ఇయాల్నే కురుమూర్తి ఉద్దాలోత్సవం

• అన్ని ఏర్పాట్లు చేసిన అధికారులు .. 11న జాతరకు సీఎం రేవంత్​ రెడ్డి 
• కర్నాటక, మహారాష్ర్ట, ఏపీ, తెలంగాణ నుంచి తరలిరానున్న భక్తులు
• గుట్టపైకి ఘాట్​ రోడ్డు నిర్మాణానికి
•  రూ.110 కోట్లు మంజూరు చేసిన   సర్కారు

మహబూబ్​నగర్​/చిన్నచింతకుంట, వెలుగు :పేదల తిరుపతిగా పేరుగాంచిన కురుమూర్తి బ్రహ్మోత్సవాల ప్రధాన ఘట్టానికి వేళ అయ్యింది. ఉత్సవాల్లో ముఖ్యమైన ఉద్దాల (పాదుకలు) ఉత్సవాన్ని శుక్రవారం నిర్వహంచనుండగా.. వేడుకను చూసేందుకు కర్నాటక, మహారాష్ర్ట, ఏపీ, తెలంగాణ నుంచి దాదాపు 5 లక్షల మంది భక్తులు తరలి వచ్చే అవకాశం ఉంది. దీంతో ఎండోమెంట్​, రెవెన్యూ, పోలీస్​ ఇతర డిపార్ట్​మెంట్ల ఆధ్వర్యంలో అన్ని ఏర్పాట్లు పూర్తి చేశారు. 

కాగా.. సోమవారం క్షేత్రానికి సీఎం రేవంత్​ రెడ్డి వస్తున్నారని  దేవరకద్ర ఎమ్మెల్యే జి.మధుసూదన్​ రెడ్డి తెలిపారు. ఈ సందర్భంగా సీఎం స్వామి వారికి ప్రత్యేక పూజలు చేయనున్నారు. తెలంగాణ రాష్ర్ట ఏర్పాటు తర్వాత    సీఎం కురుమూర్తి ఆలయానికి రావడం ఇదే తొలిసారి. ఉమ్మడి ఆంధ్రప్రదేశ్​లో 2003లో అప్పటి  సీఎం నారా చంద్రబాబు నాయుడు  దర్శించుకున్నారు.  

12వ శతాబ్దం నుంచే ఉత్సవాలు..

కురుమూర్తి క్షేత్రం 12వ శతాబ్దం నుంచి ఉన్నట్లు చరిత్ర చెబుతోంది. 1268లో ముక్కెర వంశ మూల పురుషుడు గోపాల రాయుడు ఈ ఆలయాన్ని నిర్మించాడు. 1350లో చంద్రారెడ్డి అభివృద్ధి చేయగా, సోమభూపాలరావు కొండపైకి మెట్లు కట్టించాడు. ఆయన హయాంలోనే ఏటా జాతర నిర్వహించే సాంప్రదాయం ప్రారంభమైంది. 1870లో ఉద్దాల మండపం ఏర్పాటు చేశారు. ఈ మండపంలోనే ఉద్దాలను ఉంచి భక్తులకు దర్శనమిస్తారు. ఉద్దాలను భక్తులు వీపుపై కొట్టించుకుంటే పాపాలు పోతాయని నమ్ముతారు. 1966లో ఈ క్షేత్రం దేవాదాయ శాఖలో విలీనం అయ్యింది. అయితే 1999లో కొత్తగా మండపం ఏర్పాటు చేశారు. 

ఏర్పాట్లు పూర్తి

ఉత్సవాల సందర్భంగా ఐదు లక్షల మంది భక్తులు తరలి వచ్చే అవకాశం ఉండటంతో వెయ్యి మంది పోలీసు బందోబస్తు నిర్వహించనున్నారు. కోనేరులో మిషన్​ భగీరథ నీటిని నింపి సిద్ధం చేశారు. 50 వరకు మొబైల్​ టాయ్​లెట్లను అందుబాటులో ఉంచారు. ఇవి కాకుండా గతంలో దాతల సహకారంతో నిర్మించిన 50 టాయిలెట్స్​ కూడా ఉన్నాయి.  తాగునీటి కోసం మంచి నళ్లాలను ఏర్పాటు చేశారు. సమీప గ్రామాల నుంచి వాటర్​ ట్యాంకర్ల ద్వారా కూడా నీటిని సరఫరా చేయనున్నారు. శానిటేషన్​ కోసం 150  మంది గ్రామ పంచాయతీ మల్టీపర్సస్​ వర్కర్లను నియమించారు. ఎక్కడికక్కడ బారీకేడ్లు ఏర్పాటు చేశారు. అలాగే భక్తుల సౌకర్యార్థం మహబూబ్​నగర్​ ఆర్టీసీ డిపో నుంచి క్షేత్రానికి 750 బస్సులను ఏర్పాటు చేశారు. ప్రతి అరగంట ఒక బస్సు కురుమూర్తికి తిప్పననున్నారు. 

ఘాట్​ రోడ్డు మంజూరు

కురుమూర్తి క్షేత్రానికి ఘాట్​ రోడ్డు మంజూరైంది. గుట్టపైకి వెళ్లేందుకు ఎలివేటేడ్ కారిడార్ రోడ్ నిర్మాణానికి రాష్ర్ట ప్రభుత్వం గురువారం రూ.110 కోట్లు  శాంక్షన్ చేసిందని దేవరకద్ర ఎమ్మెల్యే  జి మధుసూదన్ రెడ్డి తెలిపారు. ఈ మేరకు జీవో రిలీజ్​ అయినట్లు వివరించారు. ఈ సందర్భంగా ఎమ్మెల్యే సీఎం రేవంత్​ రెడ్డికి, డిప్యూటీ సీఎం భట్టి విక్రమార్కకు, ఆర్​అండ్​బీ శాఖ మంత్రి కోమటిరెడ్డి వెంకట్​ రెడ్డికి ధన్యవాదాలు తెలిపారు.