మానవ సంబంధాలు రోజురోజుకు దిగజారుతున్నాయి. క్షణికావేశంలో చేసే కొన్ని పనులు వారిని కటకటాల పాల్జేస్తున్నాయి. తెలిసి, తెలియక చేసిన పొరపాట్లు చిప్పకూడు తినేలా చేస్తున్నాయి. తాజాగా మధ్యప్రదేశ్ లో ఓ మహిళ రెండు సంవత్సరాల మేనకోడలిని అతి దారుణంగా చేంపేసింది. ఈ ఘటన ఆ రాష్ట్రంలో కలకలం రేపింది.
జబల్‌పూర్‌లో అఫ్సానా అనే మహిళ తన రెండేళ్ల మేనకోడలు నిద్రపోనివ్వడం లేదని ఆ చిన్నారి గొంతు కోసి.. హత్య చేసింది. ఆ తర్వాత డ్రాయింగ్ రూమ్‌లోని సోఫా కింద బాలిక మృతదేహాన్ని దాచింది. ఈ ఘటన హనుమంతల్ పోలీస్ స్టేషన్ పరిధిలో జరిగింది. విషయం తెలియగానే పోలీసులు ఘటనాస్థలానికి వెళ్లారు. అక్కడి పరిస్థితులను పరిశీలించారు. చిన్నారి తల్లిదండ్రుల ఫిర్యాదు మేరకు కేసు నమోదు చేసుకున్న పోలీసులు... నిందితురాలిని అరెస్ట్ చేశారు.
అంతకుముందు.. చిన్నారి కనిపించకపోవడంతో తల్లి కంగారుపడింది. అన్నిచోట్ల వెతికింది. తెలిసిన వారిని వాకబు చేసింది. ఎక్కడా ఫలితం లేకపోవడంతో చివరకు దగ్గరలోని పోలీస్ స్టేషన్ లో ఫిర్యాదు చేసింది. చిన్నారి తల్లి ఫిర్యాదు మేరకు పోలీసులు ముందుగా మిస్సింగ్ కేసు నమోదు చేసుకుని... దర్యాప్తు మొదలుపెట్టారు. చిన్నారి మేనత్త గదిని పరిశీలించగా... డ్రాయింగ్ రూమ్‌లోని సోఫా కింద బాలిక మృతదేహాన్ని గుర్తించామని జిల్లా ఎస్పీ శుక్లా తెలిపారు.
పోలీసుల విచారణలో నిందితురాలు షాకింగ్నిజాలు చెప్పింది. ముందుగా తన గదికి చిన్నారి బాలిక వచ్చిందని, ఆ సమయంలో బయటకు వెళ్లమంటే వెళ్లలేదని చెప్పింది. అప్పుడు చిన్నారి చెంపలపై కొట్టడంతో బోరున విలపించడంతో తన నోరు, ముక్కును మూశానని పోలీసులకు వివరించింది. చిన్నారి చనిపోయిందని నిర్ధారణ చేసుకున్న తర్వాత ఈ నిజం ఎవరికీ తెలియవద్దనే ఉద్దేశంతో భయపడే.. సోఫా కింద డెడ్ బాడీని దాచానని పోలీసులకు చెప్పింది.
చిన్నారి డెడ్ బాడీని పోస్టుమార్టం కోసం మార్చురీకి తరలించారు. పోస్టుమార్టం రిపోర్టు కోసం ఎదురుచూస్తున్నామని, రిపోర్టు వచ్చాక మరిన్ని విషయాలు తెలిసే అవకాశం ఉందంటున్నారు కేసు దర్యాప్తు చేస్తున్న పోలీసులు.
