- భారీగా ఆయుధాలు స్వాధీనం
భద్రాచలం, వెలుగు: ఛత్తీస్ గడ్ రాష్ట్రంలోని బీజాపూర్ జిల్లా పామేడు పోలీస్స్టేషన్ పరిధిలోని రేఖాపల్లి అడవుల్లో శుక్రవారం జరిగిన ఎన్కౌంటర్ లో ముగ్గురు మావోయిస్టులు హతమయ్యారు. బస్తర్ ఐజీ సుందర్రాజ్ పి కథనం ప్రకారం.. ఊసూరు, బాసగూడ, పామేడు పోలీస్స్టేషన్ల పరిధిలోని అడవుల్లో పీఎల్జీఏ బెటాలియన్ మావోయిస్టులు భారీ సంఖ్యలో సమావేశం అయ్యారన్న పక్కా సమాచారంతో సీఆర్పీఎఫ్ కోబ్రా 210 బెటాలియన్, డీఆర్జీ బలగాలను రంగంలోకి దించారు.
గురువారం నుంచే బలగాలు కూంబింగ్ ఆపరేషన్ చేపట్టి ఈ ప్రాంతాన్ని జల్లెడ పట్టాయి. ఈ క్రమంలో శుక్రవారం ఉదయం 11 గంటల ప్రాంతంలో బలగాలకు మావోయిస్టులు తారసపడ్డారు. పారిపోతూ మావోయిస్టులు కాల్పులకు తెగబడ్డారు. దీంతో రేఖాపల్లి అటవీ ప్రాంతంలో ఇరువర్గాల మధ్య హోరాహోరీగా కాల్పలు జరగగా, ముగ్గురు మావోయిస్టులు చనిపోయారు. ఒక ఎస్ఎల్ఆర్, 303, ఇన్సాస్ తుపాకీ, రెండు దేశీ నాటు తుపాకులు, ఇతర సామాగ్రిని స్వాధీనం చేసుకున్నారు. భారీ సంఖ్యలో మావోయిస్టులు గాయపడ్డారని వారి కోసం గాలిస్తున్నట్లు ఐజీ తెలిపారు. భద్రతాబలగాలు సురక్షితంగా ఉన్నాయని పేర్కొన్నారు.
