యాదాద్రి, వెలుగు : రాచకొండ పరిధిలో యాక్టివ్ మావోయిస్టులు లేరని సీపీ డీఎస్ చౌహాన్ స్పష్టం చేశారు. మావోయిస్టుల కదలికలు లేకున్నా పోలీసులు అప్రమత్తంగానే ఉన్నామని తెలిపారు. హైదరాబాద్లో ఉగ్రవాద మూలాలున్న వారిని అరెస్ట్ చేసిన విషయాన్ని ప్రస్తావించగా ఉగ్రవాదుల కదలికలు లేవని ఆయన తెలిపారు. యాదాద్రి జిల్లా భువనగిరి టౌన్ పీఎస్లో బుధవారం ఆయన రికార్డులను పరిశీలించి, పోలీసులు ఎదుర్కొంటున్న సమస్యలను అడిగి తెలుసుకున్నారు. ప్రజాదర్బార్కు వచ్చిన ఫిర్యాదుదారులతో మాట్లాడి రాతపూర్వకంగా ఫిర్యాదు చేయాలని సూచించారు. అనంతరం ఆయన విలేకరులతో మాట్లాడారు. యాదగిరిగుట్ట శ్రీ లక్ష్మి నృసింహస్వామి టెంపుల్ భద్రత దృష్టిలో పెట్టుకొని కమాండ్ కంట్రోల్ రూమ్ ఏర్పాటు చేస్తామని తెలిపారు. గ్యాంగ్స్టర్ నయీం కారణంగా నష్టపోయామని తమను ఎవరు సంప్రదించినా సాయం చేస్తామని ప్రకటించారు. నయీం కేసులో ఏర్పాటు చేసిన సిట్ గురించి మీడియా ప్రతినిధులు ప్రస్తావించగా ఈ విషయంలో తానేం మాట్లాడనని చెప్పారు. సివిల్ వివాదాల్లో పోలీసులు జోక్యం చేసుకోరని చెప్పిన ఆయన కోర్టులను ఆశ్రయించాలని ఫిర్యాదుదారులకు సూచించారు. నేరాలకు పాల్పడి ఇతర రాష్ట్రాలకు పారిపోతున్న వారిని పట్టుకొని చట్టం ముందు నిలబెడుతున్నామని తెలిపారు. రాచకొండ పరిధిలో రెగ్యులర్గా ప్రజాదర్బార్ నిర్వహించడానికి ప్రయత్నిస్తామని ఆయన చెప్పారు.
గతాన్ని మరిచి హుందాగా జీవించండి
గతాన్ని మరిచి సమాజంలో హుందాగా జీవించాలని రాచకొండ సీపీ డీఎస్ చౌహాన్ పిలుపునిచ్చారు. పాత నేరస్తులతో నిర్వహించిన ‘మార్పు కోసం- ముందడుగు’ కార్యక్రమంలో ఆయన మాట్లాడారు. తొందరపాటుతో కొందరు నేరాలు చేస్తారని, వీరి కారణంగా ఏ తప్పు చేయని కుటుంబం ఇబ్బందులు పడుతుందని చెప్పారు. నేరాల మానుకొని మంచిగా జీవించే వారికి పోలీసుల సహకారం ఉంటుందని తెలిపారు. అనంతరం పీఎస్లో ఆయన క్రైమ్ రివ్యూ నిర్వహించారు. ఇటీవల వరుసగా జరిగిన దొంగతనాలపై ఆరా తీసి పలు సూచనలు చేశారు. కార్యక్రమాల్లో రాచకొండ క్రైమ్స్ డీసీపీ మధుకర్ స్వామి, అడిషనల్ డీసీపీ లక్ష్మి, యాదాద్రి డీసీపీ రాజేశ్ చంద్ర, ఏసీపీలు వెంకటరెడ్డి, నర్సింహారెడ్డి, ఉదయ్కుమార్ రెడ్డి, సీఐలు, ఎస్సైలు ఉన్నారు.
