస్తున్నారు. ఐడీ పార్టీ పోలీసులు దర్యాప్తు చేస్తున్నారు.
ఈనెల 19న నిజామాబాద్లోని ప్రగతినగర్ ఏరియాలో నివసించే గవర్నమెంట్ టీచర్బందెల శ్రీనివాస్ ఇంట్లో చోరీ జరిగింది. ఆయన, అంగన్వాడీ టీచర్అయిన ఆయన భార్య డ్యూటీలకు వెళ్లారు. శ్రీనివాస్ తల్లి పక్కింటికి వెళ్లి పలుకరించి వచ్చేలోపు లాక్ బ్రేక్ చేసి రూ.4.5 లక్షల నగదు, రెండు తులాల గోల్ట్ పట్టుపోయారు. ఫోర్త్టౌన్లో కేసు రిజిస్టరైంది.
ఈనెల 16 న నందిపేట మండలం వెల్మల్లో తాళం వేసిన మూడు ఇండ్లను టార్గెట్ చేసుకున్న దొంగలు 20 తులాల బంగారు ఆభరణాలు, 20 తులాల వెండి, రూ.10 క్యాష్ ఎత్తుకెళ్లారు. డాగ్ స్క్వాడ్కు ఆనవాళ్లు దొరకుండా దొంగతనం చేసిన ఇండ్ల చుట్టూ కారంపొడి చల్లారు. నందిపేట పోలీసులు కేసు నమోదు చేశారు. ఈ ఘటనతో గ్రామ యువకులు వంతుల వారీగా రాత్రిపూట గస్తీ తిరుగుతున్నారు.
17న మెండోరా మండల కేంద్రంలో కాలినడక వెళ్తున్న మహిళ మెడలో నుంచి చైన్ స్నాచర్లు తులంన్నర బంగారు గొలుసు లాక్కెళ్లారు.14 తేదిన నిజామాబాద్లోని ముబారక్నగర్లో కారులో వచ్చిన ముగ్గురు దొంగలు కళావతి, మరో గవర్నమెంట్ఎంప్లాయి ఇళ్లలో సుమారు రూ.లక్ష నగదు ఎత్తుకెళ్లారు. రూరల్ పోలీసులు కేసు నమోదు చేశారు. హైదరాబాద్లో దొంగిలించిన కారులో వచ్చి ఇక్కడ ఇండ్ల తాళాలు పగులగొట్టి దొంగతనం చేశారు. సిటీలోని వినాయక్నగర్లో వెంకట్ అనే వ్యక్తి భార్యతో కలిసి వేములవాడ దైవదర్శనానికి వెళ్లగా ఈనెల 13న దొంగలు ఆయన ఇంటి తాళం పగులగొట్టి ఏడు తులాల గోల్డ్ పట్టుకుపోయారు. 4 తారీకు సీతారాంనగర్ కాలనీలో వెంకటేశ్వర్లు అనే వ్యక్తి ఇంట్లో దొంగతనం జరిగింది.
విలువైన వస్తువులు బ్యాంకులో దాచుకోవాలి
సెల్ఫోన్, తదితర వస్తువుల రిపేర్ చేస్తామని, పాతసామాన్లు కొంటామని కాలనీలలో తిరిగే అనుమానాస్పద వ్యక్తుల గురించి పోలీసులకు సమాచారం ఇవ్వాలి. ఇంటికి లాక్ వేసి బయటకు కానబడకుండా దానిపై డోర్ స్క్రీన్ కప్పాలి. అన్నింటికి మించి విలువైన బంగారు ఆభరణాలను బ్యాంకులో భద్రపర్చుకోవడం మంచిది.
- బస్వారెడ్డి, ఏసీపీ, ఆర్మూర్
