- 2014లో బీఆర్ఎస్లో 12 మంది ఎమ్మెల్యేలతో టీడీపీఎల్పీ విలీనం
- అదే ఏడాది ఐదుగురు కాంగ్రెస్ ఎమ్మెల్యేలను చేర్చుకున్న కేసీఆర్
- 2019లో 12 మందిని చేర్చుకొని సీఎల్పీని కలిపేసుకున్న గులాబీ పార్టీ
- నాడు చేరికలను ప్రోత్సహించి నేడు గగ్గోలు
- అప్పుడు మీరు చేసిందేమిటని కౌంటర్ ఇస్తున్న కాంగ్రెస్, సీపీఐ నేతలు
హైదరాబాద్, వెలుగు: రాష్ట్రంలో చేరికల సీన్ రిపీట్అవుతోంది. 2014, 2018 ఎన్నికల తర్వాత బీఆర్ఎస్కు సరిపడా మెజార్టీ ఉన్నప్పటికీ ప్రతిపక్ష పార్టీలను చీల్చడం ద్వారా ఎమ్మెల్యేల చేరికలను ఆ పార్టీ చీఫ్ కేసీఆర్ ప్రోత్సహించారు. ప్రతిపక్షాల ఉనికే లేకుండా చేయాలనే ఉద్దేశంతో మొదటిసారి టీడీపీ ఎల్పీని, రెండోసారి కాంగ్రెస్ఎల్పీని బీఆర్ఎస్లో విలీనం చేసుకున్నారు. దీనిపై అప్పట్లో తీవ్ర విమర్శలు రాగా, రాజకీయ పునరేకీకరణ అంటూ కేసీఆర్సహా బీఆర్ఎస్ లీడర్లు సమర్థించుకున్నారు. తెలంగాణ అభివృద్ధి కోసం, నేతల రాజకీయ భవిష్యత్తు కోసం వచ్చేవాళ్లను ఎలా కాదంటామని ఎదురు ప్రశ్నించారు. తీరా గత అసెంబ్లీ ఎన్నికల్లో ఓడిపోయిన బీఆర్ఎస్ ప్రతిపక్షానికే పరిమితం కావడం.. లోక్సభ ఎన్నికల్లో ఒక్క సీటూ గెలుచుకోకపోవడంతో రాజకీయ భవిష్యత్తు కోసం ఆ పార్టీ ఎమ్మెల్యేలు కాంగ్రెస్లో చేరుతున్నారు.
గతంలో ఇతర పార్టీల నుంచి ఎమ్మెల్యేలను చేర్చుకోవడాన్ని సమర్థించుకున్న బీఆర్ఎస్ నేతలే.. ఇప్పుడు కాంగ్రెస్తీరును తప్పుపడుతున్నారు. కాంగ్రెస్చర్య రాజ్యాంగ విరుద్ధమని, న్యాయం కోసం సుప్రీంకోర్టు దాకా వెళ్తామని మాట్లాడుతున్నారు.
2014లో టీడీపీ ఎల్పీ విలీనం..
2014లో తెలంగాణ ప్రత్యేక రాష్ట్రం ఏర్పడ్డాక జరిగిన తొలి ఎన్నికల్లో టీఆర్ఎస్ (బీఆర్ఎస్) పార్టీ 63 స్థానాల్లో గెలిచి, అధికారంలోకి వచ్చింది. ఆ ఎన్నికల్లో కాంగ్రెస్ పార్టీ 21 సీట్లు, టీడీపీ 15 సీట్లు సాధించాయి. కానీ అసెంబ్లీలో బలం పెంచుకునేందుకు అప్పటి సీఎం కేసీఆర్ రాజకీయ పునరేకీకరణ పేరిట రెండేండ్లలో రెండు పార్టీల నుంచి 19 మంది ఎమ్మెల్యేలను టీఆర్ఎస్లో చేర్చుకున్నారు. టీడీపీ నుంచి12 మంది ఎమ్మెల్యేలు వచ్చి చేరడంతో అధికారికంగా టీడీపీ ఎల్పీ టీఆర్ఎస్లో విలీనమైంది. కాంగ్రెస్ నుంచి ఐదుగురిని, వైఎస్సార్సీపీ నుంచి గెలిచిన ఇద్దరు ఎమ్మెల్యేలను సైతం టీఆర్ఎస్లో చేర్చుకున్నారు. తమ ఆహ్వానం మేరకు పార్టీలో చేరినందుకు బహుమతిగా తలసాని శ్రీనివాస్ యాదవ్ లాంటి వాళ్లకు మంత్రి పదవులు ఇచ్చారు. ఉద్యమకారులను పక్కనపెట్టి మరీ వలస నేతలకు పదవులు ఇవ్వడంపై విమర్శలు వచ్చినా.. గులాబీ బాస్ పట్టించుకోలేదు.
2019లో సీఎల్పీ విలీనం..
తొలి ఎన్నికల్లో మార్జిన్లో బయటపడ్డ టీఆర్ఎస్ పార్టీ.. 2018లో జరిగిన ఎన్నికల్లో 88 సీట్లతో భారీ విజయం సాధించింది. కానీ సభలో తనను ప్రశ్నించే ప్రతిపక్షమే ఉండకూడదనే ఉద్దేశంతో అప్పటి సీఎం కేసీఆర్, కాంగ్రెస్ పార్టీని టార్గెట్ చేశారు. ఆ ఎన్నికల్లో 19 మంది ఎమ్మెల్యేలు కాంగ్రెస్ నుంచి గెలిస్తే.. 12 మందిని లాగేసుకున్నారు. దశలవారీగా కాంగ్రెస్ ఎమ్మెల్యేలను చేర్చుకుంటూ 2019 జూన్లో సీఎల్పీని టీఆర్ఎస్లో విలీనం చేసుకున్నారు. కాంగ్రెస్ నుంచి టీఆర్ఎస్లోకి వచ్చి చేరిన సబితా ఇంద్రా రెడ్డికి మంత్రి పదవి ఇచ్చారు. ఫలితంగా కాంగ్రెస్ కేవలం ఐదుగురు ఎమ్మెల్యేలకే పరిమితం అయ్యింది. అప్పట్లో ఈ వ్యవహారంపై కాంగ్రెస్ పార్టీ తీవ్రంగా స్పందించింది. పార్టీ మారినవాళ్లపై అనర్హత వేటు వేయాలంటూ హైకోర్టులో పిటిషన్ దాఖలు చేసింది. తాజాగా ఎన్నికలు ముగిసి, కాంగ్రెస్ అధికారంలోకి వచ్చినప్పటికీ నాటి కేసు మాత్రం ఎటూ తేలలేదు.
ఇప్పుడు బీఆర్ఎస్ నుంచి కాంగ్రెస్లోకి..
పదేండ్లుగా రాష్ట్రంలో తమకు తిరుగులేదని భావించిన బీఆర్ఎస్ మొన్నటి అసెంబ్లీ ఎన్నికల్లో ఓటమి తర్వాత ప్రతిపక్షపాత్రకే పరిమితమైంది. కాంగ్రెస్ అలవిగాని హామీలతో ప్రజలను మభ్యపెట్టి గెల్చిందని, బీఆర్ఎస్ను ఓడించినందుకు ప్రజలు పశ్చాత్తాపపడుతున్నారని, పార్లమెంట్ఎన్నికల్లో 12 సీట్లు గెలుస్తామని స్వయంగా కేసీఆర్, కేటీఆర్ చెప్పినా.. లోక్సభ ఎన్నికల్లో చిత్తుగా ఓడిపోయారు. ఒక్క సీటు కూడా గెలుచుకోలేక పార్లమెంట్లో ప్రాతినిథ్యం కోల్పోయారు. కంటోన్మెంట్అసెంబ్లీ స్థానాన్ని సైతం చేజార్చుకోవడంతో ఆ పార్టీ హైకమాండ్పై సొంత పార్టీ ఎమ్మెల్యేల్లో విశ్వాసం సన్నగిల్లింది. ఈ క్రమంలో తమ రాజకీయ భవిష్యత్తు కోసం కాంగ్రెస్లో చేరేందుకు క్యూ కడ్తున్నారు. ఇప్పటికే ఎమ్మెల్యేలు దానం నాగేందర్, తెల్లం వెంకట్రావ్, కడియం శ్రీహరి, పోచారం శ్రీనివాస్రెడ్డి, సంజయ్కుమార్బీఆర్ఎస్ను వీడి కాంగ్రెస్లో చేరారు. మరికొందరు కూడా అధికార పార్టీలో చేరేందుకు క్యూ కడ్తున్నారు. మొదట్లో దానం నాగేందర్, కడియంలాంటివాళ్ల చేరికలను మామూలుగా తీసుకున్న కేసీఆర్, కేటీఆర్తాజాగా పోచారం, సంజయ్చేరికలతో అలర్ట్ అయ్యారు.
ముఖ్యంగా కాంగ్రెస్వి నీతిమాలిన రాజకీయాలని, ఆ పార్టీ చర్యలు రాజ్యాంగ విరుద్ధమంటూ కేటీఆర్ ట్వీట్చేశారు. ఈ అంశాన్ని సుప్రీంకోర్టులో తేల్చుకుంటామని స్పష్టంచేశారు. దీనికి కాంగ్రెస్ నేతలతో పాటు కూనంనేని సాంబశివరావు లాంటి సీపీఐ ఎమ్మెల్యే సైతం గట్టిగానే కౌంటర్ ఇస్తున్నారు. చేరికలకు శ్రీకారం చుట్టిందే కేసీఆర్ అని, టీడీపీ, కాంగ్రెస్ను విలీనం చేసుకున్నప్పుడు రాజ్యాంగానికి విరుద్ధమని తెలియదా? అని నిలదీస్తున్నారు. కేటీఆర్ కామెంట్స్ జనాల్లోనూ చర్చకు దారి తీశాయి. ‘మీరు చేస్తే ఒప్పు.. కాంగ్రెస్ చేస్తే తప్పా? ’ అంటూ సోషల్ మీడియాలో కేటీఆర్ను నెటిజన్లు ప్రశ్నిస్తున్నారు. అదే సమయంలో కాంగ్రెస్ తీరునూ కొందరు తప్పు పడ్తున్నారు. అసెంబ్లీలో మెజార్టీ ఉన్నప్పుడు ఇతర పార్టీల నుంచి చేరికలకు ఏం అవసరం వచ్చిందని నిలదీస్తున్నారు. మొత్తం మీద కేసీఆర్చేసిన పాపం, ఆయన మెడకే చుట్టుకుందని ఇంకొందరు సెటైర్లు వేస్తున్నారు.
