- ఉమ్మడి వరంగల్, కరీంనగర్, ఖమ్మం జిల్లాల్లో వైరల్
- వరంగల్ సీపీకి విద్యాశాఖ అధికారుల ఫిర్యాదు
- ఫ్రెండ్కు చిట్టీలు అందించడం కోసమే సెల్లో ఫొటోలు: సీపీ
- వాటిని సోషల్ మీడియాలో షేర్ చేసిన మైనర్
- కమలాపూర్ బాయ్స్ హైస్కూల్ నుంచి బయటకొచ్చినట్టు వెల్లడి
- మైనర్ సహా ఇద్దరు యువకుల అరెస్ట్..మూడు ఫోన్లు సీజ్
హనుమకొండ, వెలుగు: టెన్త్ పరీక్షలు మొదలైన తొలి రోజే నిమిషాల వ్యవధిలోనే తెలుగు పేపర్బయటకు రాగా.. రెండో రోజు హిందీ పేపర్ కూడా అలాగే సోషల్ మీడియాలో ప్రత్యక్షమైంది. మంగళవారం ఉదయం 9.30 గంటలకు పరీక్ష మొదలు కాగా అర్ధ గంటలోపే ప్రశ్నపత్రం వాట్సప్లో చక్కర్లు కొట్టింది. ఉమ్మడి వరంగల్, కరీంనగర్ జిల్లాలోని వాట్సప్ గ్రూపుల్లో ఉదయం 10.30 గంటల నుంచే వైరల్ అయ్యింది. రెండు రోజుల్లో రెండు పేపర్లు బయటకు రావడం రాష్ట్రవ్యాప్తంగా కలకలం రేపింది. బిల్డింగ్ ఎక్కి.. మొబైల్లో ఫొటోలు తీసి..టెన్త్ పరీక్ష రాస్తున్న తన ఫ్రెండ్కు చిట్టీలు అందించడం కోసమే ఓ మైనర్హిందీ క్వశ్చన్ పేపర్ను ఫొటోలు తీశాడని, వాటిని ఇంకో ఇద్దరు వైరల్ చేశారని వరంగల్ సీపీ ఏవీ రంగనాథ్ చెప్పారు.
హిందీ పేపర్కు సంబంధించి మైనర్, మరో ఇద్దరు నిందితులను అరెస్ట్ చేసి.. మూడు సెల్ ఫోన్లు స్వాధీనం చేసుకున్నామని చెప్పారు. మంగళవారం వరంగల్ కమిషనరేట్లో సీపీ రంగనాథ్ వివరాలను వెల్లడించారు. ఆయన తెలిపిన వివరాల ప్రకారం.. కమలాపూర్కు చెందిన శివ(మైనర్) స్నేహితుడు అదే మండలం ఉప్పల్ లో టెన్త్ పరీక్షలు రాస్తున్నాడు. ఫ్రెండ్కు చిట్టీలు అందించాలనే ఉద్దేశంతో శివ మంగళవారం ఉదయం కమలాపూర్ లోని జడ్పీ స్కూల్కు వెళ్లాడు. పక్కనే ఉన్న చెట్టు ద్వారా మూడు ఫ్లోర్లు బిల్డింగ్ ఫస్ట్ ఫ్లోర్ వరకు ఎక్కి రూమ్ నెంబర్3 వద్దకు వెళ్లాడు.
అక్కడ పరీక్ష రాస్తున్న హరీశ్నుంచి హిందీ పేపర్ తీసుకుని 9.45 గంటలకు మొబైల్లో ఫొటోలు తీసుకున్నాడు. 9.59 గంటలకు వాటిని కమలాపూర్కు చెందిన మౌటం శివగణేశ్కు వాట్సప్లో పంపాడు. శివగణేశ్ఆ ఫొటోలను 31 మంది ఉన్న వాట్సప్ గ్రూప్కు ఫార్వార్డ్ చేశాడు. అదే గ్రూపులోని ఓ వ్యక్తి తన బంధువైన ఓ పత్రిక మాజీ రిపోర్టర్ అయిన గుండెబోయిన మహేశ్ కు పంపించాడు. మహేశ్ దానిని ఓ టీవీ చానల్లో పనిచేసి మానేసిన బూరం ప్రశాంత్కు ఫార్వార్డ్ చేశాడు.
మాల్ ప్రాక్టీసింగ్ యాక్ట్ కింద కేసు: సీపీ
ప్రశాంత్ తనకు వచ్చిన పేపర్ను ‘సీను ఫ్రెండ్స్’అనే మీడియా వ్యక్తుల గ్రూప్లో పోస్ట్ చేశాడని సీపీ చెప్పారు. ప్రభుత్వ ఎగ్జామినేషన్ సిస్టం సరిగా లేదనే భావన కలిగించాలనే దురుద్దేశంతో ఉదయం 10.46కి గ్రూప్లో ఫొటోలు పెట్టి 9.35 కే పేపర్ బయటకు వచ్చినట్టు ఓ మెసేజ్ క్రియేట్ చేశాడన్నారు. ‘వరంగల్ లో ఎస్ఎస్సీ హిందీ పేపర్ లీక్.. ఉదయం 9.30కే లీకైన ప్రశ్నపత్రం.. వరుసగా రెండో రోజు ప్రశ్నపత్రం లీక్ అవడంతో తల్లిదండ్రులు ఆందోళన చెందుతున్నారు. ఎస్ఎస్సీ స్టూడెంట్స్ వాట్సప్ గ్రూప్ లో ప్రత్యక్షమైన హిందీ ప్రశ్నపత్రం’అనే మెసేజ్ను వివిధ గ్రూపులతోపాటు మీడియా ప్రతినిధులకు పంపించాడని తెలిపారు.
బీజేపీ రాష్ట్ర అధ్యక్షుడు బండి సంజయ్ కి కూడా ఉదయం 11.30 గంటలకు పేపర్ పంపించినట్లు వెల్లడించారు. పేపర్ తనకు చేరిన రెండు గంటల్లోనే వివిధ వ్యక్తులు, మీడియా ప్రతినిధులకు సంబంధించిన 142 ఫోన్ కాల్స్ను ప్రశాంత్ మాట్లాడినట్టు సీపీ వివరించారు. ప్రశాంత్ ద్వారానే అన్ని గ్రూపులకు మెసేజ్ చేరిందన్నారు. తెలంగాణ మాల్ప్రాక్టీసింగ్ యాక్ట్ సెక్షన్ 5 కింద కేసు నమోదు చేసినట్లు సీపీ చెప్పారు. మైనర్ ను జువైనల్ హోమ్కు.. శివగణేశ్, ప్రశాంత్ ను రిమాండ్కు తరలించినట్లు సీపీ వివరించారు. మహేశ్ను కూడా అరెస్ట్ చేయనున్నట్లు తెలిపారు. సైబర్ క్రైమ్ పోలీసుల సాయంతో నిందితులను గుర్తించినట్టు సీపీ చెప్పారు.
ఆఫీసర్లకు విద్యాశాఖ మంత్రి ఆదేశాలు
టెన్త్ పేపర్ సోషల్ మీడియాలో చెక్కర్లు కొట్టడంపై విద్యా శాఖ మంత్రి సబితా ఇంద్రారెడ్డి, సీఎస్ శాంతికుమారి అన్నిజిల్లాల కలెక్టర్లు, పోలీస్ ఉన్నతాధికారులు, విద్యాశాఖ ఆఫీసర్లతో వీడియో కాన్ఫరెన్స్ నిర్వహించారు. వెంటనే నిందితులను గుర్తించాలని వరంగల్ సీపీకి ఆదేశాలు ఇచ్చారు. మరోవైపు పేపర్ ఎలా బయటకొచ్చిందో తేల్చాలని స్యూల్ఎడ్యుకేషన్ డైరెక్టర్శ్రీదేవసేన వరంగల్, హనుమకొండ డీఈవోలు వాసంతి, అబ్ధుల్ హైని ఆదేశించారు. దీంతో వారు వరంగల్ సీపీ ఏవీ రంగనాథ్కు ఈ అంశంపై ఫిర్యాదు చేశారు.
ఇన్విజిలేటర్లు.. సెక్యూరిటీ స్టాఫ్ ఏం చేస్తున్నరు?
చెట్టు మీదుగా బిల్డింగ్ ఎక్కి శివ ఫొటోలు తీసుకున్నట్లు పోలీసులు చెబుతుండగా.. ఇన్విజిలేటర్తోపాటు ఎగ్జామినేషన్ సెంటర్ సెక్యూరిటీ సిబ్బంది, స్కూల్ స్టాఫ్ ఉండగా ఇదంతా ఎలా సాధ్యమైందనే అనుమానాలు కలుగుతున్నాయి. ముగ్గురిని అరెస్ట్ చేయగా.. ఇన్విజిలేటర్తోపాటు ఇతర సిబ్బందిపై యాక్షన్ తీసుకోకపోవడం విమర్శలకు తావిస్తోంది.
