‘సుడా’ చైర్మన్ పీఠంపై నువ్వా.. నేనా?

అధికార పార్టీ నేతల మధ్య పోటాపోటీ
మరిన్ని మండలాలను చేర్చడంతో పోటీ తీవ్రం
మంత్రులు, ముఖ్య నేతల ఆశీస్సుల కోసం ప్రయత్నాలు

ఖమ్మం, వెలుగు: స్తంభాద్రి అర్బన్ డెవలప్ మెంట్ అథారిటీ (సుడా) చైర్మన్ పీఠంపై అధికార పార్టీ లీడర్ల మధ్య తీవ్రమైన పోటీ నెలకొంది. తాజాగా సుడా పరిధిని మరింతగా పెంచుతూ రాష్ట్ర ప్రభుత్వం జీవో జారీచేయడంతో పోటీ పెరిగింది. తమకే అవకాశం కల్పించాలంటూ ఎవరికివారు రాష్ట్ర కాంగ్రెస్ ముఖ్యులతో పాటు జిల్లా మంత్రులను వేడుకుంటున్నారు. ఖమ్మం కార్పొరేషన్, వైరా మున్సిపాలిటీతో పాటు వైరా, పాలేరు నియోజకవర్గాల పరిధిలో ఉన్న ఏడు మండలాల్లోని 46 గ్రామాలను కలుపుతూ 2017 అక్టోబర్ లో సుడాను ఏర్పాటు చేశారు.

ఇప్పుడు మధిర, సత్తుపల్లి నియోజకవర్గాలను కవర్ చేస్తూ మధిర, సత్తుపల్లి మున్సిపాలిటీలు, 17 మండలాల్లోని 279 గ్రామాలను సుడా పరిధిలోకి తీసుకువచ్చారు. జిల్లాలోని కామేపల్లి, ఏన్కూరు, కారేపల్లి మండలాలు మినహాయించారు. ఇప్పటి వరకు ఖమ్మం నియోజకవర్గంలోని లీడర్లే సుడా చైర్మన్ పదవిని ఆశిస్తుండగా, తాజాగా మరిన్ని మండలాల విలీనంతో ఆయా నియోజకవర్గాల్లోని ముఖ్యనేతలు కూడా సుడా చైర్మన్ రేసులోకి వచ్చారు. రాష్ట్ర స్థాయిలో నామినేటెడ్ పోస్టులు కోరుకుంటున్న లీడర్లు కూడా ప్రస్తుతం సుడా పీఠంపై కన్నేశారు.

మస్తు డిమాండ్..

సుడా పరిధిలో జరిగే రూ.కోట్ల విలువైన అభివృద్ధి పనులు, రియల్ ఎస్టేట్ వెంచర్లు, లే అవుట్ల అనుమతుల విషయంలో సుడా కీలకం కావడంతో చైర్మన్ పదవీకి డిమాండ్ పెరిగింది. దీంతో పాటు జిల్లాలోని అన్ని నియోజకవర్గాల్లో జరిగే ప్రభుత్వ కార్యక్రమాలకు ప్రోటోకాల్ ఉంటుంది. ఆయా మండలాల్లో కొత్తగా ఏర్పాటు చేసే వెంచర్ల నుంచి సుడా ఫీజును వసూలు చేయడంతో పాటు రాష్ట్ర ప్రభుత్వం నుంచి నిధులు వస్తాయి. ఆ నిధుల విషయంలో నిర్ణయాధికారంతో పాటు భారీగా ఆదాయ వనరులున్న పదవి కావడంతో లీడర్ల మధ్య సుడా చైర్మన్, డైరెక్టర్ పదవులకు పోటీ కనిపిస్తోంది.

రేసులో ఉన్నది వీళ్లే..!

రాష్ట్రంలో కాంగ్రెస్ ప్రభుత్వం ఏర్పడిన తర్వాత పాత పాలకవర్గాన్ని రద్దుచేశారు. అప్పుడు చైర్మన్ తో పాటు 14 మంది డైరెక్టర్లుండగా, త్వరలోనే డైరెక్టర్ల సంఖ్యను పెంచుతూ కొత్త పాలకవర్గాన్ని ఏర్పాటుచేసే అవకాశముంది. జిల్లా కాంగ్రెస్ అధ్యక్షుడు పువ్వాళ్ల దుర్గాప్రసాద్, లీడర్లు సాదు రమేశ్ రెడ్డి, కమర్తపు మురళి, మానుకొండ రాధాకిషోర్, మహ్మద్ జావెద్, మిక్కిలినేని నరేందర్, మట్టా దయానంద్ తదితరులు సుడా పీఠాన్ని ఆశిస్తున్నట్టు తెలుస్తోంది. డిప్యూటీ సీఎం భట్టి, మంత్రులు తుమ్మల, పొంగులేటి, ఎంపీలు రఘురాంరెడ్డి, రేణుకాచౌదరి ఆశీస్సులు ఉన్న వారికి పదవి వరించే అవకాశం కనిపిస్తోంది.