రాష్ట్రవ్యాప్తంగా 4 వేల మంది సస్పెన్షన్
సమ్మెలో ఉన్న ఫీల్డ్ అసిస్టెంట్లపై ప్రభుత్వం కఠిన నిర్ణయం
సగటున 30 పనిదినాలు కల్పించినోళ్లకు మినహాయింపు
కొనసాగుతున్న ఆందోళనలు
హైదరాబాద్, వెలుగు: సమ్మెలో ఉన్న ఉపాధి హామీ పథకం ఫీల్డ్ అసిస్టెంట్లపై ప్రభుత్వం కఠినంగా వ్యవహారిస్తోంది. వారిని ఆందోళనకు గురిచేసే విధంగా సస్పెన్షన్లు మొదలుపెట్టింది. ఆయా జిల్లాల డీఆర్డీఓలు ఇప్పటికే 4 వేల మందిని సస్పెండ్ చేశారు. ఫీల్డ్ అసిస్టెంట్ల కాంట్రాక్ట్ రెన్యువల్కు గతంలో జారీ చేసిన సర్క్యులర్ నంబర్ 4779 ని రద్దు చేయాలని, హెచ్ఆర్ పాలసీని అమలు చేయాలనే డిమాండ్లతో ఫీల్డ్అసిస్టెంట్లు ఈ నెల 12 నుంచి ఆందోళనలు చేస్తున్నారు. వీరి సమ్మెకు రెండు రోజుల ముందే విధులకు హాజరు కాని వారి స్థానంలో పంచాయతీ కార్యదర్శులకు బాధ్యతలు అప్పగించాలని గ్రామీణ అభివృద్ధి కమిషనర్ రఘునందన్ రావు ఆదేశాలు జారీ చేశారు. ఈ మేరకు సమ్మె చేస్తున్న ఫీల్ట్ అసిస్టెంట్లను ఒక్కొక్కరిగా సస్పెండ్ చేస్తున్నారు. మూడు రోజుల్లోనే ఒక్కో జిల్లాలో 150 నుంచి 200 మందిని సస్పెండ్ చేస్తున్నట్లు ఆదేశాలు ఇచ్చారు.
30లోపు కల్పించినవాళ్లపై వేటు
ఫీల్డ్ అసిస్టెంట్ల సస్పెన్షన్ల విషయంలో అధికారులు వ్యూహాత్మకంగా వ్యవహరిస్తున్నారు. రాష్ట్రవ్యాప్తంగా ఫీల్డ్ అసిస్టెంట్లంతా సమ్మెలో ఉన్నప్పటికీ యాక్టివ్జాబ్కార్డులకు సగటున 30 పని దినాలకుపైగా పని కల్పించిన వారిపై వేటు వేయడం లేదని సమాచారం. 30లోపు పనిదినాలు కల్పించిన వారినే సస్పెండ్ చేశారు. సమ్మెను నిర్వీర్యం చేసేందుకే ప్రభుత్వం ఇలాంటి చర్యలకు పాల్పడుతోందని ఫీల్డ్ అసిస్టెంట్స్ జేఏసీ నేతలు ఆరోపించారు. సీయూజీ లో భాగంగా ఇచ్చిన సిమ్ కార్డులను సైతం తీసుకొని పంచాయతీ సెక్రటరీలకు ఇస్తున్నారు.
నేడు అంబేద్కర్ విగ్రహాలకు వినతులు
రాష్ట్రవ్యాప్తంగా అన్ని మండల కేంద్రాల్లో ఫీల్డ్ అసిస్టెంట్లు రిలే నిరాహార దీక్షలు కొనసాగిస్తున్నారు. ఆందోళనలో భాగంగా బుధవారం అంబేద్కర్ విగ్రహాలకు వినతిపత్రాలు ఇవ్వనున్నట్లు ఫీల్డ్అసిస్టెంట్ల జేఏసీ నాయకుడు శ్యామలయ్య వెల్లడించారు. 4779 సర్క్యులర్ను రద్దు చేసేవరకు తమ సమ్మె కొనసాగుతుందని ఆయన తెలిపారు.
