మంచి జీతంతో కూడిన గవర్నమెంట్ జాబ్ కోసం ఎదురు చూస్తున్న అభ్యర్థులకు రైల్వే ఎన్టీపీసీ(నాన్ టెక్నికల్ పాపులర్ క్యాటగిరీస్) ఎగ్జామ్ మంచి అవకాశం. 35,208 పోస్టులకు 2019 మార్చిలో అప్లై చేసిన అభ్యర్థులు ఎగ్జామ్స్ కోసం దాదాపు ఒకటిన్నర సంవత్సర కాలంగా నిరీక్షిస్తున్నారు. 2020 డిసెంబర్ 15 నుంచి కొవిడ్ నిబంధనలకు అనుగుణంగా షిఫ్ట్ల వారీగా సీబీటీ ఎగ్జామ్స్ మొదలవుతాయని కేంద్ర ప్రభుత్వం ఇటీవల ప్రకటించింది. ఈ నేపథ్యంలో అభ్యర్థులు ఎన్టీపీసీ ఎగ్జామ్స్కు ఇప్పటి నుంచే ఎలా ప్రిపేరవ్వాలి… ఏయే అంశాలపై ఫోకస్ పెట్టాలనే అంశాలపై సబ్జెక్ట్ ఎక్స్పర్ట్ ప్రిపరేషన్ ప్లాన్.
ఆర్ఆర్బీ ఎన్టీపీసీ పరీక్ష సీబీటీ–1, సీబీటీ–2, టైపింగ్ స్కిల్ టెస్ట్/కంప్యూటర్ బేస్డ్ ఆప్టిట్యూడ్ టెస్ట్ అనే స్టేజీలలో నిర్వహిస్తారు. సీబీటీ–1 పరీక్ష అన్ని పోస్టులకు కామన్గా ఉంటుంది. ఇది ఆన్లైన్ పరీక్ష. తెలుగుతోపాటు దేశ వ్యాప్తంగా 14 భాషలలో ఈ టెస్ట్ నిర్వహిస్తారు. ఎగ్జామ్100 మార్కులకు ఉంటుంది. ప్రతి తప్పు సమాధానానికి వన్ థర్డ్ మార్కు కోత ఉంటుంది. ఎగ్జామ్ మొత్తం టైం 90 నిమిషాలు. ఇందులో అభ్యర్థి స్కోర్ చేసిన మార్కులు ఫైనల్ సెలక్షన్లో కలుపరు. ఇది కేవలం సీబీటీ–2కు ఎంపిక పరీక్ష మాత్రమే. జనరల్ అభ్యర్థులకు 40 శాతం, ఓబీసీ(నాన్క్రిమీలేయర్)& ఎస్సీలకు 30 శాతం, ఎస్టీ అభ్యర్థులకు 25 శాతం మినిమం క్వాలిఫైయింగ్ మార్క్స్. మొత్తం పోస్టులకు 20 రెట్లు ఉండేవిధంగా అభ్యర్థులను సీబీటీ–2కు ఎంపిక చేస్తారు.
సీబీటీ–2: సీబీటీ–1లో ఉన్న సిలబస్ అంశాలే సీబీటీ–2లోనూ ఉంటాయి. అయితే డిఫికల్టీ లెవెల్ మాత్రం సీబీటీ–2లో పెంచుతారు. సీబీటీ–1తో పోలిస్తే ప్రశ్నల సంఖ్య కూడా పెరుగుతుంది. ఇక్కడ 90 నిమిషాల్లో 120 ప్రశ్నలకు సమాధానాలు రాయాల్సి ఉంటుంది. రెండు పరీక్షలకు కామన్ సిలబస్ ఉంది కాబట్టి ప్రతి సబ్జెక్టును కాన్సెప్ట్ ఓరియెంటెడ్ మెథడ్లో లోతుగా అధ్యయనం చేస్తే విజయం సాధించవచ్చు.
ప్రిపరేషన్ ఇలా..
ఆర్ఆర్బీ ఎన్టీపీసీ పరీక్ష అంత కఠినమైన ఎగ్జామ్ ఏం కాదు. సిలబస్ను ఎగ్జామ్ ప్యాటర్న్ సరిగా అర్థం చేసుకొని ప్రణాళికాబద్ధంగా ప్రిపేరైతే జాబ్ కొట్టడం ఈజీ. సీబీటీ–1లో కనీసం 80 మార్కులు సాధించడానికి ఎలా సన్నద్ధమవ్వాలనేది సబ్జెక్టుల వారీగా చూద్దాం.
మ్యాథమెటిక్స్
ఆర్ఆర్బీ ఎన్టీపీసీలోని అన్ని సెక్షన్లలో అభ్యర్థులకు మ్యాథమెటిక్స్ కష్టంగా అనిపించినప్పటికీ ఒక పద్ధతి ప్రకారం ప్రాక్టీస్ చేస్తే సమస్యలు సాల్వ్ చేయడం సలువు. బేసిక్ అంశాలతో ప్రిపరేషన్ మొదలు పెట్టి కాన్సెప్ట్ మీద కమాండ్ వచ్చిన తర్వాత షార్ట్కట్స్పై దృష్టి పెట్టాలి. ప్రాథమిక అంశాలపై పట్టు సాధిస్తే 30 శాతం ప్రిపరేషన్ పూర్తయినట్లే. ఒక ప్రశ్నకు నిమిషంలోపల ఆన్సర్ చేయగలగాలి. మ్యాథమెటిక్స్ టాపిక్స్ను ఒకదాని తర్వాత ఒకటి క్రమ పద్ధతిలో సాధిస్తే సులభంగా అర్థమవుతాయి.
బేసిక్ అర్థమెటిక్ ఆపరేషన్స్ నుంచి ఒకటి నుంచి 2 ప్రశ్నలు వచ్చే చాన్స్ ఉంటుంది. ఇందులో బోడ్మాస్ను ఉపయోగించి చేసే సింప్లిఫికేషన్స్, వర్గాలు, వర్గమూలాలు, ఘనాలు, ఘనమూలాలు ఉంటాయి. ఎల్సీఎం & హెచ్సీఎఫ్, పర్సంటేజీలు, రేషియో ప్రపోర్షన్, ఏజస్, ప్రాఫిట్, లాస్ అండ్ డిస్కౌంట్, టైమ్ అండ్ వర్క్, పైప్స్ అండ్ సిస్టర్న్, టైమ్, స్పీడ్, డిస్టాన్స్, ట్రైన్స్, బోట్స్ అండ్ స్ట్రీమ్స్, సింపుల్ అండ్ కాంపౌండ్ ఇంట్రెస్ట్, మెన్స్యూరేషన్, ట్రిగనోమెట్రి, బేసిక్ ఆల్జీబ్రా, బేసిక్ జామెట్రి, బేసిక్ స్టాటిస్టిక్స్ టాపిక్స్ నుంచి కనిష్టంగా 1 నుంచి గరిష్టంగా 3 మార్కులు వచ్చే అవకాశం ఉంటుంది. అన్ని చాప్టర్లు పూర్తి చేసిన తర్వాత ఎస్ఎస్సీ, సీడీఎస్ ప్రీవియస్ పేపర్స్ ప్రాక్టీస్ చేయాలి. వీటిలో ప్రశ్నల స్థాయి ఆర్ఆర్బీ కంటే ఎక్కువ ఉన్నప్పటికీ వీటిని సాల్వ్ చేస్తే ఆర్ఆర్బీ మ్యాథమెటిక్స్ ప్రశ్నలు సాధించడం తేలికవుతుంది.
జనరల్ ఇంటెలిజెన్స్ & రీజనింగ్
ఆర్ఆర్బీ ఎన్టీపీసీ ఎగ్జామ్లో అన్ని సెక్షన్లలో తక్కువ శ్రమతో ఎక్కువ మార్కులు స్కోర్ చేసే సెక్షన్ జనరల్ ఇంటెలిజెన్స్ అండ్ రీజనింగ్. ఇందులో ఒక టాపిక్కు మరో దానికి లింక్ ఉండదు. అన్నీ ఇండిపెండెంట్ టాపిక్లే. ఒక్కో చాప్టర్లోని కాన్సెప్ట్ను పూర్తిగా అవగతం చేసుకున్నాకే మరో చాప్టర్ స్టార్ట్ చేస్తే బాగుంటుంది. ఈ సెక్షన్ నుంచి వచ్చే ప్రశ్న ఏదైనా దాన్ని 45 సెకండ్లలో సాల్వ్ చేసేలా ప్రిపేరైతే విజయం సాధించవచ్చు. ఎన్టీపీసీ గత పరీక్ష పత్రాలను పరిశీలిస్తే. కోడింగ్ అండ్ డికోడింగ్, వెన్ డయగ్రామ్స్, అనలాజిస్, క్లాసిఫికేషన్, ఆల్ఫాబెటికల్ అండ్ నంబర్ సిరీస్, సీటింగ్ అరేంజ్మెంట్స్, పజిల్స్, స్టేట్మెంట్ అండ్ కన్క్లూజన్, కోర్స్ ఆఫ్ యాక్షన్, అజ్యంప్షన్స్ చాప్టర్ల నుంచి ఎక్కువ ప్రశ్నలు అడిగారు. మ్యాథమెటికల్ ఆపరేషన్స్, రక్త సంబంధాలు, సిలాగిజమ్, డైరెక్షన్స్, ర్యాంకింగ్స్, డెసిషన్ మేకింగ్, డేటా సఫీషియెన్సీ చాప్టర్ల నుంచి కొంత తక్కువ అడుగుతున్నారు. ఈ టాపిక్స్ అన్ని పూర్తి స్థాయిలో ప్రిపేరైన తర్వాత ఎస్ఎస్సీ ప్రీవియస్ ఇయర్స్ టాపిక్ వైజ్ క్వశ్చన్స్ ప్రాక్టీస్ చేయాలి.
జనరల్ అవేర్నెస్
ఎన్టీపీసీ ఎగ్జామ్ అన్ని సెక్షన్లలో అతి తక్కువ సమయంలో ఆన్సర్ చేయగలిగే సెక్షన్ జనరల్ అవేర్నెస్. మార్కుల పరంగా ఈ సెక్షన్ కీలకం. గత ప్రశ్నపత్రాలను పరిశీలిస్తే జనరల్ సైన్స్ నుంచి బయాలజీలో 3 నుంచి 5 ప్రశ్నలు, కెమిస్టీలో 2 నుంచి 3 ప్రశ్నలు, ఫిజక్స్ నుంచి 2 ప్రశ్నలు అడిగారు. ఇక జీకే విభాగంలోని హిస్టరి నుంచి 5 నుంచి 6, జాగ్రఫి నుంచి 2 నుంచి 3, పాలిటీ నుంచి 2 నుంచి 3, ఎకానమి నుంచి 2, స్టాటిక్ జీకే నుంచి 5 నుంచి 6 ప్రశ్నలు వచ్చాయి. కరెంట్ ఎఫైర్స్ నుంచి అత్యధికంగా 10 నుంచి 11 ప్రశ్నలు ఉన్నాయి. కంప్యూటర్ అప్లికేషన్స్ విభాగం నుంచి 3 నుంచి 4 ప్రశ్నలు వచ్చాయి. విభాగాల వారీగా ఇంపార్టెంట్ టాపిక్స్పై దృష్టి పెడితే ఓవరాల్గా మంచి మార్కులు స్కోర్ చేయొచ్చు. బయాలజీలో వ్యాధులు, శాస్త్రీయనామాలు, ఇన్వెన్షన్స్, కణం, టిష్యూ, మానవశరీరం టాపిక్స్ చూసుకోవాలి. కెమిస్ట్రిలో ఆటమ్, ఆసిడ్, బేస్, సాల్ట్, మెటల్ అండ్ నాన్మెటల్, పీహెచ్ స్కేల్, పీరియాడిక్ టేబుల్, కెమికల్ ఫార్ములాలు స్టడీ చేయాలి. ఫిజిక్స్లో మోషన్, లైట్, గ్రావిటి, ఎనర్జి, హీట్ టాపిక్స్పై దృష్టి పెట్టాలి. హిస్టరీ నుంచి ఆర్ట్స్ అండ్ కల్చర్, బిల్డింగ్స్ అండ్ మాన్యుమెంట్స్, ప్లేసెస్, జాతీయోద్యమం, ఫేమస్ పర్సనాలిటీస్ అంశాలు చదవాలి. జాగ్రఫీలో ఫిజికల్, సోషల్, ఎకనామిక్ జాగ్రఫి ఆఫ్ ఇండియా & వరల్డ్ చూసుకోవాలి. పాలిటీలో ఇండియన్ పాలిటీ, గవర్నెన్స్ అండ్ కానిస్టిట్యూషన్, ఎకానమిలో ప్రభుత్వ పథకాలు, యూఎన్ తదితర అంతర్జాతీయ సంస్థలు, ఇండియన్ ఎకానమి, కంపెనీలు, ఆర్బీఐ తదితర అంశాలపై ఫోకస్ పెట్టాలి. కంప్యూటర్ అండ్ అప్లికేషన్స్ విభాగం నుంచి కంప్యూటర్ గురించి బేసిక్ ప్రశ్నలు ఇస్తారు.
స్టాటిక్ జీకే & కరెంట్ ఎఫైర్స్
స్టాటిక్ జీకేలో గవర్నర్/స్టేట్ క్యాపిటల్, క్యాపిటల్ అండ్ కరెన్సీ, రివర్స్ అండ్ సిటీస్, డ్యాంలు, నేషనల్ పార్కులు, బయోడైవర్సిటీ, అంతర్జాతీయ సరిహద్దులు, విమానాశ్రయాలు, ఓడరేవులు, డిస్కవరి అండ్ ఇన్వెన్షన్స్, సైంటిఫిక్ ఇన్స్ట్రుమెంట్స్, మిలటరీ ఆపరేషన్స్ తదితర అంశాలు చూసుకోవాలి. కరెంట్ ఎఫైర్స్లో ముఖ్యమైన తేదీలు, కొవిడ్–19, ఎన్ఆర్సీ, సీఈఈ, ముఖ్యమైన సదస్సులు, అవార్డులు, బడ్జెట్ 2020–21, క్యాబినెట్ మినిస్టర్స్, స్పోర్ట్స్ పర్సన్స్, అపాయింట్మెంట్స్ అండ్ డెత్స్ ఫాలో కావాలి.
జనరల్ అవేర్నెస్లో ఒక్కో చాప్టర్కు సంబంధించి నోట్స్ ప్రిపేర్ చేసుకొని రివిజన్ చేస్తూ.. చదివితే బాగా ఉపయోగం ఉంటుంది. కరెంట్ ఎఫైర్స్ కోసం రోజూ న్యూస్ పేపర్ చదవడం తప్పనిసరి. దాదాపు ఎగ్జామ్కు ముందు 9 నెలల డెవలప్మెంట్స్ స్టడీ చేయాలి. జీకేకు సంబంధించి విషయాలను బట్టీపట్టకుండా పరిస్థితులను, సంఘటనలను కారణాలతో నేర్చుకుంటే బాగా ఉపయోగం ఉంటుంది. జనరల్ సైన్స్ కోసం ఎన్సీఈఆర్టీ లేదా స్టేట్ సిలబస్కు సంబంధించి 8,9,10 తరగతుల బయాలజీ, ఫిజికల్సైన్స్ బుక్స్ చదవాలి.
1.26 కోట్ల మంది పోటీ
పోస్టులు: 35,208 పోస్టులకు దేశవ్యాప్తంగా దాదాపు 1.26 కోట్ల మంది అభ్యర్థులు పోటీపడుతున్నారు. ఇందులో డిగ్రీ క్వాలిఫికేషన్తో 24,605 పోస్టులు, ఇంటర్ క్వాలిఫికేషన్తో 10,603 పోస్టులు ఉన్నాయి.
ఇంటర్తో: జూనియర్ క్లర్క్ కమ్ టైపిస్ట్, అకౌంట్ క్లర్క్ కమ్ టైపిస్ట్, జూనియర్ టైం కీపర్, ట్రైన్స్ క్లర్క్, కమర్షియల్ కమ్ టికెట్ క్లర్క్
డిగ్రీతో: ట్రాఫిక్ అసిస్టెంట్, గూడ్స్ గార్డ్, సీనియర్ కమర్షియల్ కమ్ టికెట్ క్లర్క్, సీనియర్ క్లర్క్ కమ్ టైపిస్ట్, జూనియర్ అకౌంట్ అసిస్టెంట్ కమ్ టైపిస్ట్, సీనియర్ టైం కీపర్, కమర్షియల్ అప్రెంటీస్, స్టేషన్ మాస్టర్ పోస్టులు ఉన్నాయి.
