- సనత్నగర్ ఘటనలో డాక్టర్ల ప్రాథమిక అంచనా
పంజాగుట్ట, వెలుగు: హైదరాబాద్లోని సనత్నగర్లో అనుమానాస్పద స్థితిలో చనిపోయిన ముగ్గురి మృతి మిస్టరీ ఇంకా వీడలేదు. జెక్కాలనీలో ఒకే కుటుంబానికి చెందిన తల్లిదండ్రులు మాధవి, వెంకటేశ్తో పాటు వారి కొడుకు హరికృష్ణ.. బాత్రూమ్లో విగతజీవులుగా కనిపించిన విషయం తెలిసిందే. వీరి మృతికి కరెంట్షాకే కారణమనే అనుమానాలు మొదట వ్యక్తమయ్యాయి.
కానీ, గ్యాస్తో నడిచే గీజర్ నుంచి వెలువడిన కార్బన్ మోనాక్సైడ్ వాయువు పీల్చడం వల్లే ముగ్గురూ స్పృహ కోల్పోయి ఊపిరి ఆడక చనిపోయి ఉండవచ్చని పోస్టుమార్టమ్ చేసిన గాంధీ డాక్టర్లు ప్రాథమిక అంచనాకు వచ్చారు. కార్బన్ మోనాక్సైడ్ వాయువును పీల్చిన ఐదు నిమిషాలకే వారు సృహతప్పి పడి ఉంటారని, ఆ తర్వాత ఆక్సిజన్ అందక ప్రాణాలు కోల్పోయి ఉంటారని అనుమానిస్తున్నారు. కాగా, కొన్ని శరీర భాగాలను పరీక్షల కోసం పంపామని, అవి వస్తేనే మృతికి గల అసలు కారణాలు తెలుస్తాయని డాక్టర్లు తెలిపారు.
