- యాంటీబాడీ, ఉహాంబో, ఇంబొకొడో వ్యాక్సిన్లపై సైంటిస్టుల ట్రయల్స్
- 9 దేశాల్లో 49 క్లినికల్ ట్రయల్స్ కేంద్రాలు
- 2016 నుంచి ప్రయోగాలు.. 2021 నాటికి పూర్తి
హెచ్ఐవీ ఎయిడ్స్.. రోజూ 5 వేల మందికి సోకుతున్న మాయదారి రోగం. ప్రపంచంలో 3.7 కోట్ల మంది హెచ్ఐవీ రోగులున్నారు. అందులో 70 శాతం కేవలం సబ్ సహారన్ ఆఫ్రికాలోనే ఉన్నారు. ఏటేటా 20 లక్షల మంది దాకా దాని బారిన పడుతున్నారు. అదొక్కసారి శరీరంలోకి వచ్చిందంటే.. దానిని ఆపడం కష్టం. ఆ మాయదారి వైరస్ను చంపే మందులే లేవు. ఉన్న మార్గమల్లా నివారణే. మరి, దాని విరుగుడుకు సైంటిస్టులు ఏం చేయట్లేదా అంటే.. చేస్తున్నారు. ఎప్పటి నుంచో మందులపై పరిశోధనలు చేస్తున్నారు. ఈ మధ్యే కొన్ని మందులూ మంచి ఫలితాలిచ్చాయన్న మంచి వార్తనూ చెప్పారు. అది కాకుండా నాలుగు ఖండాల్లోని 12 దేశాలకు చెందిన సైంటిస్టులు హెచ్ఐవీని అంతమొందించే మూడు పద్ధతులపైనే ప్రధానంగా దృష్టిపెట్టారు. ‘హెచ్ఐవీ వ్యాక్సిన్ ట్రయల్స్ నెట్వర్క్’ ప్రోగ్రామ్లో భాగంగా వాటి మీద ట్రయల్స్ చేస్తున్నారు. ఈ ట్రయల్స్ గురించి సౌత్ ఆఫ్రికన్ మెడికల్ రీసెర్చ్ కౌన్సిల్ ప్రెసిడెంట్, పెరినేటల్ హెచ్ఐవీ రీసెర్చ్ ప్రొఫెసర్ గ్లెండా గ్రే వివరించారు. 9 దేశాల్లో 49 క్లినికల్ ట్రయల్స్ సెంటర్లను ఏర్పాటు చేశారు. ఇప్పుడు 18 ట్రయల్స్ నడుస్తున్నాయి. 2016 నుంచి సాగుతున్న ఆ ట్రయల్స్ 2021లో పూర్తవుతాయని ఆమె చెప్పారు. వాటిలో మూడు ట్రయల్స్ ముఖ్యమంటున్నారు. ఆ మూడు, యాంటీ బాడీ మీడియేటెడ్ ప్రివెన్షన్ స్టడీస్, ఉహాంబో ట్రయల్స్, ఇంబొకొడో ట్రయల్స్. హెచ్ఐవీ సోకిన వేలాది మందిపై ఆ ప్రయోగాలు చేస్తున్నారు.
యాంటీ బాడీ ట్రయల్స్
యాంటీ బాడీ మీడియేటెడ్ ప్రివెన్షన్.. అంటే, యాంటీ బాడీలతో హెచ్ఐవీని చంపేయడం. మనకు ఏదైనా జబ్బు చేస్తే ఆ జబ్బుకు కారణమైన ప్రాణిని చంపి పారేసి కాపాడుతుంటాయి. అందుకే దాన్నే ప్రధానంగా టెస్టుల్లో భాగం చేస్తున్నారు. అమెరికా, బ్రెజిల్, పెరూ, స్విట్జర్లాండ్, తాంజానియా, జింబాబ్వే, బోత్స్వానా, దక్షిణాఫ్రికా, కెన్యా, మలావి, మొజాంబిక్కు చెందిన 4,625 మందిపై ఈ యాంటీబాడీ ప్రయోగాలు చేస్తున్నారు. వీఆర్సీ01 అనే యాంటీ బాడీని రోగులకు ఇచ్చి పరీక్షిస్తున్నారు. ఆ పరీక్షల్లో అది సత్ఫలితాలనిస్తున్నట్టు గ్లెండా గ్రే చెబుతున్నారు. దీన్నే న్యూట్రలైజింగ్ యాంటీ బాడీ అని పిలుస్తున్నారు. అంటే వైరస్ను పట్టి చంపేస్తుందన్నమాట. దాని పనులకు ఫుల్స్టాప్ పెట్టేస్తుందన్నమాట. 8 వారాలకొకసారి హెచ్ఐవీ రోగులకు ఈ మందును రక్తనాళాల ద్వారా (ఇంట్రావీనస్– ఐవీ) ఎక్కిస్తూ పరీక్షిస్తున్నారు. ఇప్పుడు చేస్తున్న యాంటీ బాడీ టెస్టుల్లో ఇదే మంచి ఫలితాలనిస్తున్న ట్రయల్స్ అని సైంటిస్టులు చెబుతున్నారు. హెచ్ఐవీ మీద ప్రభావవంతంగా పనిచేస్తున్నట్టు గుర్తించారు.
ఇంబొకొడో
ఇంబొకొడో అంటే ఇసిజులులోని ఓ రకమైన రాయి అని అర్థం. దాన్నే హెచ్వీటీఎన్705/హెచ్పీఎక్స్2008 అని పిలుస్తున్నారు. దక్షిణాఫ్రికా, మలావి, మొజాంబిక్, జాంబియా, జింబాబ్వేల్లోని హెచ్ఐవీ లేని 18 నుంచి 35 ఏళ్ల మధ్య ఉన్న 2600 మంది మహిళలపై దానిని ప్రయోగించి చూశారు. మొజాయిక్ ఇమ్యునోజెన్స్ ఆధారంగా ఈ ట్రయల్స్ చేశారు. ప్రపంచంలోని వివిధ ప్రాంతాల్లోని వ్యక్తుల హెచ్ఐవీ శాంపిల్ నుంచి సేకరించిన వైరస్ స్ట్రెయిన్సే ఈ మందు. వాటినే వ్యాక్సిన్లుగా మార్చారు. ప్రపంచంలోని వివిధ రకాల హెచ్ఐవీని ఎదురించి పోరాడేందుకు రోగ నిరోధక వ్యవస్థను పటిష్టం చేయడమే ఈ వ్యాక్సిన్ ట్రయల్స్ లక్ష్యం. ఈ మూడు రకాల మార్గాలు హెచ్ఐవీని సమర్థంగా ఎదుర్కొనేందుకు ఉపయోగపడతాయని సైంటిస్టులు ఆశాభావం వ్యక్తం చేస్తున్నారు. అన్ని ట్రయల్స్ 2021 నాటికి పూర్తయిపోతాయని, మరికొన్నేళ్లలో హెచ్ఐవీకి సరైన మందు దొరుకుతుందని చెబుతున్నారు.
ఉహాంబో వ్యాక్సిన్
ఒకప్పుడు జనాల్ని మహమ్మారుల పట్టిపీడించిన చాలా వైరస్లకు వ్యాక్సిన్లు కనిపెట్టారు. అవి వచ్చాక దాదాపు ఆ కేసులు తగ్గిపోయాయి. ఇప్పుడు ఈ ప్రాణాంతక హెచ్ఐవీకీ వ్యాక్సిన్ను తయారు చేసే పనిలో పడ్డారు సైంటిస్టులు. అందులో భాగంగా వచ్చిందే ఉహాంబో వ్యాక్సిన్. ఆరోగ్యంగా ఉన్న 18 నుంచి 35 ఏళ్ల వారిపై ఈ వ్యాక్సిన్ను టెస్ట్ చేస్తున్నారు. నిజానికి ఈ వ్యాక్సిన్ పాతదే. దానినే కొత్త వెర్షన్ కింద టెస్ట్ చేస్తున్నారు. 2003–2006 మధ్య థాయ్లాండ్లో అమెరికా మిలటరీ హెచ్ఐవీ రీసెర్చ్ ప్రోగ్రాం, థాయ్లాండ్ ఆరోగ్య శాఖ కలిసి ఆర్వీ144పై ట్రయల్స్ చేశాయి. అది మంచి ఫలితాలనిచ్చింది. ఇప్పుడు దానినే ఉహాంబో అనే కొత్త వెర్షన్గా మార్చారు. ఆర్వీ144 కన్నా మరింత మెరుగైన ఫలితాలు ఇచ్చేలా ఉహాంబోను తయారు చేశారు. దానిపైనా ట్రయల్స్ 2021 నాటికి పూర్తయ్యే అవకాశాలున్నాయి.
