కుమ్రంభీం ఆసిఫాబాద్ జిల్లాలో విషాదం జరిగింది. వాంకిడి మండలంలోని ఖానాపూర్ గ్రామంలో సిడాం భీము అనే రైతుపై పెద్దపులి దాడి చేసింది. పులి దాడితో భీము అక్కడికక్కడే చనిపోయాడు. పత్తి చేనులో కాపలా ఉన్న సమయంలో అతనిపై పెద్ద పులి ఒక్కసారిగా దాడి చేసింది. భీమును కొంత దూరం ఈడ్చుకెళ్ళి తీవ్రంగా గాయపర్చి చంపింది. భీము మృతితో గ్రామంలో విషాదచాయలు అలముకున్నాయి. ఈ ఘటనతో చుట్టుపక్క గ్రామాల ప్రజలు భయాందోళనలో ఉన్నారు.
గత కొన్ని రోజులుగా ఆదిలాబాద్ జిల్లాలో పులుల సంచారం పెరిగింది. మొన్న భీంపూర్ మండలం గోళ్లగడ్ తాంసీ సమీపంలో 4 పులుల సంచారం స్థానికులను బెంబేలెత్తించాయి. డీజిల్ కోసం వెళ్లిన డ్రైవర్ కు రాత్రి సమయంలో పిప్పల్ కోటి రిజర్వాయర్ దగ్గర 4 పులులు కనిపించాయి. కొరాట, గూడా, రాంపూర్, తాంసి, గొల్లఘాట్ ప్రాంతాల్లోని రైతులు ఇప్పటికే పులుల భయంతో పంట పొలాలకు వెళ్లేందుకు భయపడుతున్నారు.
నిన్న భీంపూర్ మండలంలో గుంజాల సమీపంలో ఆవుపై దాడి చేసి చంపాయి. వారం క్రితం చెనాక కొరటా పంప్ హౌస్ సమీపంలో 2 పులులు కనిపించాయి. ఇవాళ వాంకిడి మండలం ఖానాపూర్ లో పులి రైతుపై దాడి చేసి చంపడంతో చుట్టుపక్కల గ్రామాల ప్రజలు హడలెత్తిపోతున్నారు. పులులను పట్టుకోవాలని స్థానికులు అటవీశాఖ అధికారులను కోరుతున్నారు.
