ఆ ఫీచర్ అప్పటి యాపిల్ సీఈవో స్టీవ్ జాబ్స్కు నచ్చలేదు. ‘యాక్.. ఆ ఫీచర్ ఎవరికి కావాలి? దాన్ని పెట్టాలి, తీయాలి, చివరకు పడేయాలి. ఎవరికి అది అవసరం లేదు’ అంటూ కొన్నేళ్ల క్రితం ఆయన ఛీ కొట్టారు. కానీ, అప్పుడు ఆయన మెచ్చని ఆ ఫీచర్‌‌నే యాపిల్ ఇప్పుడు మెచ్చింది. ఇంతకీ, ఆ ఫీచర్ ఏంది? అంటే.. ‘స్టైలస్’! అవును, కొన్ని ఫోన్లకు దాంతో ఓ స్టిక్ వస్తుంది తెలుసు కదా. వేలితో కాకుండా, ఫోన్ లేదా ట్యాబ్ స్క్రీన్పై రాసేందుకు, టైప్ చేసేందుకు వాడే ఆ స్టిక్నే స్టైలస్ అంటారు. దాన్నే ఇప్పుడు యాపిల్ తీసుకొస్తోందని తెలుస్తోంది. సెప్టెంబర్లో కంపెనీ కొత్త ఫోన్లు ఐఫోన్ 11, ఐఫోన్ 11 ప్రో, ఐఫోన్ 11 మ్యాక్స్ ప్రోలను రిలీజ్ చేయబోతోంది. ఆ కొత్త ఫోన్లలోనే ఈ ఫీచర్ను పెడుతున్నట్టు సమాచారం. కాకపోతే దానికి స్టైలస్ అని కాకుండా ‘యాపిల్ పెన్సిల్’ అని పేరు పెట్టినట్టు తెలుస్తోంది. ఐఫోన్లకు స్పెషల్గా కేసులను (ప్రొటెక్షన్ కవర్) తయారు చేసే ఓలిగ్జర్ అనే కంపెనీ 2019కి సంబంధించి తాను లిస్ట్ చేసిన ఐఫోన్ కేసుల జాబితాలో ఈ కొత్త ఫీచర్ను వెల్లడించింది. దాని ప్రకారం కొత్త ఐఫోన్లోనే యాపిల్ పెన్సిల్కు ఇన్బిల్ట్ స్లాట్ ఉన్నట్టు తెలుస్తోంది. అయితే, ఇప్పటికే ఐప్యాడ్ మోడల్స్లో ఈ పెన్సిల్ను పెట్టినా ఫోన్లలో పెట్టడం ఇదే తొలిసారి. ‘‘ప్రీమియం లెదర్తో చేసిన ఈ ఐఫోన్ 11 ప్రో కేసు చాలా స్టైలిష్గా ఉంటుంది. స్లిమ్గా ఉండడంతో పాటు యాపిల్ పెన్సిల్ స్లాట్కు తగ్గట్టు కేసును తయారు చేశాం” అంటూ ఆలిగ్జర్ తన వెబ్సైట్లో స్టైలస్తో ఐఫోన్ వస్తోందని చెప్పకనే చెప్పింది. కాబట్టి స్టీవ్ జాబ్స్ వద్దన్న ఆ స్టైలస్ ఇప్పుడు సెప్టెంబర్లో విడుదలయ్యే ఐఫోన్ 11 ప్రో, ఐఫోన్ 11 మ్యాక్స్ ప్రో ఫోన్లలో కనిపించబోతోందన్నమాట!!
