మెదక్, నర్సాపూర్, వెలుగు : నర్సాపూర్ మున్సిపల్ చైర్మన్బీజేపీలోకి వెళ్లిండని అతడి పదవికి అధికార పార్టీ కౌన్సిలర్లు ఎసరు పెట్టేందుకు పక్కా ప్లాన్తో ముందుకెళ్తున్నారు. అందులో భాగంగా బీఆర్ఎస్ పార్టీకి చెందిన వైస్ చైర్మన్ సహా 8 మంది కౌన్సిలర్లు అవిశ్వాసం ప్రకటించారు. ఈ మేరకు వారు సోమవారం కలెక్టర్ కు నోటీస్ ఇచ్చారు. నర్సాపూర్ పట్టణం గ్రామ పంచాయతీ నుంచి మున్సిపాలిటీగా అప్ గ్రేడ్ కాగా 2020 జనవరిలో మొదటిసారి మున్సిపల్ ఎన్నికలు జరిగాయి. మొత్తం 15 వార్డులు ఉండగా 8 వార్డుల్లో బీఆర్ఎస్ క్యాండిడేట్లు, నాలుగు వార్డుల్లో బీజేపీ క్యాండిడేట్లు, మూడు వార్డుల్లో ఇండిపెండెంట్లు కౌన్సిలర్లుగా గెలిచారు. బీఆర్ఎస్ కు సంపూర్ణ మెజారిటీ ఉండటంతో ఆ పార్టీకి చెందిన 13వ వార్డు కౌన్సిలర్ మురళీ యాదవ్ మున్సిపల్ చైర్మన్గా, 6వ వార్డు కౌన్సిలర్ నయీమొద్దీన్ వైస్ చైర్మన్ గా ఎన్నికయ్యారు. కాగా 2018 అసెంబ్లీ ఎన్నికల్లో నర్సాపూర్ ఎమ్మెల్యే టికెట్ ఆశించి భంగపడ్డ ఆయనకు మున్సిపల్ చైర్మన్పదవి దక్కినప్పటికీ, పార్టీ తనకు సముచిత స్థానం కల్పించలేదని బీఆర్ఎస్ అధిష్టానంపై లోలోన అసంతృప్తితోనే ఉన్నారు. ఈ క్రమంలోనే ఆయన బీఆర్ఎస్ లో బీసీలకు అన్యాయం జరుగుతుందని గతేడాది ఆగస్టులో ప్రెస్మీట్ పెట్టి పార్టీ అధిష్టానం, సీఎం కేసీఆర్పై తీవ్రస్థాయిలో విమర్శలు చేశారు. దీంతో పార్టీ వ్యతిరేఖ కార్యకలాపాలకు పాల్పడ్డారంటూ ఆయనను బీఆర్ఎస్ పార్టీ నుంచి సస్పెండ్ చేశారు. దీంతో గత అక్టోబర్ లో ఇద్దరు బీఆర్ఎస్ కౌన్సిలర్లతో కలిసి మురళీ యాదవ్ బీజేపీలో చేరారు. అప్పటి నుంచి ఆయన బీఆర్ఎస్ప్రభుత్వంపై, స్థానిక ఎమ్మెల్యేపై విమర్శలు గుప్పిస్తూనే ఉన్నారు. ఈ నేపథ్యంలో అతడిని చైర్మన్ పదవి నుంచి తప్పించాలని బీఆర్ఎస్ పార్టీ పెద్దలు భావిస్తున్నారు. మున్సిపల్ కౌన్సిల్లో ఆ పార్టీ బలం 8గా ఉండటంతోపాటు, అవసరమైతే ఎక్స్ అఫీఫియో సభ్యులైన స్థానిక ఎమ్మెల్యే, ఎమ్మెల్సీల ఓటుతో చైర్మన్ పదవి దక్కించుకోవచ్చని అవిశ్వాస తీర్మానం ప్రవేశపెట్టేందుకు సిద్ధమయ్యారు. ఈ పరిస్థితో మున్సిపాలిటీలో ఒక్కసారిగా రాజకీయ వేడీ పెరిగింది.
అవిశ్వాసం నోటీస్ ఇచ్చింది వీరే..
నర్సాపూర్ 6వ వార్డు కౌన్సిలర్ అయిన వైస్ చైర్మన్ నయిముద్దీన్ సహా 1వ వార్డు కౌన్సిలర్ అశోక్ గౌడ్, 3వ వార్డు కౌన్సిలర్ ఇస్రత్ బేగం, 7వ వార్డు కౌన్సిలర్ రుక్కమ్మ, 8వ వార్డు కౌన్సిలర్ రాంచందర్, 12వ వార్డు కౌన్సిలర్ లక్ష్మి, 14వ వార్డు కౌన్సిలర్ సరిత, 15వ వార్డు కౌన్సిలర్ లలిత ఇటీవల స్థానిక ఎమ్మెల్యే మదన్ రెడ్డి, రాష్ట్ర మహిళా కమిషన్ చైర్ పర్సన్ సునీతా రెడ్డి ఆధ్వర్యంలో జిల్లా మంత్రి హరీశ్ రావు ను కలిసి చైర్మన్ పై అవిశ్వాసం ప్రవేశపెట్టే విషయమై చర్చించారు. పార్టీ హైకమాండ్ నుంచి గ్రీన్ సిగ్నల్ రావడంతో వైస్ చైర్మన్ నయిమొద్దీన్ సహా 8 మంది బీఆర్ఎస్ కౌన్సిలర్లు సోమవారం మెదక్ కలెక్టరేట్ కు వచ్చి కలెక్టర్ రాజర్షి షాకు అవిశ్వాసం నోటీసు అందజేశారు. మరి ఈ విషయంలో కలెక్టర్ ఏం నిర్ణయం తీసుకుంటారో వేచి చూడాలి.
చైర్మన్ రేసులో ఆ ఇద్దరు?
బీఆర్ఎస్ కౌన్సిలర్ల అవిశ్వాస ప్రయత్నాలు ఫలించి మురళీ యాదవ్ చైర్మన్ పదవి కోల్పోతే బీఆర్ఎస్ లో ఎవరికి చాన్స్ వస్తుందన్నది ఆసక్తికరంగా మారింది. కౌన్సిల్లో బీఆర్ఎస్ పార్టీకి ఎనిమిది మంది కౌన్సిలర్లు ఉండగా వారిలో 6వ వార్డు కౌన్సిలర్గా గెలిచి వైస్ చైర్మన్ అయిన నయిమొద్దీన్ తో పాటు, ఒకటో వార్డు కౌన్సిలర్ అశోక్ గౌడ్ చైర్మన్ పదవి ఆశిస్తున్నట్టు తెలుస్తోంది. పార్టీలో సీనియర్ లీడర్ అయిన అశోక్ గౌడ్ మున్సిపల్ ఎన్నికల సమయంలోనే చైర్మన్ పదవి ఆశించారు. అయితే పార్టీ అధిష్టానం మురళీ యాదవ్కు అవకాశం ఇచ్చింది. చైర్మన్ పదవి ఆశించిన అశోక్ గౌడ్ భార్యకు వ్యవసాయ మార్కెట్ కమిటీ చైర్మన్ పదవి ఇచ్చింది. కాగా ఇప్పుడు అవకాశం రావడంతో అశోక్ గౌడ్ మున్సిపల్ చైర్మన్ పదవి కోసం తనవంతు ప్రయత్నాలు చేస్తున్నట్లు తెలుస్తోంది.
