వడ్ల కమీషన్​ చెల్లింపులో జాప్యం..కాంటాలు పెట్టిన సింగిల్​ విండోలపై ఆర్థిక భారం

• మూడు సీజన్ల బకాయిలు రూ.45 కోట్లు
• గన్నీ బ్యాగ్​ల షార్టేజ్​ పేరుతో పైసల కటింగ్​

నిజామాబాద్, వెలుగు : వడ్ల కొనుగోలు సెంటర్లకు మూడు సీజన్ల కమీషన్ ఇంకా చెల్లించలేదు. దీంతో కాంటాలు పెట్టి  ధాన్యాన్ని మిల్లులకు రవాణా చేసిన సింగిల్​ విండోలు, ఐడీసీఎంఎస్, మెప్మా తదితర సంస్థలు ఆర్థిక ఇబ్బందులు ఎదుర్కొంటున్నాయి. సీజన్​ ముగియగానే చెల్లించాల్సిన కమీషన్​ రకరకాల కొర్రీలు పెడుతూ అధికారులు పెండింగ్​ పెడుతున్నారు. 2023–-24 ఖరీఫ్​, యాసంగి సీజన్ల​ కమీషన్​తో పాటు ముగిసిన 2024–-25 వానాకాలం సీజన్​ సొమ్ము అందాల్సి ఉంది. 

ప్రతి సీజన్​కు కనీసం రూ.15 కోట్లు

జిల్లాలో వరి సాగు విస్తీర్ణం ఏటా పెరిగి 4.20 లక్షల ఎకరాలకు చేరింది. ప్రతి సీజన్​కు సుమారు 12 లక్షల మెట్రిక్​ టన్నుల ధాన్యం దిగుబడి వస్తోంది. ఇందులో కొంత భాగాన్ని మిల్లర్లు కొనగా సర్కారు పక్షాన కొనుగోళ్లు చేయడానికి సెంటర్లు ఏర్పాటు చేస్తారు.  రైతులకు గిట్టుబాటుధర కల్పించడంతోపాటు సెంటర్ల నిర్వహించే సింగిల్​ విండోలు,మహిళా సంఘాలకు ఆర్థిక తోడ్పాటును అందించడం కోసం సెంటర్లను ఏర్పాటు చేశారు. సింగిల్​ విండోలకు క్వింటాల్​కు రూ.32 కమీషన్​ రూపంలో ఇస్తారు. మెప్మా, రైతు సహకార సంఘాలకు కూడా కొన్ని సెంటర్ల నిర్వహణ అప్పగిస్తున్నారు.  

సీజన్​ ముగియగానే వడ్ల కొనుగోలు లెక్కలు చూసి కమీషన్​ చెల్లించాలి. కానీ, గత మూడు సీజన్​ల నుంచి అలా జరుగడంలేదు. 2023–-24 వానాకాలం 482 సెంటర్లు ఏర్పాటు చేసి 3.90 లక్షల మెట్రిక్​ టన్నులు, యాసంగిలో సీజన్​లో 467 కేంద్రాలు ఏర్పాటు చేసి 3.92 లక్షల టన్నుల ధాన్యం సివిల్​ సప్లయ్ డిపార్ట్​మెంట్​​ వడ్లు కొనుగోలు  చేసింది.   ప్రతి సీజన్​ కమీషన్​ రూ.15 కోట్ల చొప్పున సెంటర్​ నిర్వాహకులకు అందాలి.  2024–-25 ఖరీఫ్​లో 579 సెంటర్ల ద్వారా సుమారు 4 లక్షల టన్నుల వడ్లు సివిల్​ సప్లయ్​ సేకరించింది. ఈ కమీషన్​ కూడా రూ.15 కోట్ల దాకా ఉంది.

వెరసి మూడు సీజన్​లకు చెందిన రూ.45 కోట్ల కమీషన్​ బకాయిలు రిలీజ్​ కావడంలేదు. సెంటర్ల నిర్వహణలో సింగిల్​ విండోలు 90 శాతం బిజినెస్​ చేయగా  ఐడీసీఎంఎస్​, మెప్మా, రైతు సంఘాలు కలిసి పది శాతం కొనుగోళ్లు చేస్తాయి. కమీషన్​ రూపంలో ఒక సీజన్​కు రూ.16 లక్షలు సంపాదించే సింగిల్​ విండోలు జిల్లాలో ఉన్నాయి. ఈ సొమ్ము చెల్లింపులో జరుగుతున్న జాప్యం వల్ల సింగిల్​ విండోల ఆర్థిక స్థితిపై ప్రభావం చూపుతున్నాయి.

వడ్ల కాంటాలు పెట్టే టైంలో సివిల్​ సప్లయ్​ అధికారులు ఇచ్చిన కొత్త గన్నీ బ్యాగుల షార్టేజ్​ వస్తే కొనుగోలు సెంటర్ల నిర్వాహకులకు కమీషన్​లో రూ.60, పాత బ్యాగ్​లకు రూ.40 కోత పెడుతున్నారు. సీజన్​లో తమకు అందేనాటికే బ్యాగ్​లు తక్కువగా ఉంటున్నాయని దానికి తమను బాధ్యులను చేయడం కరెక్ట్​ కాదని సింగిల్​ విండో సెక్రటరీలు అంటున్నారు.  

 సింగిల్​ విండోల ఇన్​కమ్​ కోసం..

ఉమ్మడి జిల్లాలో 141 సింగిల్​ విండోలు ఉండగా వాటిలో కామారెడ్డిలో 54, నిజామాబాద్​ జిల్లాలో 87 నడుస్తున్నాయి. వ్యవసాయ సంబంధమైన సేవలు అన్నదాతలకు అందించడానికి వీటిని ఏర్పాటు చేశారు. ఎరువులు, క్రిమిసంహారక మందులు రైతులకు అమ్మడంతో పాటు డీసీసీబీ బ్యాంకు నుంచి పంట రుణాలు, షార్ట్​, లాంగ్​ టర్మ్​ లోన్లు  మంజూరు చేయడంలో సింగిల్​ విండోలు కీలక పాత్ర పోషిస్తాయి.

ఇన్​కమ్​ యాక్టివిటీ రెగ్యూలర్​గా ఉంటేనే వాటి మనుగడకు ఢోకా ఉండదు. రూ.కోట్లలో పేరుకున్న కమీషన్​ బకాయిలు సింగిల్​ విండోలతో పాటు వడ్ల కొనుగోలు సెంటర్లు నిర్వహించిన ఇతర సంస్థలకు ఇబ్బందిగా మారింది. 

డబ్బు రిలీజ్​ కావాల్సి ఉంది

వడ్ల కొనుగోలు సెంటర్లు నిర్వాహకుల కమీషన్​ పైసలు ప్రభుత్వం​ నుంచి రిలీజ్​ కావాల్సి ఉంది.  నేను చార్జ్​ తీసుకున్నాక బకాయిల రిపోర్టు పంపాను. ఆ డబ్బు 
రాగానే పేమెంట్​ చేస్తం.        

– అంబాదాస్​ రాజేశ్వర్​, డీఎం, సివిల్​ సప్లయ్​