తనకేమీ తెలియదన్న ఆఫీసర్
నారాయణపేట, వెలుగు : నారాయణపేట జిల్లాలో వినాయక నిమజ్జనం సందర్భంగా దురుసుగా మాట్లాడాడని, విధులకు ఆటంకం కలిగించాడని ఎస్ఐ ఓ యువకుడిని బట్టలూడదీసి కొట్టినట్టు తెలుస్తోంది. గాయాలతో బాధపడుతున్న అతడిని బంధువులు పీఎస్ నుంచి గుర్తు తెలియని ప్రదేశానికి తరలించారు. బాధితుడి కథనం ప్రకారం...ధూల్పేటకు చెందిన ఓ వినాయక విగ్రహాన్ని శనివారం రాత్రి నిమజ్జనానికి తీసుకువెళ్తూ సరఫ్బజార్ప్రాంతంలో ఆపారు. ఇది చూసిన నారాయణపేట సెకండ్ఎస్ఐ రమేశ్ అక్కడికి వచ్చి వాహనం తీయాలని కోరాడు. డ్రైవర్ లేడని కొంత సేపు టైం ఇవ్వాలని ఇద్దరు యువకులు ఎస్ఐని కోరారు. అయితే ఎస్ఐ నన్నే తిడతావా అంటూ ఓ యువకుడిని పక్కనే ఉన్న మార్వాడీ గల్లీలోకి తీసుకువెళ్లి తన సిబ్బందితో కలిసి చితకబాదాడు. కొంతమంది యువకులు వచ్చి ఎస్ఐకి సర్ధి చెప్పి అతడిని తీసుకువెళ్లారు. అయితే ఆదివారం నారాయణపేట పీఎస్లో యువకుడిపై కేసు నమోదు చేశారు.
సోమవారం ఉదయం అతడి ఇంటికి వెళ్లి పోలీస్స్టేషన్కు తీసుకువెళ్లారు. బట్టలు విప్పించి లాఠీలతో చితకబాదారు. ‘నీ జన్మలో మగతనం లేకుండా చేస్తా’ అంటూ ఎస్ఐ కొట్టాడని బాధితుడు వాపోయాడు. యువకుడి బంధువులు, కుల పెద్దలు వచ్చి సీఐ శ్రీకాంత్రెడ్డితో మాట్లాడి అతడిని తీసుకెళ్లారు. అయితే మళ్లీ ఎస్ఐ ఏం చేస్తాడో ఏమో అనుకుని సదరు యువకుడిని గుర్తు తెలియని ప్రదేశంలో ఉంచారు. దీనిపై త్వరలోనే ఎస్పీతో పాటు హెచ్ఆర్సీకి కంప్లయింట్ చేయబోతున్నట్టు తెలిసింది. దాడి చేశాడని ఆరోపణలు ఎదుర్కొంటున్న ఎస్ఐ రమేశ్ను వివరణ కోరగా తనకేమీ తెలియదని, మొదటి ఎస్ఐ సురేశ్గౌడ్ను అడగాలని సమాధానమిచ్చాడు. ఎస్ఐ సురేష్తో మాట్లాడగా అలాంటిదేమీ తమ స్టేషన్లో జరగలేదని చెప్పాడు.
