- హుస్నాబాద్, మంథని, మానకొండూర్ నియోజకవర్గాల్లో ఏర్పాటు
కరీంనగర్, వెలుగు: ఉమ్మడి కరీంనగర్ జిల్లాకు మూడు యంగ్ ఇండియా ఇంటిగ్రేటెడ్ స్కూల్స్ మంజూరయ్యాయి. మానకొండూరు, హుస్నాబాద్, మంథని నియోజకవర్గాల్లో పైలట్ ప్రాజెక్టుగా ఒక్కో స్కూల్ చొప్పున నిర్మించబోతున్నారు. అన్నివర్గాల విద్యార్థులు ఒకేచోట, ఒకే కుటుంబంగా చదువుకోవాలనే ఉద్దేశంతో రాష్ట్ర ప్రభుత్వం ఈ స్కూళ్లను ఏర్పాటు చేస్తున్న విషయం తెలిసిందే.
తొలివిడతలో రాష్ట్రవ్యాప్తంగా 28 స్కూళ్లను ఒకేసారి ప్రారంభించబోతున్నారు. మానకొండూర్ నియోజకవర్గం తిమ్మాపూర్ మండలం యాదవులపల్లి శివారులోని 20 ఎకరాల ఎస్సారెస్పీ భూమిని ప్రభుత్వం ఇంటిగ్రేటెడ్ స్కూల్ కు కేటాయించింది. కాగా శుక్రవారం యాదవులపల్లిలో, హుస్నాబాద్ నియోజకవర్గం కోహెడ మండలం తంగళ్లపల్లిలో ఇంటిగ్రేటెడ్ స్కూళ్ల నిర్మాణాలకు మంత్రి పొన్నం ప్రభాకర్ శుక్రవారం శంకుస్థాపన చేయనున్నారు.
సైదాపూర్ కల్వర్టు పరిశీలన
సైదాపూర్, వెలుగు: సైదాపూర్ మండల కేంద్రంలోని సైదాపూర్ జాగిరిపల్లిలో లోలెవల్కల్వర్టును పొన్నం ప్రభాకర్ గురువారం పరిశీలించారు. కొన్నేళ్లుగా భారీవర్షాలకు ఈ కల్వర్టు పైనుంచి నీరు ప్రవహిస్తూ రాకపోకలు నిలిచిపోతున్నాయి. దీంతో స్థానికులు, కాంగ్రెస్ లీడర్లు సమస్యను మంత్రి దృష్టికి తీసుకెళ్లడంతో ఆయన పరిశీలించారు. బ్రిడ్జి నిర్మాణానికి అంచనాలు రూపొందించాలని అధికారులను ఆదేశించారు. లీడర్లు దొంత సుధాకర్, శ్రీనివాస్, రాజు, సంతోష్ పాల్గొన్నారు.
