నల్గొండ, వెలుగు : నల్గొండ జిల్లాలో బీఆర్ఎస్టికెట్దక్కని ఆశావహులంతా రగిలిపోతున్నారు. ఎమ్మెల్యే టికెట్ఆశించిన ముఖ్య నేతల్లో నకిరేకల్ మాజీ ఎమ్మెల్యే వేముల వీరేశం, మాజీ మంత్రి మోత్కుపల్లి నర్సింహులు, మాజీ ఎమ్మెల్యే బూడిద భిక్షమయ్య గౌడ్ (ఆలేరు), మండలి చైర్మన్ గుత్తా సుఖేందర్రెడ్డి కొడుకు అమిత్ రెడ్డి, కర్నాటి విద్యాసాగర్(మునుగోడు), సినీ హీరో అల్లు అర్జున్మామ కంచర్ల చంద్రశేఖర్ రెడ్డి, మన్నెం రంజిత్ యాదవ్ (సాగర్), పిల్లి రామరాజు యాదవ్, చాడ కిషన్ రెడ్డి (నల్గొండ), కన్మంత శశిధర్ రెడ్డి (కోదాడ) ఉన్నారు.
టికెట్ దక్కిన ఎమ్మెల్యేలంతా మంత్రి జగదీశ్రెడ్డి ఆధ్వర్యంలో హైదరాబాద్లో సీఎంను కలిసి కృతజ్ఞతలు చెప్పేందుకు వెళ్లగా, ఆయా నియోజకవర్గాల్లోని ఆశావహులు భవిష్యత్ కార్యచరణపై తమ అనుచరులతో సమావేశమవుతున్నారు. మంగళవారం నాగార్జునసాగర్, దేవరకొండ, నియోజకవర్గాల్లో ఎమ్మెల్యేల వ్యతిరేక వర్గం భేటీ కాగా, నకిరేకల్, కోదాడ, నల్గొండ, మునుగోడులో ఆశావహులు, అసంతృప్తులు ఒకటిరెండు రోజుల్లో భారీ సమావేశాలకు ఏర్పాట్లు చేస్తున్నారు.
మాజీ ఎమ్మెల్యే వేముల వీరేశం బుధవారం నకిరేకల్లోని ఓ ఫంక్షన్ హాల్లో ఆత్మీయ సమావేశం నిర్వహించబోతున్నారు. దీనికి నియోజకవర్గంలోని వీరేశం అనుచరులు, బీఆర్ఎస్ లీడర్లందరినీ ఆహ్వానించారు. వాళ్ల అందరితో చర్చించి బుధవారం ఆయన నిర్ణయాన్ని ప్రకటిస్తారని పార్టీ నాయకులు చెబుతున్నారు. ఖమ్మం మాజీ ఎంపీ పొంగులేటి శ్రీనివాస్ రెడ్డి సపోర్ట్తో కాంగ్రెస్లో చేరేందుకు వీరేశం సిద్ధమైనట్లు తెలిసింది.
