ఢిల్లీ రాజకీయం ఎట్ల మారుతదో?

ఢిల్లీ కోటను బద్దలు కొడతాం.. ఇటీవలి కాలంలో తరచు సీఎం కేసీఆర్ చెపుతున్న మాట ఇది. కానీ వాస్తవంలో ఢిల్లీ కోటను బద్దలు కొట్టడం సాధ్యమేనా అనేది ఇప్పుడు ఎదురవుతున్న ప్రశ్న. జాతీయ రాజకీయాల్లో చక్రం తిప్పాలంటే ముందు కేసీఆర్ 2023 అసెంబ్లీ ఎన్నికల్లో గెలవాలి. ఇంట గెలిస్తేనే రచ్చ గెలిచే అవకాశం ఉంటుంది. గతంలో ములాయం, లాలూ, కరుణానిధి, ఎన్టీఆర్, చంద్రబాబు ఇలాగే ఇంట గెలిచి జాతీయ రాజకీయాల్లో చక్రం తిప్పారు. కానీ ప్రస్తుతం ఉన్న పరిస్థితుల్లో కేసీఆర్ నాయకత్వాన్ని ఇతర రాష్ట్రాల నాయకులు అంగీకరిస్తారా అనేది కూడా మరో ప్రశ్న. ఇప్పటికీ నరేంద్రమోడీ ప్రభ తగ్గలేదు. ఈ పరిణామాల నేపథ్యంలో ఢిల్లీ కోటను బద్దలు కొట్టడం అనేది కేసీఆర్కు అంత తేలికైన విషయం కాదు. ప్రతి రాజకీయ పార్టీ ఢిల్లీ రాజకీయాల్లో చక్రం తిప్పాలని, అన్నీ అనుకూలిస్తే ఢిల్లీపై జెండా ఎగురవేయాలని కోరుకుంటాయి. జాతీయ పార్టీల ప్రభావం తగ్గి సంకీర్ణ యుగాలు ప్రారంభమైన తరువాత ఢిల్లీ రాజకీయాల్లో ప్రాంతీయ పార్టీల హవా ప్రారంభమైంది. ప్రస్తుతం దేశంలో సుదీర్ఘ అనుభవం కల కొద్దిమంది రాజకీయ నాయకుల్లో తెలంగాణ ముఖ్యమంత్రి కేసీఆర్ ఒకరు. గత కొన్ని సంవత్సరాలుగా జాతీయ రాజకీయాల్లో కీలకపాత్ర పోషించాలని ఉవ్విళ్ళూరుతున్న కేసీఆర్ మునుపెన్నడూ లేనంతగా బీజేపీపై విమర్శల దాడి తీవ్రతరం చేశారు. ఇటీవల నిర్వహించిన టీఆర్ఎస్ బహిరంగ సభలు, మీడియా సమావేశాల్లోనూ ఇదే పద్ధతిని ఫాలో అయ్యారు. ఒకవైపు రాష్ట్ర అభివృద్ధి తనతోనే సాధ్యమని చెబుతూ.. మరోవైపు రాష్ట్ర అభివృద్ధిని కేంద్ర ప్రభుత్వం అడ్డుకుంటోందనే అభిప్రాయం కలిగేలా ప్రధాని మోడీపై తీవ్ర విమర్శలు చేశారు. తెలంగాణ ప్రజలు ఆశీర్వదించి పంపారు ప్రత్యేక రాష్ట్రం సాధించాను, మళ్లీ ఆశీర్వదించి పంపితే ఢిల్లీ కోటను బద్దలు కొడతానని చెబుతున్నారు. 2018 తెలంగాణ అసెంబ్లీ ఎన్నికల్లో విజయం సాధించిన తర్వాత బీజేపీకి వ్యతిరేకంగా ఫెడరల్ ఫ్రంట్ ప్రతిపాదన చేసి జాతీయ రాజకీయాల్లోకి వెళ్లాలనే ఆకాంక్షను కేసీఆర్ అప్పుడే వెల్లడించారు. కానీ 2019 లోక్సభ ఎన్నికల్లో బీజేపీ తిరుగులేని మెజారిటీతో కేంద్రంలో రెండోసారి అధికారంలోకి వచ్చిన తర్వాత కేంద్ర రాజకీయాల్లో బీజేపీ తిరుగులేని శక్తిగా ఎదిగింది. కానీ బెంగాల్ అసెంబ్లీ ఎన్నికల్లో మమతా బెనర్జీ హ్యాట్రిక్ విజయం సాధించిన తర్వాత మళ్ళీ జాతీయ రాజకీయాల్లోకి వెళ్లే ప్రయత్నాలను మమతాబెనర్జీ, కేసీఆర్ ముమ్మరం చేశారు.

మూడోసారి ఇంట గెలిచేనా..

జాతీయ రాజకీయాల్లో కేసీఆర్ చక్రం తిప్పాలంటే ముందు 2023లో తెలంగాణ అసెంబ్లీ ఎన్నికల్లో గెలవాలి. ఇంట గెలిస్తేనే రచ్చ గెలిచే అవకాశం రాజకీయాల్లో ఉంటుంది. గతంలో జాతీయ రాజకీయాల్లో చక్రం తిప్పిన ములాయంసింగ్ యాదవ్, లాలూప్రసాద్ యాదవ్, దేవగౌడ, ఎన్టీఆర్, చంద్రబాబు, కరుణానిధి లాంటి నాయకులు ఇంట గెలిచిన తర్వాతే జాతీయ రాజకీయాలను ప్రభావితం చేశారు. 2014, 2018 అసెంబ్లీ ఎన్నికల్లో బలహీన నాయకత్వం ఉన్న కాంగ్రెస్ పై సునాయాసంగా విజయం సాధించిన కేసీఆర్ 2023 ఎన్నికల్లో కూడా ఆ స్థాయి విజయం సాధిస్తారా? అనే అనుమానాలు వ్యక్తమవుతున్నాయి. 2023 తెలంగాణ అసెంబ్లీ ఎన్నికల్లో 95 నుంచి 105 స్థానాలు గెలుస్తామని మేకపోతు గాంభీర్యం ప్రదర్శిస్తున్నా.. క్షేత్రస్థాయిలో అలాంటి అనుకూలత టీఆర్ఎస్ పార్టీకి కనిపించడం లేదు. కాంగ్రెస్, బీజేపీ.. రేవంత్ రెడ్డి, బండి సంజయ్ నాయకత్వంలో గతంలో కంటే బలం పుంజుకోవడం, ప్రభుత్వ వ్యతిరేకతను తట్టుకొని మూడోసారి అధికారంలోకి రావడం అంత తేలికైన విషయం కాదని కేసీఆర్కు కూడా అర్థమైంది. కాబట్టే ప్రశాంత్ కిషోర్ లాంటి ఎన్నికల వ్యూహకర్త సహాయం తీసుకోవటంతో పాటు ఆరు నెలల ముందుగానే అభ్యర్థులను ప్రకటించాలనుకోవడం, దళితబంధుతో పాటు మరిన్ని పథకాలతో గెలిచేందుకు అప్పుడే ప్రయత్నాలు మొదలు పెట్టారు. దుబ్బాక, హుజూరాబాద్ ఉప ఎన్నికల్లో బీజేపీ గెలుపు, గ్రేటర్ హైదరాబాద్, గ్రేటర్ వరంగల్ మున్సిపల్ కార్పొరేషన్ ఎన్నికల్లో గణనీయమైన డివిజన్లలో గెలిచి బీజేపీ బలపడుతున్న సంకేతాలు, హుజూరాబాద్ ఓటమి టీఆర్‌ఎస్‌కు రాజకీయంగా పెద్ద నష్టం చేసిందనే చెప్పాలి. ఎన్నిక ఏదైనా గెలుపు టీఆర్ఎస్ దే అనే స్థాయి నుంచి గెలవటానికి కష్టపడే స్థాయికి టీఆర్ఎస్ చేరుకోవటం ఆ పార్టీ భవిష్యత్తు విజయాలపై నీలినీడలు కమ్ముతున్నట్లుగానే కనపడుతోంది.