- మన్మోహన్ మృతికి సంతాపంగా హాలిడే ప్రకటన
- అకస్మాత్తుగా ఓపీ బంద్పై పేషెంట్స్ ఆగ్రహం
హైదరాబాద్ సిటీ, వెలుగు: హైదరాబాద్‌‌‌‌లోని నిమ్స్ హాస్పిటల్ లో శుక్రవారం అయోమయ పరిస్థితి నెలకొంది. మాజీ ప్రధాని మన్మోహన్ సింగ్మృతికి సంతాపంగా నిమ్స్ కు సెలవు ప్రకటిస్తున్నట్లు ఉదయం ఆస్పత్రి డైరెక్టర్ బీరప్ప పేరుతో సర్క్యూలర్ రిలీజ్ అయ్యింది. దాంతో ఉదయం ఏడు నుంచి ప్రారంభం కావాల్సిన ఓపీ సేవలు నిలిచిపోయాయి. అయితే, ముందస్తు సమాచారం ఇవ్వకుండా అకస్మాత్తుగా హాలిడే ప్రకటించడం, ఓపీ సేవలు బంద్ పెట్టడంపై పేషెంట్స్ ఆందోళనకు దిగారు.
దూర ప్రాంతాల నుంచి ట్రీట్మెంట్ కోసం వచ్చామని, అకస్మాత్తుగా సేవలు నిలిపివేస్తే ఎలా అంటూ అధికారులను ప్రశ్నించారు. నిమ్స్ అధికారుల తీరుపై అసహనం వ్యక్తం చేశారు. సెలవు నిర్ణయంపై విమర్శలు రావడంతో వెనక్కి తగ్గిన అధికారులు.. మళ్లీ మధ్యాహ్నం 2 గంటలకు హాలిడే క్యాన్సిల్ అంటూ మరో సర్క్యూలర్ ను రిలీజ్ చేశారు. కాగా.. ఓపీ, ఆపరేషన్లకు మాత్రమే అంతరాయం ఏర్పడిందని, ఎమర్జెన్సీ, క్యాజుయాలిటీ సేవలు కొనసాగాయని సమాచారం.
