- వడ్డీరేట్లు తక్కువ ఉండటమే కారణం
- ఈ మార్కెట్లో ఎన్బీఎఫ్సీలదే హవా
న్యూఢిల్లీ: తక్కువ వడ్డీ, తక్కువ సమయంలో నగదు చేతికి రావడం వల్ల మనదేశంలో గోల్డ్ లోన్లకు డిమాండ్ బాగా పెరుగుతోంది. ధరల పెరుగుదల, బ్యాంకులు, ఎన్బీఎఫ్సీల మధ్య పోటీ వల్ల కూడా తక్కువ వడ్డీకి ఇవి లభిస్తున్నాయి. క్రిసిల్ రేటింగ్స్ నివేదిక ప్రకారం, మే 2024తో పోలిస్తే జూన్ 2024లో గోల్డ్ లోన్ డిమాండ్ 20శాతం పెరిగింది. అంతకుముందు క్వార్టర్తో పోలిస్తే జూన్ క్వార్టర్ జారీ అయిన లోన్ల సంఖ్య 12 శాతం ఎక్కువగా ఉంది.
నాన్-–బ్యాంకింగ్ ఫైనాన్షియల్ కంపెనీలు (ఎన్బీఎఫ్సీలు) ఈ మార్కెట్లో ఆధిపత్యం చెలాయిస్తున్నాయి. నిర్వహణలో ఉన్న మొత్తం ఆస్తులలో (ఏయూఎంలో) 90శాతం వాటా వీటిదే ఉంది. ఈ ఎన్బీఎఫ్సీలు 60–-65శాతం లోన్- టు-వాల్యూ (ఎల్టీవీ) ఇస్తుండటంతో ఎక్కువ మంది వీటి దగ్గర బంగారాన్ని కుదువ పెడుతున్నారు. అంటే బంగారం విలువలో ఇవి 65 శాతం వరకు అప్పు ఇస్తున్నాయి. గోల్డ్ లోన్ ధరలు పెరగడం వల్ల బంగారం రుణాలు మరింత ఆకర్షణీయంగా మారాయి. ఎల్టీవీ నిష్పత్తి 2012లో 60శాతం నుంచి ప్రస్తుతం 75శాతానికి పెరిగింది. బంగారం అధిక విలువను ఇది ప్రతిబింబిస్తుంది.
వడ్డీరేట్లు ఇలా...
మనదేశంలో ఎస్బీఐ అత్యల్పంగా 8.70 శాతం వడ్డీని మాత్రమే తీసుకుంటోంది. ఈ రేటు రూ.20 వేల నుంచి రూ.50 లక్షల వరకు ఉన్న రుణాలకు వర్తిస్తుంది. చెల్లింపు గడువును 36 నెలల వరకు పొడిగించుకోవచ్చు.సెంట్రల్ బ్యాంక్ ఆఫ్ ఇండియా రేట్లు 8.45శాతం నుంచి 8.55శాతం మధ్య ఉన్నాయి. ఇండియన్ బ్యాంక్ రేట్లు 8.65శాతం నుంచి 10.40శాతం వరకు ఉన్నాయి. యాక్సిస్ బ్యాంక్, ఇండియా ఇన్ఫోలైన్ వంటివి 17 శాతం వరకు వసూలు చేస్తున్నాయి. ఈ రేట్లు ఎక్కువగా ఉన్నప్పటికీ, ఎల్టీవీ వంటివి అధికంగా ఉండవచ్చు. చాలా మంది ప్రొవైడర్‌‌‌‌‌‌‌‌లు తక్కువ రూ.1,000 నుంచి గరిష్టంగా రూ.1.5 కోట్ల వరకు అప్పులు ఇస్తున్నారు. ఎల్టీవీ నిష్పత్తి ఎక్కువగా ఇవ్వడం, తక్కువ ప్రాసెసింగ్ ఫీజు తీసుకోవడం, ముందస్తు చెల్లింపు చార్జీలను వసూలు చేయకపోవడం వంటి ఫీచర్లు ఉన్న లెండర్ నుంచి అప్పులు తీసుకోవడం మంచిదని ఎనలిస్టులు చెబుతున్నారు.
