గోవా–కర్నాటక సరిహద్దుల్లోని ఫేమస్ దూద్ సాగర్ జలపాతం చూసేందుకు వెళ్లిన ట్రెక్కర్లతో రైల్వే పోలీసులు గుంజీలు తీయించారు. ముందు స్టేషన్లోనే దిగి రైల్వే ట్రాక్ వెంట నడిచి వెళుతుండగా ఆపి ఈ శిక్ష విధించారు. కొన్ని రోజులుగా వర్షాలు కురుస్తుండడంతో దూద్ సాగర్ జలపాతం చూసేందుకు పర్యాటకులు పోటెత్తుతున్నారు. కర్నాటకలోని బెంగళూరు, మంగళూరు, బెళగావి, ఉత్తర కన్నడ, హుబ్బళ్లి, ధార్వాడ, బాగల్ కోట్లతో పాటు మహారాష్ట్రలోని పుణె నుంచి భారీ సంఖ్యలో తరలివెళ్తున్నారు. దక్షిణ గోవాలోని కొల్లమ్ స్టేషన్ లో దిగిన తర్వాత పర్యాటకులు దూద్ సాగర్ జలపాతానికి చేరుకునేందుకు రైల్వే ట్రాక్ల వెంట నడుస్తున్నారు. దీంతో ట్రాక్ పై వచ్చే రైళ్లకు అంతరాయం కలుగుతున్నది. ఈ నేపథ్యంలో ట్రాక్ లపై, ట్రాక్ ల వెంట పర్యాటకులు నడవకూడదని అధికారులు ఆంక్షలు విధించారు. అతిక్రమించి నడిచిన వారిని పట్టుకుని ఇలా గుంజీలు తీయించారు.
