తిరువనంతపురం: వృద్ధులు, దివ్యాంగులు వంటి సమాజంలోని బలహీన వర్గాలకు ఇచ్చే సామాజిక భద్రత పింఛన్ను సంపన్నులు పొందుతున్నారు. బీఎండబ్ల్యూ కారు, ఇంట్లో ఏసీ, 2వేల స్క్వేర్ యార్డ్కంటే ఎక్కువ స్థలంలో విలాసవంతమైన భవనాలు ఉన్నోళ్లు కూడా ప్రతినెలా ఠంచన్గా ప్రభుత్వ పింఛన్ అందుకుంటున్నారు. కేరళలోని మలప్పురం కొటక్కల్ మున్సిపాలిటీలో ఆ రాష్ట్ర ఫైనాన్స్ డిపార్ట్మెంట్ నిర్వహించిన ఆడిట్లో ఈ అక్రమాలు వెలుగుచూశాయి.
సర్కారు పింఛన్ అందుకుంటున్నవారిలో గెజిటెడ్‌ అధికారులు, కాలేజీ ప్రొఫెసర్లుసహా1498 మంది ప్రభుత్వ ఉద్యోగులు ఉన్నట్టు తేలగా.. ఈ అక్రమాలపై నిగ్గుతేల్చాలని విజిలెన్స్ డిపార్ట్మెంట్ను ఆ రాష్ట్ర సర్కారు ఆదేశించింది. మొత్తం 42 మందిపై విజిలెన్స్ విచారణ జరపగా.. అందులో 38 మందికి పింఛన్ పొందే అర్హత లేదని, అందులో కొందరు ప్రాణాలతోనే లేరని తేలింది. ఇందులో బీఎండబ్ల్యూ కార్లు, ఏసీలున్న విలాస భవనాలు ఉన్నవారు కూడా ఉన్నట్టు తేలడం అందరినీ ఆశ్చర్యానికి గురిచేసింది.
పింఛన్ రికవరీకి ఆదేశం
సంపన్నులు, ప్రభుత్వ ఉద్యోగులకు పింఛన్ ఇస్తుండడంపై ఆ రాష్ట్ర ఆర్థిక మంత్రి కేఎన్ బాలగోపాల్ సీరియస్ అయ్యారు. రాష్ట్రవ్యాప్తంగా ఆడిట్ నిర్వహించాలని ఆదేశించారు. అర్హతలేని వారిని పింఛన్ జాబితానుంచి తొలగించాలని సూచించారు. ఇప్పటివరకూ తీసుకున్న పింఛన్ను రికవరీ చేయాలని ఆదేశించారు. వారికి అర్హత, ఆదాయ ధ్రువీకరణ పత్రాలు జారీచేసిన రెవెన్యూ, పింఛన్ ఆమోదించిన అధికారులపై కూడా విజిలెన్స్విచారణ జరపాలని ఆర్డర్స్ జారీ చేశారు. ఇందుకు సంబంధించి తీసుకున్న చర్యలను వెంటనే నివేదించాలని ఆర్థిక శాఖ పరిపాలనా విభాగాలను ఆదేశించినట్టు అధికారవర్గాలు తెలిపాయి.
