- మంచు కురిసే రోజుల్లో ముసురు
- కుత్బుల్లాపూర్లో అత్యధికంగా 2.08 సెం.మీ. వాన
- గంటకు 4 నుంచి 8 కి.మీ. వేగంతో చలిగాలులు
- ఇయ్యాల, రేపు పొగ మంచు పట్టే అవకాశాలు
హైదరాబాద్ సిటీ, వెలుగు: బంగాళాఖాతంలో ఏర్పడిన అల్పపీడనం ప్రభావంతో గ్రేటర్ పరిధిలో వాతావరణం పూర్తిగా మారిపోయింది. గురువారం రోజంతా సిటీని నల్లటి మేఘాలు కమ్మేశాయి. చలిగాలులతో పాటు చిరు జల్లులు కురిశాయి. పలు ప్రాంతాల్లో ముసురు వాన పడింది. సాయంత్రం 6 గంటల తర్వాత అత్యధికంగా కుత్బుల్లాపూర్ లో 2.08 సెంటీ మీటర్ల వాన కురిసింది.
షేక్ పేట, బహదూర్ పురా, ముషీరాబాద్, హయత్ నగర్, నాంపల్లి, చార్మినార్, బంజారాహిల్స్, లంగర్ హౌస్, పద్మారావునగర్, బోయిగూడ, బన్సీలాల్పేట, వారాసిగూడ, బౌద్ధనగర్, రాజేంద్రనగర్, అత్తాపూర్, మణికొండ ప్రాంతాల్లో తేలికపాటి జల్లులు పడ్డాయి. గంటకు 4 నుంచి 8 కిలోమీటర్ల వేగంతో చలి గాలులు వీచాయి. మరో రెండ్రోజులపాటు ఆకాశం మేఘావృతమై ఉంటుందని, తెల్లవారుజాము నుంచి పొగ మంచు కురిసే అవకాశం ఉందని వాతావరణ శాఖ అధికారులు పేర్కొన్నారు.
