సిద్దిపేట రూరల్, వెలుగు : ప్రభుత్వ హాస్టళ్లపై రాష్ట్ర ప్రభుత్వం చెప్పే మాటలు, చేసే పనుల్లో పొంతన లేకుండా పోతోందని సిద్దిపేట ఎమ్మెల్యే, మాజీ మంత్రి హరీశ్రావు పేర్కొన్నారు. సిద్దిపేట అర్బన్ మండలం తడకపల్లి బీసీ హాస్టల్లో మంగళవారం విద్యార్థులతో ఇంట్రాక్ట్ అయ్యారు. వారికి దుప్పట్లు, టీ షర్ట్స్ అందజేసి, కేక్ కట్ చేసి వారితో కలిసి భోజనం చేశారు. ఈ సందర్భంగా ఆయన మాట్లాడుతూ ప్రభుత్వ హాస్టళ్లలో అన్ని సౌకర్యాలు కల్పిస్తామంటూ అసెంబ్లీ సాక్షిగా సీఎం చెప్పారని, కానీ, క్షేత్రస్థాయిలో పరిశీలిస్తే అంతా ఉత్తదేనని అర్థం అవుతుందన్నారు.
ఉత్తుత్తి మాటలు కాకుండా విద్యార్థులకు ఇబ్బంది లేకుండా చూడాలన్నారు. పెండింగ్లో ఉన్న కాస్మోటిక్, మెస్ చార్జీలు, విద్యార్థుల సమస్యలపై అసెంబ్లీలో, రాష్ట్ర ప్రభుత్వంతో చర్చించి పరిష్కరించేందుకు కృషి చేస్తానని తెలిపారు. విద్యార్థులు మత్తు పదార్థాలు, ఆన్లైన్ గేమ్స్ జోలికి వెళ్లకుండా మంచిగా చదువుకొని పేరెంట్స్కు మంచి పేరు తేవాలని సూచించారు.
‘దావతులు వద్దు.. దాతలు ముద్దు’ పిలుపుతో ప్రభుత్వ హాస్టళ్లను దత్తత తీసుకొని విద్యార్థులకు సాయం అందించిన వారికి కృతజ్ఞతలు తెలిపారు. అంతకుముందు సిద్దిపేట పీజీ హాస్టల్ లో స్టూడెంట్లకు దుప్పట్లు పంపిణీ చేశారు.
