- కారుతో కాలేజ్ గేట్ డ్యాష్ ఇచ్చి మరీ లోపలకు...
- పేరు పెట్టి పిలిచి మరీ దాడి
- అడ్డొచ్చిన మరికొందరికి గాయాలు
- ప్రతిదాడిలో గాయపడ్డ నిందితుడు
- డ్యూటీలు బహిష్కరించిన మెడికోలు
- కలెక్టరేట్ ఎదుట ధర్నా
- బాధ్యుడిని టెర్మినేట్ చేస్తూ ఆర్డర్స్
ఆదిలాబాద్టౌన్, వెలుగు : ఆదిలాబాద్ జిల్లా కేంద్రంలోని రిమ్స్లో బుధవారం అర్ధరాత్రి అసిస్టెంట్ ప్రొఫెసర్ స్థాయి కాంట్రాక్ట్ ఫ్యాకల్టీ ఒకరు ఆగంతకులతో కలిసి హల్చల్ చేశాడు. హౌస్సర్జన్లపై దాడి చేసి గాయపరిచాడు. దీంతో బాధితులు, మెడికోలు కలెక్టరేట్ఎదుట ఆందోళన చేయడంతో ఉద్రిక్తత నెలకొంది. చివరకు బాధ్యులను అరెస్ట్ చేయడంతో పాటు ప్రధాన నిందితుడిని టెర్మినేట్చేయడంతో పరిస్థితి అదుపులోకి వచ్చింది. బాధితుల కథనం ప్రకారం..కొద్ది రోజుల కింద రిమ్స్దవాఖానలో సమస్యలపై డైరెక్టర్ జైసింగ్రాథోడ్ను హౌస్సర్జన్లు ప్రశ్నించారు. ఇది మనసులో పెట్టుకున్న డైరెక్టర్, ఇతడి బంధువైన అసిస్టెంట్ ప్రొఫెసర్, డాక్టర్ క్రాంతికుమార్ కోపం పెంచుకున్నారు. అప్పుడే డాక్టర్ క్రాంతి స్నేహితుడైన వాసిమ్ అనే రౌడీషీటర్ రిమ్స్కు వచ్చి ఓ హౌస్సర్జన్ గల్లా పట్టుకున్నాడు. తర్వాత డాక్టర్ క్రాంతికుమారే గొడవలు ఎందుకంటూ కాంప్రమైజ్ చేశాడు. అంతా సద్దుమణిగిందనుకుంటున్న తరుణంలో బుధవారం అర్ధరాత్రి 12 గంటలకు డాక్టర్ క్రాంతి కుమార్, రౌడీషీటర్ వాసిమ్, శివ, సాయికృష్ణ, వెంకటేశ్, శ్రీకాంత్కలిసి కారులో రిమ్స్ కాలేజ్ గేటును తోసుకుంటూ హాస్టల్ కంపౌండ్లోకి చొరబడ్డారు. ‘ఇక్కడ డాక్టర్ కవిరాజు ఎవడ్రా?’ అని ప్రశ్నించడంతో తానేనంటూ ముందుకు వచ్చాడు. దీంతో అతడిని కొట్టడం మొదలుపెట్టారు. ఇది చూసిన అక్కడే ఉన్న కొందరు హౌస్సర్జన్లు మీరెవరని ప్రశ్నిస్తూ అడ్డుకునే ప్రయత్నం చేశారు. ‘మేం రిమ్స్ డైరెక్టర్ ఫ్యాన్స్ రా..’ అంటూ మరింత రెచ్చిపోయారు. దాడిలో డాక్టర్లు టి.కవిరాజ్తో పాటు పెండెం నవీన్, భరత్, పి.నవీన్, విజయ్, అభిషేక్కు గాయాలయ్యాయి. విషయం తెలుసుకున్న మరికొంతమంది మెడికోలు అక్కడికి చేరుకొని దాడి చేస్తున్నవారిని ధీటుగా ఎదుర్కొన్నారు. దీంతో నిందితుల్లో ఒకడైన శివ కూడా గాయపడ్డాడు. ఈ క్రమంలో నిందితులు కారుతో ఢీకొట్టడంతో ఎగిరిపడ్డ డాక్టర్ పి.నవీన్ కు తీవ్ర గాయాలయ్యాయి. పోలీసులకు సమాచారం ఇవ్వడంతో వారు వెంటనే అక్కడికి చేరుకుని నిందితులను అరెస్టు చేసి టూటౌన్ స్టేషన్కు తరలించారు. సోమవారం ఐదుగురిని రిమాండ్ చేశారు.
కలెక్టరేట్ ఎదుట ధర్నా
దాడిని నిరసిస్తూ హౌస్ సర్జన్లు, పీజీ డాక్టర్లు సుమారు 300 మంది గురువారం ఉదయం డ్యూటీలు బహిష్కరించి ఆందోళనకు దిగారు. డైరెక్టర్ జైసింగ్ రాథోడ్, డాక్టర్ క్రాంతికుమార్ దిష్టిబొమ్మలను దహనం చేశారు. ర్యాలీగా కలెక్టరేట్ కు చేరుకుని బైఠాయించారు. డైరెక్టర్కు వ్యతిరేకంగా నినాదాలు చేశారు. వీరికి మాజీ ఎమ్మెల్యే జోగు రామన్న మద్దతు పలికి ధర్నాలో కూర్చున్నారు. బాధ్యులపై కఠిన చర్యలు తీసుకోవాలని డిమాండ్ చేశారు. పరిస్థితి అదుపు తప్పేలా ఉండడంతో కలెక్టర్ రాహుల్ రాజ్ బయటకు వచ్చి ఆందోళనకారులతో మాట్లాడారు. బాధ్యులపై చర్యలు తీసుకుంటామని చెప్పినా వారు వినలేదు. వెంటనే డైరెక్టర్ను మార్చాలని డిమాండ్ చేశారు. దాడికి పాల్పడిన వారిని పోలీసులు అదుపులోకి తీసుకొని కేసులు నమోదు చేశారని, అడిషనల్ కలెక్టర్ శ్యామలాదేవితో విచారణ జరిపి ఎంతటి వారైనా విడిచి పెట్టేది లేదని చెప్పడంతో శాంతించారు. ఇది జరిగిన కొద్ది సేపటికే డైరెక్టర్ జైసింగ్ రాథోడ్ రిమ్స్లో మీడియా సమావేశం ఏర్పాటు చేశారు. డా.క్రాంతికుమార్ను టెర్మినేట్ చేస్తున్నట్టు ప్రకటించారు.10 మంది డాక్టర్లతో కమిటీ వేసి విచారణకు ఆదేశిస్తున్నట్లు తెలిపారు. మరోవైపు అడిషనల్ కలెక్టర్ శ్యామలాదేవి ఆలస్యం చేయకుండా రిమ్స్కు చేరుకుని ఘటనపై విచారణ జరిపారు. గాయపడిన డా.తాళ్లపెల్లి కవిరాజ్ ఫిర్యాదు మేరకు డా.క్రాంతికుమార్, వాసిం, శివతోపాటు మరికొందరిపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
