కంప్యూటర్ చిప్ అంటే చిన్నగా, చేతి వేలిపై ఇమిడేలా ఉంటుంది. కానీ, కాలిఫోర్నియాకు చెందిన సెరిబ్రస్ సిస్టమ్స్ అనే స్టార్టప్ ప్రపంచంలోనే అతిపెద్ద కంప్యూటర్ చిప్ను తయారు చేసింది. 21 చదరపు సెంటీమీటర్లున్న దాని పేరు వేఫర్ స్కేల్ ఇంజన్. ఆర్టిఫిషియల్ ఇంటెలిజెన్స్ (కృత్రిమ మేధ– ఏఐ)కి ఈ చిప్పే మూల స్తంభంలా ఉంటుందని కంపెనీ అంటోంది. మామూలు కంప్యూటర్ చిప్లలో 30 ప్రాసెసర్ కోర్లుంటాయి. అదే గ్రాఫిక్ ప్రాసెసింగ్ యూనిట్లలో అయితే వాటి కన్నా ఎక్కువ ఉంటాయి. జీపీయూ చిప్లో దాదాపు 5 వేల దాకా కోర్లు ఉంటాయి. కానీ, సెరిబ్రస్ తయారు చేసిన ఈ పెద్ద చిప్లో 4 లక్షల కోర్లున్నాయి. ఆ కోర్లను ఒకదానికొకటి హై బ్యాండ్విడ్త్లతో కనెక్ట్ చేసి పెట్టారు. దాని వల్ల అతి కష్టమైన మెషీన్ లెర్నింగ్ సవాళ్లనూ ఈజీగా చేయొచ్చని కంపెనీ చెబుతోంది. కొన్ని నెలలు పట్టే పనిని నిమిషాల్లో చేసేస్తుందని అంటోంది. ఇప్పటికే కొందరు కస్టమర్లకు ఆ చిప్ను కంపెనీ అమ్ముతోంది. దాని ధర ఎంతో మాత్రం చెప్పలేదు. పెద్ద చిప్లతో టైం కలిసొస్తుందేమో గానీ, దాని వల్ల నష్టాలూ అదే రేంజ్లో ఉంటాయని ఆనంద్టెక్ అనే న్యూస్ వెబ్ ఎడిటర్ డాక్టర్ ఇయాన్ కట్రెస్ చెప్పారు. చిన్న చిప్లు తక్కువ శక్తిని తీసుకుని పని చేస్తాయని, వేడి అయితే సులభంగా చల్లార్చొచ్చని అన్నారు. కానీ, ఇలాంటి పెద్ద చిప్లను వాడాలనుకుంటే మాత్రం వాటికంటూ ప్రత్యేకమైన సెంటర్లు, వసతులు ఏర్పాటు చేయాల్సిన అవసరముంటుందన్నారు. కాబట్టి ప్రాక్టికల్గా వాటి వాడకం ఖర్చుతో కూడుకున్నదని వివరించారు. కాబట్టి ప్రస్తుతానికి అది ఏఐకి మాత్రమే సూట్ అవుతుందని చెప్పారు.
