- కారును గట్టెక్కించిన కమ్యూనిస్టులు
- టీఆర్ఎస్ విజయంలో కీలకంగా సీపీఎం, సీపీఐ ఓట్లు
- ప్రచారంలోనూ ముందున్న కమ్యూనిస్టులు
హైదరాబాద్, వెలుగు: మునుగోడు ఉపఎన్నికల్లో కమ్యూనిస్టులు కీలకంగా మారారు. టీఆర్ఎస్ అభ్యర్థి కూసుకుంట్ల ప్రభాకర్ రెడ్డి విజయంలో సీపీఎం, సీపీఐ ఓట్లు కలిసొచ్చాయి. లేదంటే టీఆర్ఎస్ ఓడిపోయేదని వాదనలు వినిపిస్తున్నాయి. మునుగోడులోని 7 మండలాల్లోనూ కమ్యూనిస్టులు బలంగా ఉన్నారు. ఈ సెగ్మెంట్లో ఐదుసార్లు సీపీఐ అభ్యర్థులు ఎమ్మెల్యేగా గెలిచారు. గతంతో పోలిస్తే కమ్యూనిస్టులకు కొంత బలం తగ్గినా, సెగ్మెంట్ పరిధిలో పలు గ్రామాల్లో సీపీఎం, సీపీఐ సర్పంచ్లు, ఉపసర్పంచులు, ఎంపీటీసీలున్నారు. చౌటుప్పల్ మున్సిపాలిటీలో వైస్ చైర్మన్ సహా ముగ్గురు కౌన్సిలర్లున్నారు. వీళ్ల బలాన్ని అంచనా వేసిన సీఎం కేసీఆర్.. కమ్యూనిస్టులతో మాట్లాడి వారిని పోటీ చేయకుండా, కాంగ్రెస్కు మద్దతివ్వకుండా చేయడంతో సఫలమయ్యారు. 2014, 2018 ఎన్నికల్లో సింగిల్గా పోటీ చేసిన టీఆర్ఎస్, ఈసారి కమ్యూనిస్టుల మద్దతును కూడగట్టుకుంది. బీజేపీ ప్రధాన శత్రువుగా భావించే కమ్యూనిస్టులు టీఆర్ఎస్కు మద్దతివ్వడంపై విమర్శలు రావడంతో.. తాము మొదట్నుంచీ బీజేపీకి వ్యతిరేకమని, గెలిచే పార్టీకే తమ మద్దతు అని కామ్రేడ్లు ఆ విమర్శలను తిప్పికొట్టే ప్రయత్నం చేశారు. ప్రచారంలోనూ సీపీఐ, సీపీఎం కార్యకర్తలు, నాయకులు కీలకంగా వ్యవహరించారు. ఈ విషయాన్ని టీఆర్ఎస్ నేతలే బాహాటంగా ప్రకటించారు.
కామ్రేడ్ల ఓట్లే గెలిపించాయా?
మునుగోడు సెగ్మెంట్లో కమ్యూనిస్టులకు 12 వేల నుంచి15 వేల ఓట్లుంటాయని అంచనా. ప్రస్తుతం టీఆర్ఎస్అభ్యర్థికి 10,309 ఓట్ల మెజార్టీ లభించింది. ఈ లెక్కన సీపీఎం, సీపీఐ ఓట్లు కీలకంగానే ఉన్నట్టు స్పష్టమవుతోంది. మరోపక్క చౌటుప్పల్లో బీజేపీకి భారీ మెజార్టీ వస్తుందని ఆపార్టీ ఆశించింది. కానీ ఫస్ట్ రౌండ్ టీఆర్ఎస్ కు రాగా, తర్వాతి 2 రౌండ్లు బీజేపీ లీడ్లో ఉంది. తొలిరౌండ్ బీజేపీని కాస్త దెబ్బతీసింది. ఈ రౌండ్లో జైకేసారం, నెలపట్ల, ఎస్ లింగోటం, కుంట్లగూడెం, మందోల్లగూడెం, చిన్నకోడూరు, పెద్ద కోడూరు, పంతంగి తదితర గ్రామాలకు చెందిన ఓట్లు లెక్కించగా, టీఆర్ఎస్ లీడ్లో ఉంది. ఈ గ్రామాల్లో సీపీఎం బలంగా ఉంటుంది. నారాయణపురంలోనూ సీపీఎం, సీపీఐ పార్టీలకు పట్టుంది. చండూరు, నాంపల్లి, మర్రిగూడెంలో సీపీఐకి బలమైన ఓటు బ్యాంకు ఉంది. ఇవన్నీ టీఆర్ఎస్ విజయంలో కీలకంగా మారాయనే చెప్పవచ్చు. కమ్యూనిస్టుల ఓట్లతో పాటు ఆ పార్టీల కార్యకర్తలు చేసిన ప్రచారమూ కూసుకుంట్ల గెలుపునకు దారితీసిందని విశ్లేషకులు చెప్తున్నారు.
