- ఆగస్టు నాటికి నియోజకవర్గాలకు చేరనున్న ఎలక్షన్ మనీ?
- టోల్గేట్లు, నియోజకవర్గ సరిహద్దు మండలాల్లో గట్టి నిఘా
- పార్టీలో కోవర్టుల కదలికల పైన గురి
- మునుగోడు బైపోల్ ఎపిసోడ్తో అధికారుల్లో టెన్షన్
నల్గొండ, వెలుగు; ఎన్నికల వేడి మొదలవడంతో నల్గొండ జిల్లాలో బదిలీల పర్వం షురూ అయ్యింది. ఎమ్మెల్యేలు తమకు అనుకూలమైన ఆఫీసర్లను ఏరికోరి మరీ పోస్టింగ్లు ఇప్పించుకుంటున్నారు. ఎన్నికలకు ఇంకా నాలుగైదు నెలలు ఉండటంతో ఇప్పటి నుంచే తమ వ్యూహానికి పదును పెట్టారు. మునుగోడు బైపోల్లో పనిచేసిన తహసీల్దార్లు, ఎంపీడీఓలు, ఎస్ఐలను తిరిగి వాళ్ల పాత స్థానాల్లో నియమించారు. తాజాగా నల్గొండ ఆర్డీఓ జయచంద్రారెడ్డి బదిలీ కాగా, లాంగ్స్టాండింగ్ కారణంగా దేవరకొండ ఆర్డీఓ గోపీరాం ట్రాన్స్ఫర్ అయ్యారు.
పోలీస్, రెవెన్యూ డిపార్ట్మెంట్లో లోపాయికారిగా నెల రోజుల నుంచి జరుగుతున్న బదిలీల ప్రక్రియ ఇటీవల మరింత స్పీడప్ అయ్యింది. ఎన్నికల టైంలో తమకు నమ్మకస్తులుగా పనిచేస్తారనుకునే ఆఫీసర్లను ఎంపిక చేసి పోస్టింగ్లు ఇప్పిస్తున్నారు. ఇందులో భాగంగా పలు సా మాజిక వర్గాలకు ప్రయారిటీ ఇస్తున్నారు. పార్టీలో గ్రూపు తగాదాలు అధికంగా ఉన్న నల్గొండ, నాగార్జునసాగర్, నకిరేకల్, మునుగోడు నియోజకవర్గాల్లో బదిలీలు రాజకీయంగా మరింత వేడిపుట్టిస్తున్నాయి. కోవర్టు లీడర్ల కదలికలపైన ఎమ్మెల్యేలు గురిపెట్టారు.
ఎస్ఐలు, తహసీల్దార్లు బదిలీ..
కేతేపల్లి, చిట్యాల, తిప్పర్తి మండలాల ఎస్ఐలను సోమవారం బదిలీ చేశారు. నాలుగు నెలల కిందే సూర్యాపేట జిల్లా నుంచి తిప్పర్తి మండ లానికి వచ్చిన ఎస్ఐ రవిని చిట్యాలకు ట్రాన్స్ఫర్ చేశారు. చిట్యాలలో పనిచేస్తున్న ఎస్ఐ ఎన్. ధర్మాను తిప్పర్తికి బదిలీ చేశారు. పెన్పహాడ్లో పనిచేసిన శ్రీకాంత్గౌడ్ను కేతేపల్లి పీఎస్కు, అక్కడ పని చేస్తున్న అనిల్ రెడ్డిని సూర్యాపేట జిల్లా అనంతగిరి మండలానికి ట్రాన్స్ఫర్ చేశారు. ప్రస్తుతం వీఆర్లో ఉన్న ఓ ఎస్ఐని త్వరలో కట్టంగూరుకు బదిలీ చేసే ప్రయత్నాలు జరుగుతున్నాయి. కొద్దిరోజుల కింద కట్టంగూరు, చిట్యాల మండలాలకు కొత్త తహసీల్దార్లు వచ్చారు. రాజకీయ విభేదాల వల్ల నాగార్జునసాగర్ సీఐని బదిలీ చేసినట్లు తెలిసింది. మర్రిగూడ, నాంపల్లి మండలాల్లో కూడా పలువురు ఆఫీసర్లను మార్చే అవకాశాలు ఉన్నట్లు సమాచారం.
డెడ్లైన్ ఆగస్టు
ఎన్నికల బదిలీలకు ఆగస్టు డెడ్లైన్ పెట్టినట్లు తెలుస్తోంది. సెప్టెంబర్ నుంచి ఎన్నికల వాతావరణం మరింత వేడెక్కనుంది. ఆగస్టు నాటికి ఎన్నికలకు ఖర్చుపెట్టే డబ్బంతా నియోజకవర్గాలకు చేరేలా అధిష్టానం పక్కాప్లాన్ చేసినట్లు సమాచారం. దీంతో టోల్గేట్లు, నియోజకవర్గ సరిహద్దు మండలా ల్లో బలమైన ఆఫీసర్లను రంగంలోకి దింపాలని ఎమ్మెల్యేలు పక్కా స్కెచ్ వేశారు.
అధికారుల్లో మునుగోడు టెన్షన్!
ఎన్నికల విధుల్లో పాల్గొనే అధికారులకు మునుగోడు టెన్షన్ పట్టుకుంది. పార్టీ సింబల్ మార్పు వివాదంలో ఎన్నికల రిటర్నింగ్ అధికారి, నల్గొండ ఆర్డీవో జగన్నాథరావు సస్పెండ్ అయ్యారు. ఆయన పోస్టింగ్ వ్యవహారం ఇప్పటికీ వివాదస్పదంగానే ఉంది. దీంతో వచ్చే ఎన్నికల్లో ఎమ్మెల్యేలు చెప్పిందల్లా చేయాల్సి వస్తే తమ భవిష్యత్తు ఎట్లా ఉంటదనే దాని పైన భయపడుతున్నారు. ఇప్పటికైతే నచ్చిన ప్లేస్లోకి బదిలీ అవుతున్నా ఆ తర్వాత ఎదురయ్యే పరిణామాల పైనే అధికారులు టెన్షన్ పడుతున్నారు.
