భారతదేశంలోని మరో మూడు చిత్తడి నేలలు రామ్సర్ సైట్స్ జాబితాలో చేరాయి.తమిళనాడు రాష్ట్రంలోని నంజరాయన్, కజువేలి పక్షుల అభయారణ్యాలు, మధ్యప్రదేశ్లోని తవా రిజర్వాయర్ రామ్సర్ సైట్స్ జాబితాలో చేరాయి. వీటితో కలిపి ఇప్పటివరకు రామ్సర్ జాబితాలో చేరిన చిత్తడి నేలలు సంఖ్య 85కు చేరింది. దేశంలో 13,58,068 హెక్టార్ల విస్తీర్ణంలో అంతర్జాతీయ ప్రాముఖ్యం కలిగిన చిత్తడి నేలలు విస్తరించి ఉన్నాయి.
నంజరాయన్ పక్షుల అభయారణ్యం: తమిళనాడు రాష్ట్రం తిరుప్పూర్ జిల్లాలో నంజరాయన్ పక్షుల అభయారణ్యం ఉంది. ఈ అభయారణ్యంలో అనేక రకాల సరీసృపాలు, చేపలు, ఉభయచరాలు, వృక్ష జాతులతోపాటు దాదాపు 130 పక్షి జాతులు ఉన్నాయి.
కజువేలి పక్షుల అభయారణ్యం: తమిళనాడు రాష్ట్రం విల్లుపురం జిల్లాలో కజువేలి పక్షుల అభయారణ్యం ఉంది. పులికాట్ సరస్సు తర్వాత దక్షిణ భారతదేశంలోని రెండో అతి పెద్ద ఉప్పునీటి సరస్సు. కజువేలి సరస్సులో 226 జీవజాతులు ఉన్నాయి. మధ్య ఆసియా, సైబీరియా నుంచి అనేక సుదూర వలస పక్షులు ఇక్కడి వస్తుంటాయి.
తవా రిజర్వాయర్: ఇది తవా నదిపై ఆనకట్ట నిర్మించడం ద్వారా ఏర్పడిన మానవ నిర్మిత సరస్సు. మధ్యప్రదేశ్ రాష్ట్రం నర్మదాపురం జిల్లాలో ఉంది. ఈ రిజర్వాయర్ సాత్పుర నేషనల్ పార్క్, బోరి వన్యప్రాణుల అభయారణ్యంతో పశ్చిమ సరిహద్దును ఏర్పరుస్తుంది.
రామ్సర్ చిత్తడి నేలలు
అంతర్జాతీయ చిత్తడి నేలల పరిరక్షణ తొలి సదస్సు జరిగిన 1997, ఫిబ్రవరి 2ను ప్రతి ఏటా ప్రపంచ చిత్తడి నేలల దినోత్సవంగా జరుపుకుంటారు. రామ్సర్ ఒప్పందంలో 1982, ఫిబ్రవరి 1న భారత్ చేరింది. 1982లో జరిగిన కన్వెన్షన్లో భాగస్వామైంది.
