- గోవాకు చెందిన టింకేశ్ అరుదైన ఘనత
- ఈ ఫీట్ సాధించిన తొలి ‘ట్రిపుల్ యాంప్యుటీ’ వ్యక్తిగా రికార్డు
పణజి: గోవాకు చెందిన దివ్యాంగుడు టింకేశ్ కౌశిక్ (30) అరుదైన ఘనత సాధించాడు. రెండు కాళ్లు, ఒక చెయ్యి లేకపోయినా ఎవరెస్ట్ బేస్ క్యాంప్ వరకు చేరుకున్నాడు. మూడు అవయవాలు 90 శాతం కోల్పోయి.. ఎవరెస్టును అధిరోహించిన ప్రపంచంలోనే తొలి ‘ట్రిపుల్ యాంప్యుటీ’ వ్యక్తిగా రికార్డులోకి ఎక్కాడు. టింకేశ్ 17,598 ఫీట్ల ఎత్తులోని ఎవరెస్ట్ బేస్ క్యాంప్నకు చేరుకున్నట్టు ప్రైవేట్ డిజేబిలిటి రైట్స్ బాడీ (డీఆర్ఏజీ) ప్రకటించింది. టింకేశ్ కౌశిక్ తొమ్మిదేండ్ల వయస్సులో కరెంట్ షాక్కు గురయ్యాడు. ఈ ప్రమాదంలో అతను రెండు కాళ్లు, ఓ చెయ్యి కోల్పోయాడు.
ప్రస్తుతం కృత్రిమ అవయవాలను వాడుతున్నాడు. ఏదైనా సాధించాలనే తపనతో గోవాకు వచ్చాడు. ఫిట్నెస్ కోచ్గా పని చేస్తున్నాడు. ఆ సమయంలోనే ఎవరెస్ట్ ఎక్కాలని లక్ష్యంగా పెట్టుకొని పట్టుదలతో కృషిచేశాడు. మే 4న నేపాల్ నుంచి సాహసయాత్ర మొదలుపెట్టి.. మే 11న ఎవరెస్ట్ బేస్ క్యాంపుపై జాతీయ జెండా ఎగురవేశాడు. ఈ ప్రయాణంలో తాను అనేక సవాళ్లను ఎదుర్కొన్నానని, మనోబలంతోనే ఈ రికార్డు సాధించానని టింకేశ్ తెలిపాడు.
