అన్ని చార్జీలు పెంచి జనాలను దోచుకుంటున్నరు : వివేక్ వెంకటస్వామి

ధరణితో బీఆర్ఎస్ లీడర్లు భూములు ఆక్రమిస్తున్నరు
మానేరువాగులో ఇసుక దందాకు అడ్డుకట్ట వేయాలని డిమాండ్

పెద్దపల్లి, వెలుగు: సంక్షేమం పేరుతో ప్రజల చేతిలో రూపాయి పెడుతున్న సీఎం కేసీఆర్.. రూ.100 గుంజుతున్నారని బీజేపీ జాతీయ కార్యవర్గ సభ్యుడు వివేక్ వెంకటస్వామి ఫైర్ అయ్యారు. కరెంట్, రిజిస్ట్రేషన్లు, లిక్కర్, ఆర్టీసీ చార్జీలతో ప్రజలను దోచుకుంటున్నారని మండిపడ్డారు. పెద్దపల్లి జిల్లా సుల్తానాబాద్లో ఆదివారం ఏర్పాటు చేసిన మీడియా సమావేశంలో వివేక్ మాట్లాడారు. రాష్ట్రంలో తుగ్లక్ పాలన నడుస్తోందని, ధరణి పోర్టల్ తీసుకొచ్చి బీఆర్ఎస్ లీడర్లకు దందా చేసుకునే అవకాశం ఇచ్చారని ఆయన ఆరోపించారు. ధరణిలో ఉన్న లోపాలను ఆధారంగా చేసుకుని బీఆర్ఎస్ నాయకులు భూ ఆక్రమణలకు పాల్పడుతున్నారన్నారు. ధరణితో పేద రైతులు భూములు కోల్పోయి ఆఫీసుల చుట్టూ తిరుగుతున్నారని ఆవేదన వ్యక్తం చేశారు. ఇతర రాష్ట్రాలతో పోలిస్తే తెలంగాణలో లిక్కర్ను అధిక రేట్లకు అమ్ముతున్నారన్నారు. తెలంగాణ ఆర్థిక వ్యవస్థ పూర్తిగా మద్యం అమ్మకాలపై ఆధారపడేలా సర్కార్ చేసిందని, ఏటా రూ.48 వేల కోట్లు మద్యం ద్వారానే రాబడుతున్నారని అన్నారు.

పెట్రోల్, డీజిల్, గ్యాస్ను జీఎస్టీ పరిధిలోకి తేవాలి

పెట్రోల్, డీజిల్, గ్యాస్ ను జీఎస్టీ పరిధిలోకి తీసుకొస్తేనే రేట్లు తగ్గి, ప్రజలకు ఇబ్బందులు తప్పుతాయని, కేంద్ర ప్రభుత్వ సూచనకు అనుగుణంగా వీటిని జీఎస్టీ పరిధిలోకి తెచ్చేందుకు రాష్ట్ర ప్రభుత్వం సహకరించాలని వివేక్ సూచించారు. బీజేపీ పాలిత రాష్ట్రాలన్నీ పెట్రోల్, డీజీల్పై వ్యాట్ ను రూ.10 నుంచి రూ.14 వరకు తగ్గించాయన్నారు. కానీ తెలంగాణలో రూపాయి కూడా తగ్గించలేదన్నారు. పక్కనున్న కర్నాటకలో కూడా పెట్రోల్, డీజిల్ రేట్లు తెలంగాణ కంటే తక్కువగా ఉన్నాయని, అందుకే బార్డర్లోని జనాలు అక్కడికి వెళ్లి పెట్రోల్, డీజిల్ కొంటున్నారన్నారు. ప్రధాని మోడీ ఉక్రెయిన్ వార్ సమయంలో రష్యా నుంచి తక్కువ ధరకు క్రూడాయిల్ కొని ప్రజలకు అందుబాటులో ఉండేలా చర్యలు తీసుకున్నారన్నారు.

ప్రజల కోరిక మేరకే రైలు హాల్టింగ్

ప్రజల కోరిక మేరకే రైల్వే మంత్రి అశ్విని వైష్ణవ్ను కలిశానని, మంత్రి సానుకూలంగా స్పందించి రామగిరి, అజ్ని ఎక్స్ప్రెస్లు ఓదెల రైల్వేస్టేషన్లో ఆగేలా ఆదేశాలిచ్చారని వివేక్ చెప్పారు. గతంలో తాను ఎంపీగా ఉన్నప్పుడే కొత్త రైలు సర్వీసుల కోసం కృషి చేశానని, పెద్దపల్లి పార్లమెంటు సెగ్మెంట్ పరిధిలోని రైల్వే స్టేషన్లలో అన్ని రైళ్లు ఆగేలా కేంద్రాన్ని ఒప్పించానన్నారు. ప్రఖ్యాత పుణ్యక్షేత్రం ఓదెలలో శ్రీమల్లికార్జున స్వామి ఆలయం ఉందని, సరైన ప్రయాణ సౌకర్యాలు లేకపోవడంతో స్థానికులు తనను సంప్రదించారన్నారు. ప్రజల కోరికను గౌరవించిన రైల్వే మంత్రికి ఈ సందర్భంగా వివేక్ కృతజ్ఞతలు తెలిపారు.

ఇసుక దందాపై కఠిన చర్యలు తీసుకోవాలి

పెద్దపల్లి నియోజకవర్గంలోని మానేరువాగులో ఇసుక దందాపై అధికారులు కఠినంగా వ్యవహరించాలని వివేక్ డిమాండ్ చేశారు. ఇసుకను అక్రమంగా హైదరాబాద్ లాంటి దూరప్రాంతాలకు తరలించి కోట్లు గడిస్తున్నారని, ఈ వ్యవహారంలో అధికార పార్టీ నాయకులే ఉన్నారని ఆరోపించారు. చెక్డ్యాంల వద్ద డీసిల్టేషన్ పేరుతో అనుమతులు పొంది, ఇసుకను విచ్చలవిడిగా మైనింగ్ చేసి నిబంధనలకు విరుద్ధంగా తరలిస్తున్నారన్నారు. ఇసుక అక్రమ దందాపై గ్రీన్ ట్రిబ్యునల్లో కేసు వేసినా సర్కార్ పట్టించుకోవడం లేదన్నారు. అధికారులు కూడా పూర్తిగా ఇసుక కాంట్రాక్టర్లకే సహకరిస్తున్నారన్నారు. సమావేశంలో బీజేపీ నాయకులు ఏగోలపు సదయ్య, గొట్టిముక్కుల సురేష్రెడ్డి, సయ్యద్ సజ్జాద్, అడ్డగుంట శ్రీనివాస్, బాలసాని సతీష్, గుండేటి ఐలయ్య, గజభీంకార్ పవన్, కూకట్ల నాగరాజు, బుర్ర సతీశ్, ఆరెపల్లి రాహుల్, అల్లం సతీశ్, రావుల రాజ్కుమార్, కారెంగుల శ్రీనివాస్ తదితరులు పాల్గొన్నారు.